Bélidɔwesɛbɛ Fiézan 18
18
Balebanmunu valé Lévinu dɔna
(Mi N 8:5–26; 35:1–5)
1Balebanzannu, Lévinu, Lévi bɛn gi munu faa, wozé fɛ ’ka dan kɛlɛ lɛ Izraɛl munu zé va lo, yé wo ’ka dan ’wozé tɔnɔ ye lɛ wo va lo; Gakelebale banfɛ lé wa kyɛ blé Gakelebale tɔbɔfɛ nya, ’té é ke Gakelebale lé tɔnɔ nya bɛ, wozé fɛblele éé sié ’bɛ va. 2Wo ’ka dan tɔnɔfɛ ye lɛ ’wo bwenu zé va lo; Gakelebale a wolé tɔnɔfɛ nya, é a fe wo lɛ fɛan zo, a zo. 3Fɛ lé Balebanzannu é dan a si lɛ balebanfɛ lé munu é dan Bale ban lɛ a nya bɛ, a va, yee lé ke ’ko: dé wo Bale ban diri nya, ɛɛ, dé ’blané léé, a bɛapaboro koo, a puo koo, a suiɛ koo, woo lé. 4Kalé ’sa vinin koo, kalé dɔrɔ’yi vinin koo, kalé nyɔnɔ vinin koo, kalé ’blanu kyɛɛ lé ka bɔi é vinin koo, ’ka wo nɔ Balebanzannu lɛ; 5wo lé Gakelebale, kalé Bale a si a va ka bɛnnu faa gi, nyanama pale Gakelebale tɔ gi we ma, wo valé ’wo benu nya, yifaama.
6Dé Lévi mi do si fɛofɛana lé é nyana Izraɛl tɛrɛ la, ana, yé é go ébo blibɔmale yɛrama fɛna do lé Gakelebale a si a va, ana, 7yé é nyanama pa Gakelebale, kalé Bale tɔ gi, bélé é bwenu Lévinu faa lé woo dɔa Gakelebale ’lɛ, wo zo, 8wo faa blefɛ a do wo nya, yé a ta loru a ti lé fɛnu lé é wo dan, a magɔɔli é dan vo lɛ a lee.
’Monédɔle — Yokɛlɛle — Balelayezannu
(Lév 20:1–6, 27; 2 MNw 17:15–17)
9Dé ka bɔ tɛrɛ lé Gakelebale, kalé Bale a nɔ ka lɛ, a ta, té ka ’bɛna bɛnnu lé bozowenu zuosona lo. 10Té ka va mi do kpen é be valé é lu gié kyɛ va lo; ’monédɔzan koo, monéné va ’monédɔzan koo, wi va ’monédɔzan koo, gyɛzorowe kɛlɛzan koo, 11yo kɛlɛzan koo, milélilaazan valé mi lé éé tɛlɛ tɛlama we néné fé koo, mi lé éé we laan mi galenu lee koo, té wo do kpen é kɛlɛ ka va lo. 12Mi lé é ’bɛ zo wenu kɛla, é a bélé bo zo Gakelebale yuɛ gi; bozowenu ’ko lé we ma lé Gakelebale, kalé Bale é dan bɛn ’konu bin lɛ ka ’lɛ. 13Ka a Gakelebale, kalé Bale zé nya é ta lé kɔn‐an. 14Naa, bɛnnu ’ko lé ka dan wo bin lɛ, woo tɔné dɔa monéné va ’monédɔzan valé ’monédɔzan lɛ; naa, Gakelebale, kalé Bale ’ka ’bɛ zi nɔ lɛ ka lɛ lo.
15Gakelebale, kalé Bale é dan balelayezan do nwa lɛ ka bwenu méléna bélé maa zo; ’ka tɔné dɔ ’bɛ lɛ. 16Yian nya lé ka zén ékeva Orɛb gɔ ma, ka léé, té ’wo Gakelebale, ’wolé Bale dére ’ma lo, té ’wo kyɛ blɛn ’ko ye é dɛrɛ lo, dé ’wo da ga. Yee balelayezan ’ko, é dan ’bɛ we lɛ sɔɔ lɛ. 17’Bɛ yi la bɛ, Gakelebale lé an lɛ léé, we lé wa fe, é a é zima. 18É léé, ’é dan balelayezan do nwa lɛ ka lɛ ka bwenu méléna bélé maa zo, ’é dan ’é dére pa lɛ ’bɛ ’léé, yé we faa lé ’é a fé ’bɛ lɛ, ’bɛ é dan a fe lɛ ka lɛ. 19Yé dére lé yee balelayezan ’ko é dan a fe lɛ ’yee Gakelebale tɔ gi, dé mian ’ka é tɔné dɔ lɛ ’bɛ lɛ lo, ’yee Bale bozen é dan we ’ko zuo laa lɛ ’bɛzan lee. 20Naa, balelayezan‐an é bli si ébo lɛ yé dére lé ’yee Gakelebale ’ka a fe lɛ a lɛ léé, é a fe lo, dé é ’bɛ dére fe ’é tɔ gi, ɛɛ, dé bale bɛ tɔ gi lé é a fe, balelayezan ’ko, wo dan we lɛdɔ lɛ a gi ga nya. 21Dé ka fe ka bli gi léé, dé ’yee, Gakelebale, ’ka dérean fe lɛ lo, ko ’bɛ gi dɔɔan kaa? a gi lé ke ’ko: 22We lé balelayezan a fe, dé é ’ka bɔ lɛ lo, dé a lɛ ’ka sɔɔ lɛ lo, ’bɛ gi léé, we ’ko, ’yee Gakelebale ’ka ’bɛ fe lɛ lo; ’té balelawe lé é a fe bɛ, ’té abo ’wuogiwe lé; té ka kana a lee lo. A zo lé Gakelebale a fe an lɛ yi la koo.
Currently Selected:
Bélidɔwesɛbɛ Fiézan 18: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
