1 Johannes 3
3
Dit 3. Kapitel.
1Se, wat foar en gurt Lewde hēd di Våder üs bewiset, dat wü Gottes Biärner hjit skel. Diärom känt di Warld ju ek, for di känt höm ek.
2Min Lewsten! wü sen nü Gottes Biärner, en hat es jit ek ipenbåret uden, wat wü wis skel. Mar wü wēt, wan dit ipenbåret ud, dat wü höm lik wis skel; for wü skel höm se, alliküs hi es.
3En Ark, diär sa en Höpning tö höm hēd, di rensket höm sallew, alliküs hi rin es.
4Hokken Send däd, di däd uk Ünrogt; for di Send es dit Ünrogt.
5En I wet, dat hi ipenbåret es, omdat hi ju Send wegnemt, en diär es nin Send ön höm.
6Hokken ön höm blewt, di sendigt ek; hokken sendigt, di hēd höm ek sen, en känt höm ek.
7Biärner! let ju ek forleite. Hokken rogtfardig handelt, di es rogtfârdig, alliküs hi rogtfârdig es.
8Hokken Send däd, di es van di Düwel, for di Düwel sendigt van jest Begen of ön. Diärtö es Gottes Seen üs ön Sjün kjemmen, dat hi di Düwel sin Werken fornigtet.
9Hokken üt Gott geboren es, di däd nin Send, for sin Sit blewt ön höm; en hi kjen sik ek forsendige, for hi es üt Gott geboren.
10Diärom ud-t ipenbar, watfoar hokken Gottes Biärner, en watfoar hokken di Düwel sin Biärner sen. Hokken ek rogt däd, di es ek van Gott; en hokken sin Brödher ek lew hēd.
11For dit es di Bödskep, welk I hjert ha van jest Begen of ön, dat wü arküder lew hå skel.
12Ek üs Kain, diär van di Arig wiär, en slog sin Brödher doad. En üt wat Oarsåk slog hi höm doad? Aurdat sin Dåden ârig wiär, en sin Brödhers Dåden rogtfardig.
13Forwundere ju ek, min Brödhern! wan di Wârld ju håtet.
14Wü wēt, dat wü van di Doad ön-t Lewent kjemmen sen, for wü hå di Brödhern lew. Hokken di Brödher ek lew hēd, di blewt ön di Doad.
15Hokken sin Brödher håtet, di es en Doadslåer; en I wēt, dat dit ewig Lewent ön nin Doadslåer blewt.
16Diärön ha wü di Lewde känt, dat hi sin Lewent foar üs heniwen hed. En wü skel uk dit Lewent foar di Brödhern let.
17Mar wan er hokken dit Warlds Gud hēd, en sjogt sin Brödher Brak#3.17 Mesting. liden, en slüt sin Hart tö voar höm, hur blewt Gottes Lewde ön höm?
18Min Biärnkes! let üs lew ha ek alining me Urden, nog me di Tung, mar me di Dåd en me di Warheid.
19Diärbi kän wü, dat wü üt di Wårheid sen, en kjen üs Hart töfrēd stel voar sin Ansegt.
20For wan üs Hart üs uk önklåget, dag es Gott dag gurter üs dit Hart, en hi känt alle Dinge.
21I Lewsten! wan üs Hart üs ek önklåget, da tänk wü me Frügged om Gott.
22En om wat wü bed, dit fo wü van höm, for wü hoald sin Geboten, en dö, wat höm håget.
23En dit es sin Gebot, dat wü liw ön di Nōm van sin Seen Jesus Kristus, en arküder lew ha, alliküs hi üs en Gebot iwen hed.
24En hokken sin Geboten halt, di blewt ön höm, en hi ön disallew. En diärbi kän wü, dat hi ön üs blewt, nämelk bi di Geist, welk hi üs iwen hēd.
Currently Selected:
1 Johannes 3: NFNT
Highlight
Share
Compare
Copy
Want to have your highlights saved across all your devices? Sign up or sign in
Translated by Peter Michael Clemens (1804-1870)
