Loma 15
15
Fai nā Mea ke Fiafia ai Iētahi kae hē ko Koutou
1Ko kitātou iēia e mālolohi i to tātou fakatuatua, e tatau kitātou ke fehoahoani ki nā tino vāivai oi amo a lātou kavega. E hē tatau ke kitātou faia nā mea ke fiafia ai lava kitātou. 2Kae e tatau ke fai e kitātou uma nā mea ke fiafia ai iētahi kua talitonu ki te Atua, kae ke kavea ma mea e mālohi ātili ai to lātou fakatuatua. 3Auā e hēki faia e Keliho ni mea ke fiafia ai lava ia. Kae e vē oi lea mai te tuhituhiga paia, “Ko kupu fakakino a nā tino tau fakakino, kua pakukū mai ki oku luga.”#Hal 69.9 4Ko nā mea uma kua tūhia i nā Tuhituhiga Paia ke akoako ai kitātou, kae ke maua ai e kitātou te fakamoemoe, e ala i te onohai ma te fakamālohi, iēia e kitātou maua mai nā Tuhituhiga Paia. 5Ke kavea te Atua, te puna o te onohai ma o te fakamālohi, ma mea e tahi ai te manatu ia te koutou, ona ko te koutou mulimuli ki nā fakatakitakiga a Keliho Iehu, 6kae ke mafai ai koutou fakatahi ke viviki ake i te leo e tahi, ki te Atua ma te Tamana o tō tātou Aliki ko Iehu Keliho.
Ko te Tala Lelei ki Tagata Nukukehe
7Talia la e tētahi tētahi, ke maua ai he vīkiga mo te Atua, e vē ona talia koutou e Keliho. 8Auā e lea atu au kia te koutou, ko te olaga tautua o Keliho nae mo tagata Iutaia, ke iloa ai ko te Atua e fakamāoni, ke fakatāunuku ana folafolaga ki o lātou tupuna, 9ma ke mafai ai ia tagata nukukehe ke kilātou vīkia te Atua, ona ko tona alofa fakahao. E vē oi tūhia i nā Tuhituhiga Paia,
“Ma ka vīkia koe e au i te mea
e iei ai ia tagata nukukehe;
ka pehe au i nā vīkiga kia te koe.”#2 Ham 22.50; Hal 18.49
10E toe lea vē mai foki,
“Koutou ke fiafia tagata nukukehe,
fakatahi ma tagata o te Atua!”#Teu 32.43
11Ma toe lea mai vē,
“Viviki atu ki te Aliki koutou
tagata nukukehe uma;
viviki atu kia te ia koutou
tagata uma o te lalolagi!” #Hal 117.1
12Oi e lea mai foki ia Ihaia,
“Ka hau he lāpuna o Iehe,#15.12 Iehe te tamana o te Tupu ko Tavita
ka hau ke pule ki tagata nukukehe,
ma ki ona luga ka tuku atu ki ei to lātou fakamoemoe.”#Iha 11.10 (LXX)
13Ke fakatumulia koutou e te Atua, te puna o te fakamoemoe, i te fiafia ma te fīlēmū e ala i te koutou fakatuatua, kae ke tupu ai pea te koutou fakamoemoe, i te mana o te Agaga Paia.
Ko te Ala kua hē Popoi ai ia Paulo i Tana Tuhi
14Oku uho, e mautinoa e au ko koutou e tumu i te lelei, kua ia te koutou te mālamalama, ma kua koutou mafaia oi akoako tētahi ki tētahi. 15Kae e iei iētahi mea, kua hē popoi lele au oi tuhi atu ai ma fakamanatu atu kia te koutou. Kua hē popoi au ona ko te avanoa kua tuku mai e te Atua, 16ke kavea ai au ma kaukauna a Keliho Iehu ke galue mo tagata nukukehe. Ko au e tautua e vē he ohitāulaga i te tālakiga o te Tala Lelei mai te Atua, kae ke ofo atu ai e te Agaga Paia ia tagata nukukehe ma tāulaga e fiafia ai te Atua. 17I te māfutaga ma Keliho Iehu, kua maua ai e au te loto fāfia i taku tautua ki te Atua. 18Ko au ka hē popoi lele ma ka tautala oioti lava ki nā mea kua fai e Keliho kui mai ia te au, ke takitaki ai ia tagata nukukehe ke uhitaki ki te Atua. Kua fai e ia te mea tēnei e ala i nā kupu ma nā gāluega fakatino, 19i te mana o nā vāvega ma nā mea ofōfogia, ma i te mana o te Agaga o te Atua. Ma kua uma te tālaki e au te Tala Lelei kia Keliho, e kāmata mai i Ieluhalema ke pa ki Ilulikou.#15.19 Ilulikou He Itūmālō Loma i te talafātai ki mātū o Maketonia 20Ko te mea e naunau au ki ei, ke tālaki atu te Tala Lelei ki nā koga ko hēki lagona ai te igoa o Keliho, kae ke nahe ati ake ai e au ki luga o he fakavae na kāmata e hētahi tino. 21E vē oi lea mai te tuhituhiga paia,
“Ko nā tino e hēki takua lele ki ei
e uiga kia te ia, ka kilātou kitea;
ko nā tino e hēki kilātou lagona lele
e uiga kia te ia, ka kilātou iloa.”#Iha 52.15 (LXX)
Ko te Fuafuaga a Paulo ke Āhiahi ki Loma
22Ma ko tēnei te māfuaga nae hē mafai ai au ke āhiahi atu kia te koutou i te lahi o taimi.#Lom 1.13 23Kae nei kua uma aku gāluega i nā kogāfenua iēnei, ma e ona kua lahi nā tauhaga nae fakatalitali ai au ke fanatu oi kikila koutou, 24kua iei ai he fuafuaga ko au ka fanatu. Ko au e fofou ke afe atu i taku malaga ki Hepania, ma ke fehoahoani koutou ke vave pa au ki ei, kāfai e uma he tātou māfutaga fiafia mo hina taimi. 25Kae i te taimi nei, ko au ka fano ki Ieluhalema ke fehoahoani ki tagata o te Atua e nonofo i kinā.#1 Kol 16.1-4 26Auā kua tonu i nā Ekalehia i Maketonia ma Akaia, ke kave he lātou tāulaga ke fehoahoani ki nā tino mātitiva o te Atua i Ieluhalema. 27Ko te tonu tēnā e a kilātou lava; kae ko he mea tatau auā he tiute e o kilātou ke fehoahoani ki ei. E vē ona manuia ia tagata nukukehe i nā fakamanuiaga faka-te-agaga na maua e tagata Iutaia, e tatau ai foki ke fakaaogā nā fakamanuiaga i nā mea faka-te-tino e maua e tagata nukukehe, ke fehoahoani ai ki tagata Iutaia.#1 Kol 9.11 28Kāfai e uma te kō faia o te mea tēnei ma tuku atu kia te kilātou nā tupe uma na ao mo kilātou, oi ka fano ai au ki Hepania ma afe atu kia te koutou i toku auala ki ei. 29Ma kāfai au e pa atu, e mautinoa e au ko au e fanatu ma te kātoaga o nā fakamanuiaga mai ia Keliho.
30Ko au la e fakatagi atu kia te koutou, oku uho, e ala i te Aliki ko Iehu Keliho ma te alofa e hau mai te Agaga: ke kau fakatahi kitātou ma tatalo fakatauānau ki te Atua, mo au. 31Tatalo ke puipui malu au mai nā tino hē talitonu i Iutea, ma ke talia taku galuega tautua i Ieluhalema e tagata o te Atua. 32Ma ko au la ka fanatu ma te loto fiafia, pe kāfai ko te finagalo ia o te Atua, ma ke maua e au he fakamālōlōga fiafia i toku māfuta ma koutou. 33Ke fakatahi te Atua, te puna o te fīlēmū, ma koutou uma lele. Amene.
Bible Society New Zealand Charitable Trust