Loma 12
12
Ko te Olaga Tautua ki te Atua
1Ko te mea ia oku uho, ona ko te lahi o te alofa fakahao o te Atua mo kitātou, e talohaga atu ai au kia te koutou ke ofo atu outou tagata ma tāulaga ola ki te Atua, e paia ma e fiafia ia ki ei. Ko te tāpuakiga moni tēnei e tatau ke ofo atu e koutou ki te Atua. 2Koutou nahe mulimuli ki faiga a te lalolagi, kae ke mafai ai koutou ke līua e ala i te huia kātoatoa e te Atua o outou māfaufau. Oi ka iloa tonu ai e koutou te finagalo o te Atua—heā te lelei ma e fiafia ai ia, ma e kātoatoa te gali.
3Ma e ona ko te meālofa a te Atua kia te au, e lea vēnei atu ai au kia te koutou tau toka tahi uma: Ia koutou lele nahe manatu ko koutou e hili atu te lelei i lo i te tūlaga moni e iei ai koutou. Kae e tatau koutou ke tukutuku ki lalo outou manatu, ma fuafua te tūlaga e iei koutou ki te lahi o te fakatuatua kua fōki atu e te Atua kia te koutou. 4Ko te tino o te tagata e lahi ona vāega, ma ko nā vāega uma e kehekehe a lātou gāluega.#1 Kol 12.12 5E vēnā foki lava kitātou, e ui e tokalahi kitātou, kae e tahi te tino i te māfutaga ma Keliho. Ko kitātou uma ni vāega takitahi e hohoko tētahi ki tētahi i te tino e tahi. 6Ko te mea ia, e tatau ke fakaaogā e kitātou nā meālofa kehekehe kua kitātou maua, e tuha ai ma te alofa tūnoa o te Atua. Kāfai ko te tātou meālofa ko te folafola o te fekau a te Atua, e tatau ke fai e kitātou fuafua ki te fakatuatua kua ia te kitātou;#1 Kol 12.4-11 7kāfai ko te tautua, e tatau kitātou ke tautua; kāfai ko te akoako, e tatau kitātou ke akoako; 8kāfai ko te fakamālohi ki iētahi tino, e tatau ke fai te mea tēnā e kitātou. Kāfai e fōki ni a tātou mea mo iētahi tino, e tatau ke fōki ke lava ma totoe; kāfai e ia te kitātou te pule, e tatau kitātou ke gālulue ma te mālohi; kāfai kitātou e agalelei ki iētahi tino, e tatau ke fai ma te fiafia.
9Ko te alofa e tatau ke kātoatoa te moni. Inoino ki te mea e kino, tāofi mau ki te mea e lelei. 10Ke alofa tētahi ki tētahi e vē ni uho, ma tauvā ke hili atu te fakaaloalo o tētahi i lo tētahi. 11Koutou nahe fakavāivai lele, kae ke mumū koutou e vē he mōlī i te Agaga, ma tautua ki te Aliki ma te loto kātoa. 12Ke kavea te koutou fakamoemoe ma mea e fiafia ai pea lava koutou, onohai i nā puapuagā, ma tatalo i taimi uma. 13Kave he vāega o autou mea ke ola ai outou uho Kelihiano mātitiva, ma talia i loto o outou fale nā tino kehe.
14Lea ki te Atua ke fakamanuia nā tino e faikino atu kia te koutou—io, lea ke fakamanuia kae ke nahe fetukua.#Mat 5.44; Luk 6.28 15Fiafia fakatahi ma kilātou e fiafia, faitatagi fakatahi ma kilātou e faitatagi. 16Koutou ke ola fealofani. Koutou nahe fia hihili, kae fakamāhani ki nā tino loto maulalo. Koutou nahe fia popoto.#Alk 3.7
17Nahe koutou tauia i he hehē he hehē o he tino kia te koutou, kae taumafai ke fai e koutou nā mea e manatu ia tagata uma e lelei. 18Fai uma nā mea e koutou mafaia, ke mafai ai oi maua he olaga fīlēmū i te vā o koutou ma iētahi tino uma lele. 19Te kau uho pele, nahe koutou faia lele te tauimahui, kae tuku vē ki te tōkahā o te Atua ke ia tauia. Auā e lea mai te tuhituhiga paia, “Ko te tauimahui e āku, ka kō toe tauia lava, kua vāgana ai te Atua.”#Teu 32.35 20E lea mai foki vēia, “Kāfai outou fili e fia kakaia, fafaga; kāfai e fia inu, fōki ni a lātou vai ke inu; auā i te faiga tēnei ka koutou faia ai ke mū kilātou i te māhiahi.”#Alk 25.21-22 (LXX) 21Nahe fakatōkilaloa lele koutou e te kino, kae fakatōkilalo te kino e te lelei.
Currently Selected:
Loma 12: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust