Loma 14
14
Nahe Koutou Fakamahino atu ki Iētahi Tino
1Talia e koutou nā tino e vāivai i te fakatuatua, kae nahe koutou fāitio ki o lātou talitonuga tau toka tahi.#Klh 2.16 2Ko te talitonuga o iētahi tino e kakai ai ki ho he mea, kae ko nā tino e vāivai i te fakatuatua, e kakai oioti ki nā lākaukaina. 3Nahe fāitio la te tino e kai ki ho he mea, ki te tino e kai oioti ki nā lākaukaina; nahe fakamahino foki te tino e kai oioti ki nā lākaukaina, ki te tino e kai ki ho he mea; auā kua talia uma kilāua i mua o te Atua. 4Ko ai nei koe ke fakamahino ai e koe nā kaukauna a hētahi tino? Nā ko te lātou Matai lava oioti te ia faia te tonu, pe hako a lātou mea e fai pe hēai, ma ka fehoahoani te Aliki kia te kilātou ke mautinoa ko a lātou mea e fai e hako.
5Ko iētahi tino e manatu e iei he aho e tāua atu i lo iētahi aho, ka ko iētahi e manatu e tutuha uma lava nā aho. E tatau koutou tau toka tahi, ke mautū outou tāofi ki nā mea kua talitonu koutou ki ei. 6Ko nā tino e fakatāua atu e kilātou he aho e fokotahi, e fai e kilātou ke vīkia ai te Aliki; ko nā tino e kakai ki ho he mea, e fai e kilātou ke vīkia ai te Aliki, auā e kavatu e kilātou te fakafetai ki te Atua mo nā meakai. Ko nā tino e hē kakai ki he itūkāiga meakai, e fai e kilātou ke vīkia ai te Aliki, ma e kavatu e kilātou te fakafetai ki te Atua. 7Ko kitātou e hē ola mo kitātou lava oioti, ma e hē oti foki kitātou mo kitātou lava oioti. 8Kāfai kitātou e ola, ko kitātou e ola mo te Aliki, ma kāfai kitātou oti, ko kitātou e oti mo te Aliki. Ko te mea ia, pe ko kitātou e ola pe oti, ko kitātou e a te Aliki. 9Auā ko Keliho na oti ma na toe ola mai, kae ke kavea ai ia ma Aliki o tagataola, ma o tagata kua feoti. 10Ko koutou la iēnā e kakai oioti ki nā lākaukaina—heā te fakamahino atu ai koutou ki iētahi tino Kelihiano? Ma ko koutou iēnā e kakai ki ho he mea—heā te fāitio tauānoa ai koutou ki iētahi uho Kelihiano? Ko kitātou uma lele ka tutū i mua o te Atua ke fakamahino e ia.#2 Kol 5.10 11Auā e leamai te tuhituhiga paia, kua vāgana te Aliki,
“E vē ona moni ko au e ola pea lava,
‘ko tulivae uma ka tōtutuli i mua o oku,
ma laulaufaiva uma ka takutinoa
ko au ko te Atua.’ ”#Iha 45.23 (LXX)
12Ko kitātou tau toka tahi uma la, ka tali atu lava te tino ki te Atua, e tuha ai ma ana mea kua fai.
Nahe Faia ni Mea ke Pakukū ai Iētahi Tino ki te Agahala
13Ko te mea ia, fakauma loa te fakamahino atu o tētahi ki tētahi. Kae e tatau ke tonu i nā māfaufau o koutou ke nahe toe faia lele e koutou he mea ke tautevateva ai iētahi tino, pe ke pākukū ai kilātou ki te agahala. 14I taku māfutaga ma te Aliki ko Iehu, kua kō mautinoa lelei ai, e hēai he meakai e hē mamā i nā tu tau tāpuakiga; kae kāfai koe e talitonu e iei ni meakai e hē mamā, ka hē mamā lava la mo koe. 15Kāfai e iei ni uho Kelihiano e āfāina ona ko nā meakai e kai ai koe, ko tona uiga kua hē fakavaea nā mea a koe e fai i luga o te alofa. Nahe kavea nā mea e kai koe ki ei, ma mea ke āfāina ai he tino na oti ia Keliho mo ia! 16Nahe kē faia lele he mea ke taku kino ai he mea e kē iloa e lelei. 17Auā ko te Mālō o te Atua e hē fakatatau ki nā mea e kai ma nā mea e inu, kae e fakatatau ki te āmiotonu, te fīlēmū, ma te fiafia moni, iēia e maua mai i te Agaga Paia. 18Ma kāfai koe e tautua kia Keliho i te auala tēnei, ka fiafia ai te Atua ma fakaaloalo atu ia tagata kia te koe.
19Ko te mea ia, ko kitātou e tatau ke taumafai pea lava#14.19 e tatau ke taumafai pea lava ko iētahi tuhituhiga e lea mai e taumafai pea lava ke ola i te fīlēmū ma fehoahoani tētahi ki tētahi, ke taufai mālolohi ai. 20Nahe fakahēaogāgia e koutou nā mea na fai e te Atua, ona ko nā meakai. Ko nā meakai uma lele e lelei ke kai, kae e hehē te kai ki he mea kāfai ka kavea tēnā ma mea e pakū ai hētahi tino ki te agahala. 21E hako te hē kakai ki nā kanofi o nā manuvaefa, te hē inu ki te uaina, pe ko te fai o he mea e tau tevateva ai hō uho ia Keliho. 22Ko nā mea kua talia e koe e uiga ki te mea tēnei, ko he mea lava i te vā o koe ma te Atua. Amutia nā tino e hēai lele he fakaātu kāfai e fai e kilātou nā mea e kilātou iloa e hako! 23Kae kāfai e iei ho lātou loto māhalohalo kia lātou mea e kai, ka taku halagia kilātou e te Atua kāfai e kakai ki ei, auā ko a lātou mea e fai e hē fakavaea i luga o te fakatuatua. Ma ko ho he mea e hē fakavaea i te fakatuatua ko he agahala tēnā.
Bible Society New Zealand Charitable Trust