Fwile 9
9
Winu gyɛgyɛ
(Mal 3:18)
1Gakelebale lé Moizi lɛ léé: ’I go Faraɔn va, bé fe a lɛ léma: Gakelebale, Ébrunu lé Bale léma: ’I daan élé munu ma, ’wo go ’é bɔ. 2Dé i ’ka daan lɛ wo ma, ’wo go lo, dé i a é kunle wo ma tan, 3bé ye, Gakelebale bɛ é dan kɛlɛ lɛ trubɛnu lé ke féinu ta, wo ma, wisoonu koo, sokofalenu koo, nyɔgɔménu koo, dirinu koo, ’blanu koo, woo lé; wo kiɛre kiɛre é dan ga lɛ. 4Gakelebale é dan glɛ dɔ lɛ Izraɛl lé trubɛnu valé Éjipiti munu lé trubɛnu gi, yé fɛnu faa lé ke Izraɛl lé nénu zé nya, wo va wi do kpen ’ka dan ga lɛ lo. 5Gakelebale yi dɔ yé é léé: Tɛlɛ, Gakelebale é dan ’bɛ kɛlɛ lɛ tɛrɛ ’ko la. 6’Bɛ é tu kini, Gakelebale a kɛlɛ a zo. Éjipiti munu lé trubɛnu ga, yé Izraɛl lé nénu lé trubɛnu va wi do kpen ’ka ga lɛ lo. 7Faraɔn we ’ko ta laa, yé bé ye, Izraɛl lé trubɛnu va wi do kpen ’ka ga lɛ lo. Naa, Faraɔn bli kɛlɛ plɛplɛ yé é ’ka daan lɛ munu ma léé, ’wo go lo.
Kyɛyee munu gyɛ manɔn nya
(2 BDWS 28:27; WG 16:2)
8Gakelebale lé Moizi valé Arɔn lɛ léé: ’Ka kuru gi kyɛyee koli ka bɛ nya, yé Moizi ’é a nwɛɛn lai zia, Faraɔn yuɛ va. 9É dan nɔla lɛ vungoi nya yé é dan nwɛɛn lɛ Éjipiti tɛrɛ faa la; yé manɔn lé a péli éé sian é lurudɔle nya, wo dan bɔra lɛ munu valé winu ma Éjipiti tɛrɛ faa la, vungoi ’ko lé we ma. 10Wo kyɛyee si kuru gi yé wo go Faraɔn va; Moizi a nwɛɛn lai zia, yé manɔn lé a péli éé sian é lurudɔle nya, é munu valé winu gyɛ a nya. 11Manɔnnu lé we ma yokɛlɛzannu ’ka bɔa bɔrale lɛ Moizi va lo; naa, manɔn a yokɛlɛzannu ma bélé Éjipiti munu faa zé zo. 12Gakelebale Faraɔn bli kɛlɛ plɛplɛ yé Faraɔn ’ka é tɔné dɔ lɛ Moizi valé Arɔn lɛ lo, Gakelebale a fe Moizi lɛ fɛan zo, a zo.
Goowɔlɛlɛɛ da
(LvS 78:47–48; 105:32–33; Wg 8:7; 16:21)
13Gakelebale lé Moizi lɛ léé: ’I nwa bladi tutu, yé ’i go Faraɔn va. Bé fe a lɛ léma: Gakelebale, Ébrunu lé Bale léma: ’I daan ’élé munu ma, ’wo go ’é bɔ. 14Naa, gɔnɔ do ’ko nya ’é dan ’élé dunuvɔmagyɛnu faa pa lɛ zia, bii koo, i wuozannu koo, ilé munu koo, ka ma, ilé a gi dɔɔle we gi léé, ’é bɔmazan ’ka tɛrɛ faa la lo. 15Dé é a lé ’é bɛ soi kɔɔn yé é bii valé ilé munu gyɛ, ’té ka ta saan tɛrɛ la. 16Naa, é i vo ana, ilé ’élé plɛplɛ yele we gi yé wo ’é tɔ sɔɔla tɛrɛ faa la. 17Dé i nwa ’élé munu ma é ziin, dé i ’ka daan wo ma ’wo go lo, 18bé ye, tɛlɛ, bléyi ’ko va, goowɔlɛlɛɛ lé wo ’ka tan ’bɛ zo goowɔlɛlɛɛ plɛplɛ ye lɛ Éjipiti tɛrɛ la lo, é sia Éjipiti tɛrɛ pélisia bléyi va fɔɔ kyɔ, maa dan a pa lɛ zia. 19Bɛwemalé ilé trubɛnu koo, fɛnu faa lé ke i lee féi koo, ’i wo ta bélidɔ. Munu faa valé winu faa lé ke féi, ’té wo ’ka wo wɔra lɛ kɔnnu gi lo, goowɔlɛlɛɛ é dan dia lɛ wo ta yé wo dan zamaga wo lɛ. 20Faraɔn wuozannu lé wo kana Gakelebale dére lee, wo ’wo wuozannu valé ’wolé trubɛnu wɔra kɔn gi. 21Naa, wo lé wo ’ka ’wo bli vo lɛ Gakelebale dére lɛ lo, wo ’wo wuozannu valé ’wolé trubɛnu vo féi.
22Gakelebale lé Moizi lɛ léé: ’I bɛ soi lai zia yé goowɔlɛlɛɛ é dan dia lɛ Éjipiti tɛrɛ faa la, munu koo, winu koo, féifɛnu faa koo, wo ta. 23Moizi élé tawomayili soi lai zia; yé Gakelebale zagele ban, yé é goowɔlɛlɛɛ pa zia, ’té kyɛ éé dɔwoo tɛrɛ la. Gakelebale goowɔlɛlɛɛ da Éjipiti tɛrɛ la bélé lɛɛ zo. 24Goowɔlɛlɛɛ da, ’té é a é vɔɔle kyɛ nya; Éjipiti bɛn pélisiale ma fɔɔ kyɔ, wo ’ka ’bɛ zo goowɔlɛlɛɛ plɛplɛ ye lɛ Éjipiti tɛrɛ faa la lo. 25Fɛnu faa lé ke féi Éjipiti tɛrɛ faa la, é sia munu ma fɔɔ yé é bɔ winu ma, goowɔlɛlɛɛ wo gyɛ; goowɔlɛlɛɛ féifɛnu faa gyɛ, yé é féiyilinu faa bɛnu so é ma. 26Gozɛn tɛrɛ lé Izraɛl lé nénu ke é nyanale a ta ’bɛna do kpen lé goowɔlɛlɛɛ ’ka dia lɛ lo.
27Faraɔn Moizi valé Arɔn laa, yé é lé wo lɛ léé: Kyɔ maa wenyané kɛlɛ; Gakelebale ɛ ke tegele, yé we a maa valé anlé munu nwiin. 28’Ka bazoro Gakelebale lɛ léé, té zagele banle valé goowɔlɛlɛɛ é kɛlɛ é dɛrɛ lo; maa dan daan lɛ ka ma, ’ka go, yé wo ’ka dan kun lɛ ka ma é dɛrɛ lo. 29Moizi lé a lɛ léé: Dé an si fla tɔɔn, maa dan an bɛnu nwa lɛ Gakelebale vazia, yé zagele ’ka dan ban lɛ é dɛrɛ lo, yé goowɔlɛlɛɛ ’ka dan da lɛ é dɛrɛ lo, ilé a gi dɔɔle we gi léé, tɛrɛ a Gakelebale zé nya. 30Naa, maa gi dɔɔ léé, bii valé i wuozannu ’ka dan kana lɛ Gakelebale lee tan lo. 31Goowɔlɛlɛɛ lɛn valé sɔnmlén sɛrɛ kɔɔn, naa, sɔnmlén nɛnɛ a é bɔrale yé lɛn vwi a é bile; 32é ’ka buruwɔlɛ valé ’sa sɛrɛ lɛ lo, wo vo a la, azama. 33Moizi bɔra Faraɔn lé kɔn gi yé é si fla; é bɛnu nwa Gakelebale vazia, yé zagele banle dɔ, yé goowɔlɛlɛɛ valé lɛɛ dale kini. 34Faraɔn a ye aan wo léé, lɛɛ koo, goowɔlɛlɛɛ koo, zagele banle koo, wo nyaa, é vo wenyané kɛlɛna, yé é bli kɛlɛ plɛplɛ, yee valé é wuozannu nya. 35Faraɔn bli kɛlɛ plɛplɛ, yé é ’ka daan lɛ Izraɛl lé nénu ma léé, ’wo go lo, Gakelebale a fe Moizi lɔlu nya fɛan zo, a zo.
Currently Selected:
Fwile 9: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
