Loma 5
5
Kua Uma te Fakalelei o te Vā o Kitātou ma te Atua
1Nei la kua uma te fakalelei o te vā o kitātou ma te Atua e ala i te fakatuatua, kua maua ai e kitātou#5.1 kua maua ai e kitātou ko iētahi tuhituhiga e lea mai ke ia te kitātou la te fīlēmū i te māfutaga ma te Atua e ala i to tātou Aliki ko Iehu Keliho. 2Kua kaumai e ia kitātou e ala i to tātou fakatuatua, ki te alofa tūnoa o te Atua, tēia e ola ai nei kitātou. Ko kitātou la e fāfifia#5.2 Ko kitātou la e fāfifia pe Tātou fāfifia la ona ko to tātou fakamoemoe, ke iei fakatahi kitātou i te mamalu o te Atua. 3Ko kitātou foki e fāfifia#5.3 kitātou foki e fāfifia pe Tātou fāfifia foki la ki nā puapuagā e maua ai kitātou, auā kua kitātou iloa ko te puapuagā e tupu ai te onohai, 4ko te onohai e talia ai kitātou e te Atua, ma ko te talia o kitātou e te Atua, e tupu ai te fakamoemoe. 5Ko te fakamoemoe tēnei e hē fakanoanoa ai kitātou, auā kua liligi mai e te Atua tona alofa ki o tātou loto e ala i te Agaga Paia, te meālofa a te Atua kia te kitātou.
6Auā ka koi vāivai kitātou ma hē mafaia he mea, ko Keliho na oti mo kitātou nā tino kino, i te taimi na filifili lava e te Atua. 7Ko he mea e faigatā te oti o he tino ke hui ai he tino āmiotonu. Ma hōvē e i na iei he tino e ono loto mākeke, ke oti ia ke hui ai he tino lelei. 8Kae kua fakaalia e te Atua te lahi o tona alofa kia te kitātou—i te taimi ka koi i te agahala ai kitātou, na oti ai ia Keliho mo kitātou. 9E ala i tona toto,#5.9 tona toto pe tona mate kua fakalelei ai to tātou vā ma te Atua, ma ka hē hili atu nei la te mautinoa ko kitātou ka fakahao e ia mai te tōkahā o te Atua! 10Ko kitātou nae ni fili o te Atua, kae na ia faia kitātou ma ana uō, e ala i te oti o tona Ataliki. Nei la ko kitātou ni uō e a te Atua, ka hē hili atu nei la te mautinoa ko kitātou ka fakahao e ala i te ola o Keliho? 11Kae e hē ko tēnā oioti; ko kitātou e fiafia ona ko te mea na fai e te Atua e ala i to tātou Aliki ko Iehu Keliho, tē kua mafai ai kitātou ke kavea ma uō a te Atua.
Ko Atamu ma Keliho
12Ko te agahala na hau ki te lalolagi i he tino e fokotahi, ma ko tana agahala na kaumai ai foki ma te oti. Ona ko te mea tēnei, kua pa ai te oti ki te lalolagi kātoa, auā ko tagata uma lele kua agahala.#Ken 3.6 13Nae iei te agahala i te lalolagi ka ko hēki tuku mai ai te Tūlāfono; kae ko te mea e hē iei he tūlāfono, e hē tūhia ai foki ni agahala. 14Kae mai te vāitaimi o Atamu ke pa ki te vāitaimi o Mohe, ko te oti nae pule kātoa ki tagata uma, ke pa lava ki nā tino e hēki agahala i te auala na agahala ai ia Atamu, ona kua hē uhitaki ki te fakatonuga a te Atua.
I hētahi itū, ko Atamu e tāi vē oi tāi hē vē foki ko te tino na tuku e hau. 15Kae ko te meālofa fōki tauanoa e hē vē ko te agahala a Atamu. E hako e tokalahi na feoti ona ko te agahala a he tino e fokotahi. Kae ko te alofa tūnoa o te Atua e hili lele atu te lahi, ma vēnā tana meālofa fōki tauanoa mo te tokalahi o tagata e ala i te alofa tūnoa o he tino e fokotahi, ko Iehu Keliho. 16Ma e iei te mea e kehekehe ai te meālofa a te Atua, ma te agahala a he tino e fokotahi. I te umaga o te agahala o te tino e toka tahi, na fai ai tona ikuga e te Atua e “Hala”; kae i te umaga o te agahala o tagata e tokalahi, na maua mai ai te meālofa e hēki tatau ke kilātou maua, ko te “Hē hala.” 17E hako ko te agahala a he tino fokotahi te na kāmata ai oi pule te oti, ona ko te tino tēnā e fokotahi. Kae e hē hili atu nei la te lelei o te mea na fai e te tino e fokotahi, ko Iehu Keliho! Ko nā tino uma lele e maua e kilātou te lahi o te alofa tūnoa o te Atua, ma e fakalelei fua to lātou vā ma ia, ka fakaātili to lātou mālolohi e ala ia Keliho.
18Ko te mea ia, e vē ona fakahalagia ia tagata uma ona ko he agahala a he tino e fokotahi, e vēnā foki ona māgalo ia tagata uma ma maua e kilātou te ola, ona ko he gāluega lelei a he tino e fokotahi. 19Ma e vē ona kavea te tokalahi o tagata ma tagata agahala ona ko te hē uhitaki o he tino e fokotahi, ka vēnā foki ona fakaleleia to lātou vā ma te Atua, ona ko te uhitaki o he tino e fokotahi.
20Ko te Tūlāfono na tuku mai ke fakaātili ai te lahi o te holi tūlāfono; kae kāfai e lahi te agahala, ka hili atu la te lahi o te alofa tūnoa o te Atua. 21Ko te mea ia, e vē ona pule te agahala e ala i te oti, e vēnā foki ona pule te alofa tūnoa o te Atua e ala i te fakaleleia o to tātou vā ma ia, ma takitaki ai kitātou ki te ola fakavavau e ala ia Iehu Keliho to tātou Aliki.
Currently Selected:
Loma 5: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust