Loma 10
10
1Oku uho, te naunau lahi kō o toku loto ke mafai oku tagata ke fakaolagia! Ko au e tatalo pea lava ki te Atua mo kilātou. 2E molimau au ki to lātou naunau lahi ke fai te finagalo o te Atua; kae ko to lātou naunau e hē fakavaea i te mālamalama moni. 3Ko hēki kilātou iloa te auala e fakalelei ai e te Atua te vā o tagata ma ia, ka kua taumafai lava kilātou ke fai a lātou lava faiga māhani; ma kua hē kilātou tukuatua ai kilātou ki te faiga a te Atua e fakalelei ai te vā o tagata ma ia. 4Auā ko Keliho te kua ia fakaumagia te Tūlāfono, kae ke mafai ai e ho he tino kua talitonu, ke fakalelei e te Atua tona vā ma ia.
Ko te Fakaolataga e mo Tagata Uma
5Ko te mea tēnei na tūhia e Mohe e uiga ki te fakaleleia o te vā ma te Atua e ala i te mulimuli ki te Tūlāfono. “Ko ai lava e uhitaki ki te mea e fakatonu mai e te Tūlāfono, ka ola ia.”#Lev 18.5 6Kae ko te mea e lea mai ai te tuhituhiga paia e uiga ki te fakaleleia o te vā ma te Atua e ala i te fakatuatua e vēnei: “Nahe vē ifo koe i tō loto, Ko ai nei te ka fano ki luga i te lagi?” (ke kavaifo ia Keliho ki lalo).#Teu 30.12-14 7“Ia koe foki nahe lea vē, Ko ai te ka fano ki lalo ki te lua e hē gata te loloto?” (ke kavake ia Keliho ki luga mai te oti). 8Ko te mea e lea mai ai ko tēnei: “Ko te fekau a te Atua e i outou tafa, e i outou laugutu ma e i outou loto”—ko te fekau tēnā e uiga ki te fakatuatua e tālaki e kimātou. 9Kāfai e takutino e koutou i mua o tagata ko Iehu ko te Aliki ma talitonu koutou na fakatū e te Atua mai te oti, ko koutou ka fakaolagia. 10Auā ko te tātou fakatuatua te fakalelei ai to tātou vā ma te Atua; ko te tātou takutinoga i mua o tagata, te fakaola ai kitātou. 11E lea mai te tuhituhiga paia, “E hēai he tino e talitonu kia te ia ka fakamāhiahia.”#Iha 28.16 (LXX) 12Ko te mea tēnei e aofia ai ia tagata uma, auā e hēai he mea e kehekehe ai ia tagata Iutaia ma tagata nukukehe; ko te Atua ko te Aliki ia e tahi o tagata uma, ma e ia kavatua nā fakamanuiaga e lahi mo kilātou uma e kālalaga atu kia te ia. 13E vē oi lea mai te tuhituhiga paia, “Ho he tino e kalaga atu ki te Aliki mo he fehoahoani ka lāveakia.”#Ioe 2.32
14Kae e kālalaga vēhea ake kilātou kia te ia mo he fehoahoani, pe kāfai ko hēki talitonu kilātou? E talitonu vēhea ake kilātou, pe kāfai ko hēki fakalogo kilātou ki te fekau? Ma, e lagona vēhea ake e kilātou te fekau, pe kāfai te fekau ko hēki folafolagia? 15Ma, e folafola vēhea te fekau, pe kāfai e hē uga atua nā kavefekau? E vē oi lea mai te tuhituhiga paia, “Kai te mānaia o nā vae o nā kavefekau e kaumaia te tala lelei!”#Iha 52.7 16Kae e hēki talia e kilātou uma te Tala Lelei. E vē oi lea ia Ihaia, “Te Aliki, ko ai te kua talitonu ki ta mātou fekau?”#Iha 53.1 (LXX) 17Ko te mea ia, ko te fakatuatua e hau mai te fakalogo ki te fekau, ma ko te fekau e hau mai te tālakiga e uiga kia Keliho.
18Kae ko au la e fehili: E moni nei ko hēki fakalogo kilātou ki te fekau? Ko te meamoni, kua lagona e kilātou—auā e lea mai te tuhituhiga paia:
“Ko o lātou leo kua halalau ki te lalolagi kātoa;
ko a lātou kupu kua pa ki pito uma o te lalolagi.”#Hal 19.4 (LXX)
19Kae e toe fehili vē au: Ko tagata nei o Ihalaelu e hēki mālamalama? Na tali lava e Mohe te fehili tēnei i te leaga e uiga ki te vāgana a te Atua e vē:
“Ka fakaaogā e au nā tino e hēai ho lātou mālō,
ke fakaoho ai te fuā o oku tagata;
ma e ala i he mālō e hēai he mālamalama,
ka fakatupu ai e au te ita o oku tagata.”#Teu 32.21
20Ma e hili atu la te mālohi o te fakakupuga e Ihaia o te kupu a te Atua i te leaga vē:
“Na maua au e nā tino nae hē kilātou hakilia au;
na fakakitea au ki nā tino nae hē fehili e uiga kia te au.”#Iha 65.1 (LXX)
21Kae e fakatatau kia Ihalaelu, na lea vē te Atua, “I te aho kātoa nae fālōlō atu oku lima ki he nuku hē uhitaki ma fakatuikehe.”#Iha 65.2 (LXX)
Bible Society New Zealand Charitable Trust