Loma 9
9
Ko te Atua ma Ona Tagata Filifilia
1Ko au e tautala i te meamoni; ko au e a Keliho ma ko au e hē pepelo. Ko te Agaga Paia tē e pūlea toku lotofuatiaifo, e ia fakamāonia foki ko au e hē pepelo, 2kāfai au e lea atu ki te lahi o toku fakanoanoa ma te tīgā o toku loto e hē uma 3ki oku tagata, oku kakano ma oku toto! Na hili ai pe kana fetuku au e te Atua ma kave kehe mai ia Keliho, pe kāfai ko te mea ia e maua ai e oku tagata he fehoahoani. 4Na filifilia kilātou e te Atua ke fai ma ona tagata, ma fakakikila kilātou ki tona mamalu; na ohi ana feagaiga#9.4 ana feagaiga ko iētahi tuhituhiga e leamai tana feagaiga ma kilātou ma tuku atu ki ei nā Tūlāfono; kua iloa e kilātou te faiga o nā tāpuakiga; kua maua e kilātou nā folafolaga a te Atua;#Eho 4.22 5na tupuga mai kilātou i nā tino Epelu takutakua, ma na tupuga mai ai foki ia Keliho. Ke vīkia te Atua tē e aoao tana pule, ke pa lava ki te hēgata.#9.5 Ke vīkia te… ki te hēgata pe Ke vīkia pea te Atua, tē e pule i nā mea uma ke pa lava ki te hēgata Amene.
6E hē vēakē la ko te folafolaga a te Atua kua hē fakatāunukua; auā e hē ko tagata uma na tupuga mai ia Ihalaelu ni tagata e o te Atua. 7E hē ko tagata uma foki na tupuga mai ia Apelaamo ni fānau e a te Atua. Na vāgana te Atua kia Apelaamo, “E ala mai ia Ihaako ka maua ai e koe nā lāpuna na folafola atu e au kia te koe.”#Ken 21.12 8Ko tona uiga, e hē ko nā fānau e fānanau i te auala māhani#9.8 fānau e fānanau i te auala māhani E fakatatau ki nā lāpuna o Apelaamo e ala ia Ihamaeli, tona ataliki mai ia Hākā (kikila ki te Kal 4.22-23) te kavea ma fānau a te Atua, kae ko nā fānau na fānanau mai ona ko te folafolaga. 9Auā ko iēnei nā kupu o te folafolaga a te Atua, “I te taimi tatau ka toe hau ai au, ma ko Hala ka iei tona ataliki.”#Ken 18.10
10E hē ko tēnei oioti foki. Ko nā ataliki e toka lua o Lepeka e mai he tamana e fokotahi, ko Ihaako to tātou tupuna. 11-12Kae ko hēki fānanau mai foki lava kilāua pe kua ki lā faia he mea lelei pe he mea kino, kae kua uma te lea o te Atua kia Lepeka, ko te tino matua ka tautua ki te tino tamaiti. Na lea vēnei te Atua kae ke kitea ai e fai lava e ia ana tonu, ma e hēki faia ona ko he mea a he tino o kilāua na fai. #Ken 25.23 13E vē oi tūhia i te tuhituhiga paia, “Ko au e alofa kia Iakopo kae inoino kia Ehau.”#Mal 1.2-3
14Ka lea nei la kitātou ko te Atua e hē fai meatonu? E hēai. 15Auā na vāgana te Atua kia Mohe, “Ka fakaalia toku alofa fakahao ki ho he tino e loto au ki ei; ka fakaalia toku tīgā alofa ki ho he tino e loto au ki ei.”#Eho 33.19 16Ko te mea ia, ko nā mea uma lele e hē fakalagolago ki te mea a te tagata e fai pe ko te mea e fofou ki ei, kae e fakalagolago oioti ki te alofa fakahao o te Atua. 17Auā i te tuhituhiga paia, ko te Atua na vāgana ki te tupu o Aikupito, “Na kō faia koe ma tupu kae ke fakaaogā ai koe ke fakailoa ai toku mālohi, ma ke fakahalalau ai toku takutakua ki te lalolagi kātoa.”#Eho 9.16 (LXX) 18Ko te mea ia, ko te alofa fakahao o te Atua e fakaalia ki ho he tino e loto ia ki ei, ma fakamakaka e ia te loto o ho he tino e loto ia ki ei.
Ko te Tōkahā ma te Alofa Fakahao o te Atua
19Kae e ono fehili vē mai hētahi o koutou kia te au, “Kāfai e vēnā ia faiga a te Atua, heā la te koi fakamāhinohino ai e ia kitātou? Ko ai he tino e ia mafaia oi teteke ki te finagalo o te Atua?” 20Kae ko ai nei koe, he tagata, ke toe tali ai koe ki te Atua? E hē mafai e te ulo ōmea ke lea vē atu ki te tino na ia gaohia ia, “Heā te na gaohi vē ai au e koe?”#Iha 29.16; 45.9 21E hē i te tino nei e gaohi e ia nā ulo, te pule ke ia fakaaogā ai te ele ki te mea e fofou ia ki ei, ma ke ia gaohia ni ulo e lua mai te palugā ele e fokotahi, ko tētahi e fakaaogā mo nā kaiga fakapitoa, ma tētahi mo nā kaiga māhani?
22E vēhea kāfai te Atua e fofou ke fakaali tona tōkahā ma tona mālohi, kae kua lahi pea lava tona onohai ki nā tino e tatau ke pakū ki ei tona tōkahā, nā tino e tuku e fakaumatia; 23ma e vēhea pe kāfai kua ia faia te mea tēnei kae ke fakailoa ai te lahi lele o tona mamalu fakaalia mo kitātou nā tino e fakaaga ki ei tona alofa fakahao, nā tino o kitātou kua uma te ia tāpenagia ke maua e kilātou tona mamalu fakaalia. 24Auā ko kitātou ko nā tino ia kua kalaga mai ki ei te Atua, e hē ko nā tino Iutaia oioti, kae vēnā foki ia tagata nukukehe 25Ko tēnei te kupu a te Atua i te tuhi a Hohea:#Hoh 2.23
“Ko nā tino nae hē ni tino e ōku
ka takua e au ko ‘Ōku Tagata.’
Ko te nuku nae hē alofa au ki ei
ka takua e au ko ‘Taku Fakapelepele.’
26Ma i te koga tonu na lea vē ai te Atua,
‘E hē ni tino koutou e ōku,’#Hoh 1.10
i kinā ka takua kilātou ni fānau a te Atua e ola.”
27Ma ko tēnei te kupu a Ihaia e uiga kia Ihalaelu: “E tuha lava pe kāfai ia tagata o Ihalaelu e tokalahi e vē ko te lahi o te oneone i te matāfaga, kae ni nāi tino lava o kilātou te ka fakaolagia;#Iha 10.22-23 (LXX) 28auā ka vave lele oi fakatino e te Aliki tana fakahalaga na ia folafolagia ki tagata o te lalolagi.” 29E vē ona vāloia e Ihaia, “Ānei e hēki fakatotoea ni tino o kitātou e te Aliki o Kautau o te Lagi, e vēnei ake na pa kitātou ki te mea na pa ki ei ia Hotoma, ma na vē kitātou ko Komola.”#Iha 1.9 (LXX)
Ko Tagata Ihalaelu ma te Tala Lelei
30Heā la te uiga o te mea tēnei? Ko tona uiga ko tagata nukukehe nae hē taumafai ke fakalelei to lātou vā ma te Atua, kae na fakalelei e te Atua e ala i to lātou fakatuatua; 31kae ko tagata Ihalaelu nae hākilikili ki te tūlāfono ke fakalelei ai to lātou vā ma te Atua, e hēki maua e kilātou? 32Aiheā? Auā nae hē fakalagolago ki te fakatuatua kae nae fakalagolago kia lātou mea nae fai. Ma ko te mea ia nae tūinoino ai i te “fatu fakatulave” 33e vē oi lea mai te tuhituhiga paia:
“Kikila, e kō tukua i Hiona he fatu
ka tulave ai ia tagata,
he fatu ka pakukū ai kilātou ki lalo.
Kae ko ai lava e talitonu kia te ia,
ka hē fakamāhiahia.”#Iha 28.16 (LXX)
Currently Selected:
Loma 9: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust