Loma 4
4
Ke Fai ia Apelaamo ma Fakatakitakiga
1Ka vēhea ake nei la he tātou tala e fai e uiga kia Apelaamo, te tupuna o kitātou tagata Iutaia? Ni a te na mafai ke fai e ia lava tautahi? 2Kāfai te vā o ia ma te Atua na fakalelei ona ko ana gāluega nae fai, na tatau la ke iei he mea ke fāfia ai—kae e hē i mua o te Atua. 3E lea mai te tuhituhiga paia, “Ko Apelaamo nae talitonu ki te Atua, ma ko tona fakatuatua na fakalelei ai e te Atua tona vā ma ia.” #Ken 15.6; Kal 3.6 4Ko te tino e faigāluega e maua tona totogi, kae e hē takua tona totogi ko he meālofa, ka ko he mea e maua mo tana galue. 5Kae ko nā tino e fakalagolago ki te fakatuatua kae hē ko a lātou gāluega e fai, ma talitonu ki te Atua tē e ia fakamāgaloa nā tino agahala, ko te fakatuatua la tēnei te taulia i te kikila a te Atua, e mafai ke fakalelei ai to lātou vā ma ia. 6Ko te uiga ia o te kupu a Tavita, i te leaga fakatatau ki te fiafia o te tino kua fakalelei e te Atua tona vā ma ia, e tuha lava pe hēki iei ni ana gāluega na fai.
7“Amutia nā tino ko a lātou mea hehē
e hōloi kehe,
ma ko a lātou agahala
e fakamāgalo!
8Amutia te tino ko ana agahala
e hōloi kehe e te Aliki.”#Hal 32.1-2
9Ko te fakamanuiaga nei tēnei na lea ai ia Tavita e mo nā tino oioti kua uma te pelitome? Hēai! E fakatatau foki ki nā tino e hēki pelitomea. Auā kua kimātou hiki atua te kupu mai te tuhituhiga paia e vē mai, “Ko Apelaamo nae talitonu ki te Atua, ma ko tona fakatuatua na fakalelei ai e te Atua tona vā ma ia.” 10Ko anafea na tupu ai te mea tēnei? Na tupu nei ka kua uma ai te pelitome o Apelaamo pe hēai? Na tupu ka ko hēki pelitomea ai. 11Ko Apelaamo na fātoā pelitome mulimuli, ma ko tona pelitome na fai ma fakailoga ke fakailoa ai ko tona fakatuatua, te na fakalelei ai e te Atua tona vā ma ia. Ko Apelaamo la, ko te tamana faka-te-agaga ia o kilātou uma e talitonu ki te Atua, ma kua fakalelei e te Atua to lātou vā ma ia, e ui lava ko kilātou ko hēki pelitomea.#Ken 17.10 12Ko ia foki ko te tamana o kilātou kua uma te pelitome, ko tona uiga, ko nā tino e hē gata i te kua uma o te pelitome, ka nae ola foki i he olaga fakatuatua e vē ko te olaga nae ola ai ia Apelaamo, ka ko hēki pelitome ai.
Ko te Folafolaga a te Atua e Maua e ala i te Fakatuatua
13I te folafolaga e te Atua kia Apelaamo ma ona lāpuna ko te lalolagi ka e o ia, e hēki ia faia te mea tēnei ona ko Apelaamo nae uhitaki ki te Tūlāfono, kae ona nae talitonu, ma na fakaleleia ai te vā o ia ma te Atua.#Ken 17.4-6; 22.17-18; Kal 3.29 14Auā kāfai te mea kua folafola e te Atua ka fōki oioti ki nā tino e uhitaki ki te Tūlāfono, ko tona uiga e hēai he aogā o te fakatuatua, ma ko te folafolaga a te Atua e hēai hona uiga.#Kal 3.18 15Ko te Tūlāfono e ala mai ai te tōkahā o te Atua; kae kāfai e hēai he tūlāfono, e hēai foki he holitūlāfono.
16Ma ko te folafolaga la na fakavae i te fakatuatua, kae ke fakamautū ai te folafolaga, e vē he meālofa fōki tauanoa e a te Atua ki lāpuna uma o Apelaamo—e hē nā mo kilātou e uhitaki ki te Tūlāfono, kae vēnā foki kilātou e talitonu e vē ko Apelaamo. Auā ko Apelaamo, ko te tamana faka-te-agaga ia o kitātou uma lele;#Kal 3.7 17e vē oi tūhia i te tuhituhiga paia, “Kua kō faia koe ma tamana o mālō e lahi.” Ko te folafolaga la e lelei i te kikila a te Atua, te Atua nae talitonu ki ei ia Apelaamo—te Atua e ia toe fakatutūa nā tino kua oti, ma ko tana fakatonuga e maua ai te ola e nā mea na hēki iei muamua.#Ken 17.5 18Ko Apelaamo nae talitonu ma nae iei tona fakamoemoe, e ui lava nae hē faigōfie mo ia, ma na kavea ai ia, “ko te tamana o mālō e lahi.” E vē oi lea mai te tuhituhiga paia, “Ko nā lāpuna o koe ka tokalahi e vē ko te lahi o nā fetū.”#Ken 15.5 19Ko Apelaamo i te taimi tēnā, kua tāli kātoa tona helau tauhaga kae ko tona fakatuatua e hēki fakaitītia lele kāfai e māfaufau ki tona tino kua hē mafaia he mea, pe ko te tūlaga i te hē fai tama o Hala.#Ken 17.17 20E hēki teka kehe lele tona fakatuatua ma e hēki māhalohalo lele foki ki te folafolaga a te Atua; ko tona fakatuatua nae maua lahi ai e ia te mālohi, ma nae viviki ake ai ia ki te Atua. 21Na mautinoa lelei lava e Apelaamo e mafai e te Atua oi fakatāunuku te mea kua uma te ia folafolagia. 22Ko te mea ia na kavea ai tona fakatuatua ma mea, “na fakalelei ai e te Atua tona vā ma ia.” 23Ko te fakakupuga, “na fakalelei e te Atua tona vā ma ia” e hēki tūhia mo Apelaamo oioti. 24Na tūhia foki mo kitātou, kitātou iēia ka fakaleleia e te Atua to tātou vā ma ia, ma e talitonu ki tē na ia toe fakatū maia mai te oti, ia Iehu tō tātou Aliki. 25Ona ko a tātou agahala, na tuku atu ai ia e te Atua ke oti, ma na toe fakatū mai ki te ola, kae ke fakalelei ai to tātou vā ma ia.#Iha 53.4-5
Currently Selected:
Loma 4: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust