Bélidɔwesɛbɛ Fiézan 19
19
Yɔɔlaflanu
(Mi N 35:9; Joz 20; LvS 72:14)
1Tɛrɛ lé Gakelebale, kalé Bale a nɔ ka lɛ, dé Gakelebale, kalé Bale ana bɛnnu faa nyaa, dé ka ana bɛnnu bin yé ka nyana wolé flanu ta yé ka nyana wolé kɔnnu gi, 2é a lé ’ka fla yaa pa é yɛrama, tɛrɛ lé Gakelebale, kalé Bale a nɔ ka lɛ bɛ, a ta. 3Tɛrɛ lé Gakelebale, kalé Bale é dan a nɔ lɛ ka lɛ kalé tɔnɔfɛ nya, ’ka a gi bɔi yaa, yé ’ka gbéinnu pla. ’Ka kɛlɛ a zo yé migyɛzan faa é bɔ lɛ léé, wo go yɔɔ yee fla ’konu ta. 4Migyɛzan lé é ’ka é bɔluzan gyɛ lɛ ébo lé blibɔmale nya lo, ’té é ’ka a nyanézan nya é kyɛn lo, yé é vlan buru ana ébo vole é yuɛma we gi, bélidɔwe ’ko a ’bɛzan zé nya. 5A gi lé ke ’ko: dé mi do go yili vɔ lɛ pɔrɔ gi, yee valé é bɔluzan nya, ’té zaa a a lee, dé é a yili vɔna bléyian va, dé zaa so é yili la yé é vɔ mi ’ko bɔluzan ma yé é ’bɛ gyɛ yé ’bɛ ga, ’bɛzowe lé. É a lé ’é go yɔɔ fla ’konu va fla do la, a vole é yuɛma we gi. 6Dé ’bɛ kaan lo, nyɛ lɛgipazan bli é dan fli lɛ yé é dan migyɛzan zuo bin lɛ, yé dé alé zi kɛlɛ grɔgrɔ, dé é a dɔ a ma é dan a gyɛ lɛ. Naa, mi ’ko, a ga yara kaan lo, é ’ka é bɔluzan nyanézan nya é kyɛn lo, azama. 7Bɛwemalé maa lé ka lɛ léé, ’ka fla yaa ’ko pa. 8-9Dé Gakelebale, kalé Bale kalé tɛrɛglɛnu buru so é zuo, ébo ’nyɔɔn ka tranu lɛ fɛan zo, a zo, tɛrɛ lé é a fe ka tranu lɛ léé, é dan a nɔ lɛ ka lɛ, ’té dé ka Gakelebale, kalé Bale lɔrɔ pa yé bélidɔwenu faa lé maa a fena ka lɛ kyɔ, dé ka wo lɛdɔama yé ka wo ta tawo, yé ka tawo yifaama Bale lé zinu faa ta, dé Gakelebale nyaa tɛrɛ ’ko faa nɔle nya ka lɛ faa, ka dan fla yaa pa lɛ fla yaa ’ko va, a taa nya. 10’Bɛ zo lé, mi lé we ’ka a nwiin lo, a nyɛ ’ka dan zana lɛ é pla, tɛrɛ lé Gakelebale, kalé Bale a nɔ ka lɛ kalé tɔnɔfɛ nya, a ta lo, yé ka ’ka dan kɛlɛ lɛ migyɛzannu nya lo.
11Naa, dé mi do bɔluzan za vo é gi, dé é a mabɛn yé é bɔra a ma yé é a gyɛ yé é ga, ’bɛ zuo yé é vlan buru yee fla ’konu va fla do ta, 12alé fla mi segelenu é dan mi nwunvɔ lɛ a kunna é yɔɔna, yé wo dan a nɔ lɛ nyɛ lɛgipazan lɛ, yé ’bɛ é dan a gyɛ lɛ. 13Té ka nyanai é zén a ta lo, mi lé we ’ka a nwiin lo, ’ka a nyɛ sia Izraɛl tɛrɛ la, yé ka gi é dan nana lɛ.
Bɔɔlunu valé wenayezannu lé we
(Fw 23:1; 2 BDWS 27:17)
14Tɛrɛ lé Gakelebale, kalé Bale a nɔ ka lɛ kazé nya, ka bɔluzan lé glɛ la bɔɔlu lé ka tranu a vɔ kalé tɔnɔtɛrɛ zi, té ka a si é vɔna yé ka a vɔ fɛ bɛna lo.
15Dé mi do a fe léé, mi do we lɛrɛlɛrɛ kɛlɛ, ɛɛ, é wenyané kɛlɛ, té ka dɔ wenayezan do dére ta lo; woo we dɔɔan wenayezan fié valé yaa dére ma.
16Wenayezan lé é vié wo, dé é nwa mi do ma, we dɔle a nwiin we gi, 17dé é kɛlɛ za nya munu fié ’ko méléna, wo dan da lɛ Gakelebale koo, Balebanzannu koo, munu lé ke ’bɛ bléyi va weblezannu nya koo, wo va. 18Weblemunu é dan we ’ko va gini lɛ tegele. Dé wenayezan a viéwona, dé é é bwe tɔ fe vié nya, 19dé é dɔ a gi léé, é dan a kɛlɛ lɛ é bwe lɛ kɔɔn fɛan zo, é a lé ’ka kɛlɛ a lɛ a zo. ’Bɛ zo lé ka dan wenaané si lɛ ka méléna. 20Mi bɛnu é dan a ’ma lɛ, yé wo dan kana lɛ, yé wo ’ka dan ’bɛ zo wenaané kɛlɛ lɛ é ziin ka va lo. 21Té ka nyanai do kpen é zén a ta lo; ’wo ga lɛgi pa ga nya, ’wo yuɛ lɛgi pa yuɛ nya, ’wo suiɛ lɛgi pa suiɛ nya, ’wo bɛ lɛgi pa bɛ nya, ’wo gane lɛgi pa gane nya.
Currently Selected:
Bélidɔwesɛbɛ Fiézan 19: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
