Nūmela 16
16
Ko te Fakatuikehe o Kolaha, Tatana, ma Apilama
1-2 #
Iut 1.11
Ko Kolaha te ataliki o Ihala, mai te kaukāiga ha-Levī o Kohati, na fakatuikehe ma teteke kia Mohe. Na kau fakatahi ma ia ni tāulelea e toka tolu mai te puikāiga o Leupena—ko Tatana ma Apilama nā ataliki o Eliapo, ma Ono te ataliki o Peleti—ma ni tino Ihalaelu e toka 250, ni takitaki lauiloa na filifilia mai te fakapotopotoga o tagata Ihalaelu. 3Na māopōpo kilātou i mua o Mohe ma Alona ma lea vē atu kia te kilāua, “Ko koulua e aloā kua lahi te fia hihili! Ko kimātou foki he vāega o tagata paia o te Aliki, ma e iei foki ia ma kimātou. Heā te manatu ai koulua e maualuga lele atu koulua i lo te fakapotopotoga a te Aliki?”
4I te lagonaga atuga o nā kupu iēnei e Mohe, oi na fakapakū ai ki luga o te kelekele i tona fakanoanoa. 5Ma na lea vē atu ai kia Kolaha ma kilātou uma nae mulimuli kia te ia, “I te tāeao tāeao, ka fakailoa mai e te Aliki kia te kitātou pe ko ai nā tino o ia, ma pe ko ai te paia. Ka fakataga oioti e te Aliki nā tino kua ia filifilia ke fakatafapili atu ki te mea e iei ai ia. 6Ko koe, Kolaha ma te kāuga uma a koe, ko tēnei te mea a koutou e fai: Kave ni ulo fakamū meamanogi 7ma kāfai e pa tāeao, tuku ni malala ola ma ni meamanogi ki loto i mua o te Aliki. Ko te tamāloa e filifili e te Aliki, ko ia tēnā te tino e paia. Ko koutou iēnā nā tino ha-Levī, te kua lahi te fia hihili!”
8Na toe lea vē atu ia Mohe kia Kolaha, “Fakalogo mai la koutou, na tino ha-Levī! 9E hēki lava nei mo koutou ko tēia kua vavae kehe koutou e te Atua o Ihalaelu mai te fakapotopotoga o Ihalaelu, ma kaumai koutou ke fakatafapili mai kia te ia ke faia nā gāluega i loto o te Falekie Tapu, ma ke tutū i mua o te fakapotopotoga ma tautua kia te kilātou? 10Kua kaumai koe e ia ma nā tino ha-Levī o koe ke pili mai kia te ia, kae ko koutou foki e fofou ki te tofi ohitāulaga! 11Kāfai koutou e fāitio kia Alona, e tuha lava ko koutou kua fāitio ki te Aliki.”
12Oi na fekau ai e Mohe ia Tatana ma Apilama nā ataliki o Eliapo, kae na tali vē mai kilāua, “Ko kimāua e hē ōatu! 13E hēki lava nei ko tēia kua kē kaumaia kimātou mai te fenua e tafe ai te huhu ma te meli ke tāmate kimātou i te toafa, kae fofou foki koe ko koe ke pule ia te kimātou? 14E manino lele e hēki kē kaumaia kimātou ki he fenua e tafe ai te huhu ma te meli, pe kua fakatofi kimātou e koe i ni fātoaga ma ni tōvine; ma i te taimi nei, ko koe e taumafai ke fakavalea kimātou. Ko kimāua e hē ōatu!”
15Oi na tīgā lele ai te loto o Mohe, ma na lea vē atu ai ki te Aliki, “Nahe talia e koe he meālofa e ofo atu e nā tino iēnei. E hēki fakahehēa lele e au he tino; e pa ki he āhini, e hēki kō kavea lele mai he tino o kilātou.”
16Kua lea atu ia Mohe kia Kolaha, “Kāfai e pa tāeao, ko koe ma te kāuga uma a koe, ka olo ki mua o te Aliki; ko Alona foki ka i kinā. 17Ko tāulelea tau toka tahi o koutou, e hau lava te tino ma tana ulo fakamū meamanogi kua i loto ai nā meamanogi, ma ofo atu nā meamanogi ki te Aliki; e lua helau lima hefulu ia ulo fakamū meamanogi, ma ko koe foki vēnā ma Alona, e hau foki lava te tino ma tana ulo fakamū meamanogi.”
18Oi na fano ai lava te tāulelea ma kave tana ulo fakamū meamanogi kua i loto ai nā malala ola ma nā meamanogi, ma kua olo oi tutū fakatahi ma Mohe ma Alona i mua o te fāitotoka o te Falekie Tapu. 19Oi na fakamāopōpo ai e Kolaha te fakapotopotoga uma ke teteke kia Mohe ma Alona i te faitotoka o te Falekie Tapu. Na kitea atu e te fakapotopotoga kātoa te huhulu pupula o te fakatahi mai o te Aliki, 20ma na vāgana mai ai te Aliki kia Mohe ma Alona, 21“Fakaātea kehe koulua ma te fakapotopotoga tēnei, ke fakaumatia e au kilātou i te taimi nei lava.”
22Ka kua fakapakukū ki te kelekele ia Mohe ma Alona ma lea vē atu, “Te Atua e, te Atua e fōki maia te mānava ki nā mea uma e iei te ola, ka fakahala nei e koe te fakapotopotoga kātoa i he agahala a he tino e fokotahi?”
23Oi na vāgana mai ai te Aliki kia Mohe, 24“Tautala ki te fakapotopotoga ma lea vē ki ei, ‘Olo kehe ma nā falekie o Kolaha, ma Tatana, ma Apilama.’ ”
25Na tū ake ai ki luga ia Mohe kua fano kia Tatana ma Apilama, ma kua mulimuli atu kia te ia nā takitaki o Ihalaelu. 26Oi na lapataki vēnei atu ai ia Mohe ki te fakapotopotoga, “Olo kehe ma nā falekie o iēnei tāulelea kino, ma ia koutou nahe paki lele ki ho he mea a kilāua, auā ia koutou i na ka tafi kehe uma ona ko nā agahala a kilāua.” 27Oi na olo kehe ai kilātou mai nā falekie o Kolaha, Tatana ma Apilama.
Kua ōmamai ki fafo ia Tatana ma Apilama ma tutū i te fāitotoka o nā falekie o kilāua, fakatahi ma a lā āvaga ma a lā fānau. 28Ma na lea vē atu ai ia Mohe ki te fakapotopotoga, “Ko tēnei te mea ka iloa ai e koutou ko au na uga mai e te Aliki ke fakatinoa nā gāluega uma iēnei, kae e hē ko he mea na fofou au ke fai. 29Kāfai nā tino iēnei e mamate e vē ko te nātula māhani o tagataola uma, kae hē ona ko he fakahalaga mai te Atua, oi ko au la e hēki uga maia e te Aliki. 30Kae kāfai e fai e te Aliki he mea e fōu kātoatoa, e vē ko te fakamaga ake o te gutu o te kelekele ma tafolo uma kilātou fakatahi ma nā mea uma a lātou, ma ōifo ola ai lava ki lalo ki te lalolagi o tagata oti, oi ka iloa ai e koutou, ko nā tino iēnei kua teteke ki te Aliki.”
31Na uma atu lava te tautala o Mohe i nā kupu iēnei, kae matala ake te gutu o te kelekele i lalo o Tatana ma Apilama, 32ma folo uma kilāua ma o lā kāiga, fakatahi ma te kāuga nae mulimuli kia Kolaha ma a lātou meatōtino uma. 33Na kave ola uma kilātou ki lalo ki te lalolagi o tagata oti, ma nā meatōtino uma a kilātou; na tapuni ifo te kelekele ki luga o kilātou, ma na mou atu ai lava kilātou mai te fakapotopotoga a tagata Ihalaelu. 34Ko tagata Ihalaelu uma nae i kinā, kua fetutuli kehe i te kilātou lagona atuga o alātou faitatagi taukekē e vē “Ko kitātou foki ka folo e te kelekele!”
35Oi na hau ai te afi mai te Aliki, ma na fakaumatia te toka lua helau lima hefulu tāulelea, nae ofo atua kia te ia nā meamanogi.
Nā Ulo Fakamū Meamanogi
36Oi na vāgana mai ai te Aliki kia Mohe, 37“Lea kia Eleahala te ataliki o Alona te ohitāulaga, ke kave kehe nā ulo fakamū meamanogi mai nā tinooti o nā tāulelea na mū i te afi, ma ke fakatakape mamao ki hētahi mea nā malala ola mai nā ulo fakamū meamanogi, auā ko nā ulo fakamū meamanogi iēnei e paia. 38Ko nā ulo fakamū meamanogi kua paia i te kavega ki mua o te fata faitāulaga a te Aliki. Ko te mea la ia, kave nā ulo fakamū meamanogi a nā tāulelea na tāmate ona ko a lātou agahala, ma tuki ai ni apa mānifinifi ke fai ai he pupuni mo te fata faitāulaga. Ke kavea nā ulo fakamū meamanogi tēnei ma lapatakiga ki tagata Ihalaelu.” 39Oi na kave ai e Eleahala te ohitāulaga, nā ulo fakamū meamanogi apamemea, kua tuki ai ni apa mānifinifi ke fai ai he pupuni mo te fata faitāulaga, 40e vē ko te fakatonuga a te Aliki na kui mai ia Mohe. Ko te mea tēnei e fakamanatu ai ki nā tino Ihalaelu, e hēai he tino e hē ko he lāpuna o Alona, e mafai ke hau ki te fata faitāulaga ke fakamū ni meamanogi i mua o te Aliki, kae ke nahe fakatāugā ai ia, e vē ko te mea na pa ki ei ia Kolaha ma tana kāuga.
Kua Lāveaki e Mohe ma Alona nā Tino Fakatuikehe
41I te aho na hohoko ai, ko te fakapotopotoga kātoa o tagata Ihalaelu kua fakatuikehe kia Mohe ma Alona, kua lea vē kilātou, “Kua tāmate e koulua iētahi o tagata o te Aliki.” 42Ma i te māopōpoga o te fakapotopotoga ke teteke kia Mohe ma Alona, na fakahaga ai te toka lua ki te Falekie o te Aliki, ma kilā kitea atu kua tatao i te ao, ma ko te huhulu pupula o te fakatahi mai o te Aliki kua i kinā. 43Oi na olo ai ia Mohe ma Alona oi tutū i mua o te Falekie o te Aliki, 44ma na vāgana mai ai te Aliki kia Mohe, 45“Hōhō kehe ma te fakapotopotoga tēnei kae ke fakatāugā e au kilātou, nei lava.”
Ma na fakapakukū ai kilāua fakahaga ki te kelekele, 46ma na lea vē atu ai ia Mohe kia Alona, “Kave tau ulo fakamū meamanogi, tuku ni malala ola mai te fata faitāulaga ki loto, ma tuku ni meamanogi ki luga o nā malala. Oi fano fakavave ai oi kave ki te fakapotopotoga ma fakatino te hāuniga mo te fakamamāga o kilātou. Fakavave! Ko te tōkahā o te Aliki kua kāmata hahao, ma ko tēnā kua kāmata pēhi te fāmai-oti.” 47Oi na fai ai e Alona e vē oi lea ake ai ia Mohe, ma kua vili ma tana ulo fakamū meamanogi ki lototonu o te fakapotopotoga, te mea kua kāmata lāvevea ai ia tagata i te fāmai-oti. Kua tuku e ia nā meamanogi ki luga o nā malala ola, ma kāmata loa oi fakatino e ia te hāuniga mo te fakamamāga o tagata. 48Kua tū ia Alona i te vā o nā tinooti ma nā tino koi ola, ma na uma ai loa te fāmai-oti i te taimi tēnā. 49Ko te nūmela o kilātou na mamate i te fāmai-oti e toka 14,700, kae e hē faitau ai nā tino na mamate ona ko Kolaha. 50Kua uma te tāofi o te fāmai-oti, oi na toe liliu ai ia Alona kia Mohe i te fāitotoka o te Falekie o te Aliki.
Currently Selected:
Nūmela 16: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
