1 Tɛsalɔnik munu 4
4
Tawogane lé é sɔ Kazambale lɛ
(1 Kor 6:13–20; Éf 5:3–8; 1 Pi 1:14–16; 4:1–5)
1É ziin, bwenu, é a lé kalé tawogane é kɛlɛ fɛan zo yé kalé we é sɔ Kazambale lɛ, ko a fe ka lɛ. Yé ka a tawona ko dére ta. Ko a zanté vɔna ka lɛ, ’té ko we plaan ka lɛ Mizan Jézu tɔ nya léé, ’ka a kɛlɛle gi gyɛ. 2Wenu lé ko wo pla ka lɛ Mizan Jézu dére nya, ka wo dɔɔ. 3We lé é sɔ Kazambale lɛ, yee lé ke léé, ’ka kɛlɛ sauun, té ka pɛnpɛnné gyɛ lo; 4ka faa do do kabo kun, ka kɔlɛ vole sauun valé wéiin we gi. 5Té ka kabo nɔ le lé we gi bélé fɛan zo lé yolémunu lé wo ’ka Kazambale dɔɔa lo, wa kɛla fɛan zo, a zo lo. 6Té mi do é wenyané ’ko zo kɛlɛ é bwe lɛ lo. Mizan ɛ ’bɛ zoɛ wenu lɛgi paan; yee lé ko a fe ka lɛ é kyɛn, yé ko a gɔɔn ka lɛ wéiin. 7Kazambale ’ka kaa laa lɛ pɛnpɛnnégyɛle we ma lo, naa, é kaa laa kaa kɛlɛle sauun we ma. 8Bɛwemalé mian éé sɔn vɔa we plalenu ’ko ma, é ’ka sɔn vɔ lɛ mi ma lo, naa, Kazambale lé é Léli Sauun nɔ ka lɛ, é sɔn vɔ yee ɛ ma.
9Dé é a ka sɔle ka ke lɛ lé we nya, Kazambale ɛ ke ’bɛ paana ka gi, amalé é ’ka lé maa we ’ko gyɛ ka lɛ lo. 10Webozen lé, bwenu lé wo ke Masédɔane tɛrɛ faa la, ka wo lɔrɔ paan é ziin. Naa, bwenu, ko we plaan ka lɛ léé, ’ka ka ke lɔrɔpale gi gyɛ é ziin, 11yé ka bli ’é bɔ we ’konu ma ma: ’ka vo drɔɔ, ’ka yara pa kabozen lé we ɛ ta, ’ka nyanama pa kabo bɛ nya, ko fe ka lɛ fɛan zo é kyɛn bɛ, a zo. 12’Bɛ zo lé, kalé tawogane é dan drɔ lɛ yolémunu va, ’té ka ’ka kɛla mi do kpen nwiin kɔné nya lo.
13Bwenu, ko ’ka a va léé, ka vo ka tanyila, munu lé wo ke yiɛna, wolé we ma lo; té ka bli kyɛ é dɔ bélé munu lé wo bli ’ka we do lɛ lo, wozé zo lo. 14Dé ko dɔ a ta léé, Jézu ga yé é nwa é ziin, é a lé ko dɔ a ta é ziin léé, munu lé wo ga Jézu gi, Kazambale é dan wo pa lɛ Jézu va yé é da wo nya. 15Wean ko a fe ka lɛ Mizan dére nya, yee lé é ke ’ko: Ko lé, Mizan é dan bɔ lɛ ko ma é yuɛma, ko ’ka dan gié lɛ munu lé wo ga é kyɛn, wo ’lɛ lo. 16Naa, dé tɔmase do bɔ, dé lanjenuzan siaa, dé Kazambale lé béli we, ’bɛ bléyi nya tɔɔn, ’té Mizan bozen é dan si lɛ la gi yé é zun, yé munu lé wo ga Krist gi, wo dan nwa lɛ é vinin. 17’Bɛ zuo yé ko mi yuɛmalenu lé, ko vo ’ko, wo dan ko faa sia lɛ ékeva wo nya latinu ta, keele we gi Mizan nya la worona. A zo lé ko dan vo lɛ yifaama Mizan va. 18Bɛwemalé, ’ka ka ke tɔrɔ paa dére ’konu nya ma.
Currently Selected:
1 Tɛsalɔnik munu 4: GOURU
Highlight
Copy
Compare
Share
Want to have your highlights saved across all your devices? Sign up or sign in
Alliance Biblique de Cote d'Ivoire 1979
