Fwile 10
10
Gangannu bɔra
(LvS 78:46; 105:34–35; Jo 1:2–12)
1Gakelebale lé Moizi lɛ léé: ’I go Faraɔn va, naa, maa a bli valé a wuozannu bli kɛlɛ plɛplɛ, anlé tɔmasenu kɛlɛle wo méléna we ma; 2we lé maa kɛlɛ Éjipiti munu lɛ, é valé tɔmasenu lé maa a kɛlɛ wo méléna, yé ka wo zuo fe ka benu valé ka nénénu lɛ, ’bɛ lé we ma é ziin. Yé ka dan a gi dɔɔ lɛ léé, maa a Gakelebale nya. 3Moizi valé Arɔn go Faraɔn va yé wo lé a lɛ léé: Gakelebale, Ébrunu lé Bale léma: I dan ibo kɛlɛ lɛ kiéné ’é ’lɛ mɛ yi laa? ’I daan ’élé munu ma, ’wo go ’é bɔ. 4Dé i ’ka a nyi si lɛ léé, i daan ’élé munu ma lo, bé ye, tɛlɛ é dan da lɛ gangannu nya ilé tɛrɛ faa la. 5Wo dan tɛrɛ ta sɔɔla lɛ ’té mi ’ka tɛrɛ yé é dɛrɛ lo; fɛnu lé goowɔlɛlɛɛ wo vo ka lee, gangannu é dan a pɔné ble lɛ; yilinu lé woo tin‐é kalé féi, wo dan wo faa ble lɛ; 6ilé kɔnnu koo, i wuozannu faa lé kɔnnu koo, Éjipiti munu faa lé kɔnnu koo, wo dan wo fan lɛ. É sia bléyian va lé ka tinu valé ka tranu nyanale pélisia Éjipiti tɛrɛ la, a ma, fɔɔ kyɔ, wo ’ka tan ’bɛ zoɛ we ye lɛ lo. Moizi si Faraɔn va yé é bɔra. 7Faraɔn wuozanu lé a lɛ léé: Mi ’ko, é dan kɛlɛ lɛ ko kunsan nya fɔɔ bléyi kyɛn vaa? ’I daan munu ’konu ma, ’wo go ’wolé Bale bɔ. I ’ka a yé léé, Éjipiti guru a zanana a gi loo?
8Wo da Moizi valé Arɔn nya Faraɔn va é ziin. É lé wo lɛ léé: ’Ka go, ’ka Gakelebale, kalé Bale bɔ. De ɛ dan go lɛɛ? 9Moizi léé: Ko dan go lɛ kolé nénu koo, kolé mi segelenu koo, ko benu valé ko lunu koo, kolé ’blanu valé kolé dirinu koo, wo nya; kolé Gakelebale tɔbɔ fɛti lé. 10Faraɔn lé wo lɛ léé: Dé maa daan ka valé kalé nénu ma, Gakelebale ’é kɛlɛ ka va ma. ’Ka yuɛ pa kabozen va, we tɔntɔn a ka ’lɛ. 11Gbaoo gba! Ka lé ka ke gɔnénu nya, ’ka go Gakelebale bɔ, yee lé ka a laa an lee. Yé wo wo bin Faraɔn yara.
12Gakelebale lé Moizi lɛ léé: ’I bɛ soi Éjipiti tɛrɛ la, yé gangannu ’é da Éjipiti tɛrɛ la ma; wo dan tɛrɛ la féifɛnu faa ble lɛ, fɛnu faa lé goowɔlɛlɛɛ wo vo, wo lé. 13Moizi élé tawomayili soi Éjipiti tɛrɛ la; yé Gakelebale yirinwanazia fu gié tɛrɛ ’ko la yiéyi bléyi faa valé béli bléyi faa va. Tu kini aan wo, ’té yirinwanazia fu da gangannu nya é kwakwa. 14Gangannu da Éjipiti tɛrɛ la, yé wo zana Éjipiti tɛrɛ faa la; ’bɛ zo gangan kiɛre ’ka tan da lɛ tɛrɛ la lo, yé ’bɛ zo gangan kiɛre ’ka dan da lɛ é ziin monomono lo. 15Wo tɛrɛ ta sɔɔla, yé mi ’ka tɛrɛ yé é dɛrɛ lo. Tɛrɛ la féifɛnu koo, yiliporonu koo, fɛ faa lé goowɔlɛlɛɛ wo vo koo, wa faa ble; wo yililaa drɔɔdrɔɔnu valé féi lunu faa ble Éjipiti tɛrɛ faa la.
16Faraɔn Moizi valé Arɔn laa é kele yé é léé: Maa wenyané kɛlɛ Gakelebale, kalé Bale valé ka ma. 17Naa, ’i an ma we vo kyɔ yi do kpen ’ko nya; ’ka bazoro Gakelebale, kalé Bale lɛ léé, ’é dunuvɔmagyɛ ’ko si an ma é ziin. 18Moizi si Faraɔn va yé é bazoro Gakelebale lɛ. 19Gakelebale fu ’lɛ plɛplɛ si yirivɔnazia, yé é gangannu sia yé é wo zén Wɛyi Sɔɔn va. A wɔlɛ do kpen ’ka vo lɛ Éjipiti tɛrɛ faa ta lo. 20Gakelebale Faraɔn bli kɛlɛ plɛplɛ yé Faraɔn ’ka daan lɛ Izraɛl lé nénu ma léé, ’wo go lo.
Gunu dɔra
(LvS 105:28; Wg 16:10–11)
21Gakelebale lé Moizi lɛ léé: ’I bɛ soi lai zia, yé gunu ’é dɔra Éjipiti tɛrɛ la ma, gunu tiritiri lé mi é bɔalɛ léé, é bɛ mane a ma, a nya. 22Moizi é bɛ soi lai zia; yé gunu tiritiri dɔra Éjipiti tɛrɛ faa la fɔɔ yi yaa. 23Munu ’ka wo ke yé lo, yé mi do kpen ’ka nwa lɛ é nyanana lo fɔɔ yi yaa. Naa, fɛana lé Izraɛl lé nénu faa ke é nyanale, yee ɛ na ɛ ke fu.
24Faraɔn Moizi laa yé é léé: ’Ka go ’ka Gakelebale bɔ. Kalé ’blanu valé kalé dirinu saa é dan vo lɛ yé kalé nénu é bɔalɛ léé, ’wo go ka va. 25Moizi a zi pa léé: Fɛnu lé ko dan sarakanu bo lɛ wo nya, é valé winu lé ko dan wo kyɛ ble lɛ Gakelebale, kolé Bale lɛ, biibozen é dan wo nɔ lɛ ko lɛ. 26Kolé trubɛnu é dan go lɛ ko lee, ko sɔnéwɔlɛ do kpen ’ka dan vo lɛ ko zuo lo; naa, wo nya lé ko dan Gakelebale, kolé Bale bɔ lɛ; yé fɛ lé ko dan a si lɛ a va yé ko a nɔ Gakelebale lɛ, ko ’ka a gi dɔɔa lo fɔɔ ’té ko bɔ é wo ana mi. 27Gakelebale Faraɔn bli kɛlɛ plɛplɛ, yé Faraɔn ’ka a va léé, é daan wo ma lo. 28Faraɔn lé Moizi lɛ léé: ’Ka si an va. ’I yuɛ pa ibo va léé, té i da an va é dɛrɛ lo, naa, dé i da an va yian ma, i dan ga lɛ. 29Moizi léé: Yee lé bé fe bɛ. Maa ’ka dan da lɛ i va é dɛrɛ lo.
Currently Selected:
Fwile 10: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
