Loma 11
11
Ko te Alofa Fakahao o te Atua mo Ihalaelu
1Ko taku fehili: Na teteke nei e te Atua ona lava tagata? Hēai! Ko au foki ko he Ihalaelu, he lāpuna e o Apelaamo mai te puikāiga o Peniamina.#Fil 3.5 2E hēki tetekea e te Atua ona tagata na ia filifilia mai te kāmataga. E iloa e koutou te mea e tūhia i te tuhituhiga paia, ki te fakatagi a Elia ki te Atua e uiga kia Ihalaelu: 3“Te Aliki, kua tāmate e kilātou au pelofeta ma talepe ki lalo ō fata faitāulaga; toe lava ko au te koi totoe, ma e taumafai kilātou ke tāmate au.”#1 Tup 19.10, 14 4Na vēhea la te tali a te Atua ki ei? “Kua fakahao e au mo oku, nā tino e 7,000 e hēki tāpuaki ki te atua pepelo ko Paala.”#1 Tup 19.18 5E vēnā foki lava te mea e iei nei: e iei nā tino tokaitīti e totoe o kilātou kua filifilia e te Atua i tona alofa tūnoa. 6Ko tana filifiliga e fakavae i luga o tona alofa tūnoa, kae hē ona ko a lātou gāluega na fai. Auā kāfai te filifiliga a te Atua e fakavae i luga o gāluega a tagata e fai, tona uiga ko tona alofa tūnoa la e hē ko he alofa tūnoa moni.
7Oi vēhea ai? E hēki maua e tagata Ihalaelu te mea nae hakili e kilātou. Ko te vāega tokaitīti na filifilia e te Atua, te na kilātou mauagia, kae ko iētahi tino kua makaka nā loto, 8e vē oi tūhia, “Kua fakatuka e te Atua o lātou māfaufau ma o lātou loto; ke pa mai lava ki te aho nei, e hē kitea e o lātou mata pe lagona e o lātou taliga.”#Teu 29.4; Iha 29.10 9Ma e leamai ia Tavita,#Hal 69.22-23 (LXX)
“Ke kavea a lātou faigākai ma māilei;
ke popoki ai kilātou,
ke hīhiga ai kilātou,
ma ke fakahala ai kilātou!
10Ke pōuli o lātou mata ke hē kilātou kitea;
ma ke pīpiko pea lava o lātou tua i fakafītāuli.”
11Ko au la e fehili: Na hīhiga nei ma pakukū ma hēki mafai ke toe tutū ki luga? Hēai! Kae ona kua agahala kilātou, kua maua ai e tagata nukukehe te fakaolataga, ke fai ma mea e tupu ai te loto kino i tagata Ihalaelu. 12Ko te agahala a tagata Iutaia kua maua ai te lahi o fakamanuiaga e te lalolagi, ma ko to lātou mātitiva i te faka-te-agaga, kua maua ai te lahi o fakamanuiaga e tagata nukukehe. Ka hē hili atu nei la te lahi lele o nā fakamanuiaga e maua, kāfai e tau i loto te nūmela o tagata Iutaia uma!
Ko te Fakaolataga mo Tagata Nukukehe
13Ko au e tautala atu i te taimi nei kia te koutou tagata nukukehe. Ona ko au ko he apohitolo ki tagata nukukehe, ko au e fāfia lahi i taku gāluega, 14kae ke fai ma mea e tupu ai te lotokino i oku tagata, ma mafai ai ke fakaola ni tino o kilātou. 15Auā kāfai ko te tetekega o kilātou e te Atua kua fai ma mea e liliu ai te lalolagi ki te Atua, e vēhea nei la kāfai e toe taliagia kilātou e te Atua? Ka vē lava kilātou ni tinooti kua toe ola.
16Kāfai te vāega o te paluga falaoa muamua e ofo atu mo te Atua, ko tona uiga ko te falaoa kātoa e ā ia foki; ma kāfai nā aka o he lākau e ofo atu mo te Atua, ko nā lālā uma foki e ā ia. 17Ko iētahi o lālā o te olive e tauhi lelei, kua tagau kehe ma kua hohoko ki ei he lālā o te olive ola vale. Ko koutou tagata nukukehe e vē ko te olive ola vale, ma i te taimi nei kua maua fakatahi e koutou nā fakamanuiaga ona ko koutou kua kavea ma vāega o te olive e tauhi lelei. 18Ko te mea ia, koutou nahe kikila fakatauemu kia te kilātou na tagau kehe e vē ni lālā. E vēhea ona fāfifia koutou? Ko koutou kua nā ko he lālā; e hē fehoahoani koutou ki nā aka—ko nā aka te fehoahoani atu kia te koutou.
19Kae ka ono lea vē koe, “Io, kae ko nā lālā na tagau kehe kae ke hui ai e au kilātou.” 20E hako. Na tagau kehe ona e hēki talitonu, kae ko koe e tūmau pea ona ko koe e talitonu. Ia koe la nahe fāfia, kae ke lagona e koe te mataku. 21Auā e hēki fakahaoa e te Atua nā lālā moni, ma ātonu ka hē ia fakahaoa foki koe. 22E kitātou kiteagia i kinei te agalelei ma te fakahāuā o te Atua. E fakahāuā kia te kilātou kua pakukū ki te agahala, kae agalelei kia te koutou—pe kāfai e tūmau pea koutou i tona alofa. Kae kāfai e hēai, ko koutou foki la ka tagau kehe. 23Ma kāfai nā lālā e kāmata oi toe fakatuatua, ka toe tuku atu kilātou ke fai ma vāega o te lākau tēnā; auā e mafai te mea tēnā ke fai e te Atua. 24Ko koutou tagata nukukehe e vē ko te lālā o te olive ola vale e gagau kehe ma hohoko ki te olive e tauhi lelei, e ui lava ko he mea tēnei e hē tuha ma te nātula o mea. Ko tagata Iutaia e vē ko te olive e tauhi lelei; ma e faigōfie lele i te Atua oi toe hohoko nā lālā iēnei na tagau kehe, ki te lākau lava na tagau mai ai.
Ko te Alofa Fakahao o te Atua mo Tagata Uma
25Oku uho, e iei te meamoni lilo e fofou au ke koutou iloa, ona e fehoahoani ke tāofiofi ai koutou mai te manatu ko koutou e popoto. Ko tēnei la; ko te loto makaka o tagata Ihalaelu e hē tūmau, ma e fātoā uma kāfai kua kātoatoa te nūmela o tagata nukukehe e ōmamai ki te Atua. 26Ma ko tēnei te auala ka fakahao ai ia tagata Ihalaelu uma. E vē oi lea mai te tuhituhiga paia,
“Ko te Fakaola ka hau mai Hiona
ma kave kehe ia āmiokino uma a nā lāpuna o Iakopo.#Iha 59.20-21 (LXX)
27Ka ohi e au te feagaiga tēnei ma kilātou
kāfai e kave kehe e au a lātou agahala.”#Iha 27.9 (LXX)
28Ona ko to lātou teteke ki te Tala Lelei, kua kavea ai ia tagata Iutaia ma fili ki te Atua, mo te lelei o koutou tagata nukukehe. Kae ona ko te filifiliga a te Atua, kua kavea ai kilātou ma ana uō ona ko o lātou tupuna. 29Auā ko nā meālofa ma te kalaga a te Atua, e hē toe fakafokiagia. 30Kae vē la ko koutou tagata nukukehe, e iei te taimi na teteke ai koutou ki te Atua. Kae i te taimi nei, kua teteke ia tagata Ihalaelu ki te Atua, ma kua fakaalia tona alofa fakahao mo koutou. 31I te auala foki lava tēnei e tahi, ona ko te alofa fakahao kua maua e koutou, ko tagata Iutaia kua hē uhitaki ki te Atua, kae ke maua ai foki e kilātou i te taimi nei#11.31 i te taimi nei Ko iētahi tuhituhiga e hē i loto ai te fakakupuga tēnei te alofa fakahao o te Atua. 32Auā kua fai e te Atua ia tagata uma ma pāgotā a te hē uhitaki, kae ke fakaalia ai tona alofa fakahao mo kilātou uma.
Ke Vīkia te Atua
33Kai te lahi lele o te tamaokāiga o te Atua! Kai te loloto lele o tona poto ma tona mālamalama! Ko ai nei te ia mafaia oi fakamālamalama ana tonu? Ko ai nei te mālamalama i ona ala?#Iha 55.8 34E vē oi lea mai te tuhituhiga paia,
“Ko ai te ia iloa te māfaufau o te Aliki?
Ko ai te na kua kavatu kia te ia he fautuaga? #Iha 40.13 (LXX)
35Ko ai te na kua fōkia kia te ia he mea
kae ke ia toe totogi maia?”#Iop 41.11
36Auā ko nā mea uma lele na ia faia, e ala ia te ia, ma e mo ia. Ke vīkia pea lava te Atua ke pa ki te hēgata! Amene.#1 Kol 8.6
Bible Society New Zealand Charitable Trust