Nūmela 15
15
Nā Itūkāiga Meālofa
1Na vāgana mai te Aliki kia Mohe, 2“Tautala ki nā tino Ihalaelu ma lea vē ki ei: ‘Kāfai koutou e taunuku atu ki te fenua tēia e fōki atu e au ke nonofo ai koutou, 3ma e ofo mai e koutou he tāulaga i te afi ki te Aliki mai nā lafupōvi, pe ko nā lafumāmoe a koutou—pe he tāulaga mū pe he tāulaga ke fakatāunuku ai he tautōga, pe he meālofa o te lotomalie, pe i nā aho fakamanatu o koutou—ko te manogi o nā meālofa meakai iēnei e fiafia ai te Aliki. 4Ko ai lava te tino e kaumai e ia he tāulaga vēnā ki te Aliki, ka kaumai foki e ia fakatahi ma he meālofa haito e fokotahi te kilokalama o te falaoa mata e hili te lelei, kua palu ki ei he lita o te lolo olive. 5E hē gata i tēnā, ka ofo atu foki e koutou ma he lita o te uaina mo he tāulaga uaina, fakatahi ma te tāulaga mū, pe ko te tāulaga, mo nā punuāmāmoe takitahi. 6Kāfai ko he māmoe poa te ofo mai, ka hāuni e koutou he meālofa haito e fai i he lua kilokalama o te falaoa mata e hili te lelei kua palu i he tahi ma te āfa lita o te lolo olive; 7ma he tahi ma te āfa lita o te uaina mo he tāulaga uaina. Ko te manogi o nā tāulaga iēnei e fiafia ai te Aliki. 8Kāfai ko he pōvi poa te ofo mai e koutou ma tāulaga mū ki te Aliki, pe mo he tāulaga ke fakatāunuku ai he tautōga, pe ke fai ma tāulaga mo te māfuta fakatahi, 9oi ka kaumai e koutou ma he meālofa haito e tolu kilokalama o te falaoa mata e hili te lelei kua palu i he lua lita o te lolo olive, 10fakatahi ma he lua lita o te uaina mo he tāulaga uaina. Ko te manogi o te tāulaga tēnei i te afi e fiafia ai te Aliki.
11“ ‘Oi ka vēnā lava te mea e fai pe kāfai ko he pōvi poa pe he māmoe poa, pe he punuāmāmoe poa, pe he punuāoti poa foki, te ofo atu ma tāulaga. 12Kāfai e lua ia manuvaefa e ofo atu e koutou ma tāulaga pe hili atu, e vēnā foki ona hiki nā mea mo nā tāulaga fakaopōpo, fua ki te nūmela o nā manuvaefa. 13Ko tagatā nuku uma lele o Ihalaelu e tatau ke mulimuli ki te faiga tēnei, kāfai e ofo mai a lātou meālofa i te afi, mo he manogi e fiafia ai te Aliki. 14Ko he tino kehe e nonofo fakatahi koutou, pe āhiahi atu, ma e fofou ke ofo mai hana meālofa meakai i te afi mo he manogi e fiafia ai te Aliki, e tatau ke fai foki e ia e vē ona fai e koutou. 15Mo te fakapotopotoga kātoa, e fokotahi lava te vāiniuga mo koutou ma te tino kehe e nonofo koutou, he vāiniuga e tūmau pea lava mo augā tupulaga uma; ko koutou ma te tino kehe e tutuha lava i te kikila a te Aliki. 16#Lev 24.22Ko koutou ma te tino kehe e nonofo koutou ka i lalo lava o te tūlāfono e fokotahi ma te folahaga e fokotahi.’ ”
17Na vāgana mai te Aliki kia Mohe, 18“Tautala ki nā tino Ihalaelu ma lea vē ki ei, ‘Kāfai koutou e taunuku atu ki te fenua e fōki atu e au mo koutou 19ma kakai ki nā fua o te fenua, tuku kehe he vāega mo he meālofa ki te Aliki. 20Kāfai e tao autou falaoa, ko te pāpā falaoa muamua e ofo mai e koutou ma meālofa; ka ofo mai e koutou e vē lava ona ofo e koutou he meālofa mai te fola lūhaito. 21I augā tupulaga uma o koutou, ka fōki e koutou ki te Aliki he meālofa mai te taogā falaoa muamua a koutou.
22“ ‘Kāfai nei koutou, te fakapotopotoga o tagata Ihalaelu, e hē mulimuli ki hētahi o nā fakatonuga iēnei na vāgana ai te Aliki kia Mohe— 23nā mea uma kua fakatonu e te Aliki e auala atu ia Mohe, mai te aho na tuku atu ai nā fakatonuga e te Aliki mo augā tupulaga uma; 24ma kāfai foki he mea na fai ma te hē iloa ona ko te hē mālamalama o te fakapotopotoga, ka ofo mai e te fakapotopotoga kātoa he pōvi poa mo he tāulaga mū, ko tona manogi e fiafia ai te Aliki, fakatahi ai ma nā meālofa e fakaopōpo ki ei—he meālofa haito ma he tāulaga uaina, ma he oti poa mo he tāulaga mo nā agahala.#15.24 Pe he tāulaga mo te fakamamāga e vēnā foki i nā fuaikupu 25 ma te 27 25Ka fakatino e te ohitāulaga te hāuniga ko te fakamamāga,#15.25 I nā tu tau tāpuakiga mo te fakapotopotoga kātoa, ma ka fakamāgalo ai kilātou, auā ko he hehē na fai ma te hē iloa, ma kua kaumai te lātou tāulaga mo nā agahala ke fai ma meālofa meakai ki te Aliki. 26Ko te fakapotopotoga kātoa o Ihalaelu ka fakamāgalo, e vēnā ma nā tino kehe e nonofo i te mea e iei kilātou, auā ko tagata uma lele na āfia i te mea hehē na fai ma te hē iloa.
27 #
Lev 4.27-31
“ ‘Kae kāfai ko he tino e fokotahi te na ia faia te agahala ma te hē iloa, ka ofo mai e ia he oti fafine kua fokotahi te tauhaga te matua, ma tāulaga mo nā agahala. 28Ma ka fakatino ai e te ohitāulaga te hāuniga e fakamamā ai i mua o te Aliki te tino na faia te mea hehē ma tona hē iloa, ma ka māgalo ai ia. 29Ko te tūlāfono lava tēnā e fokotahi e fakatatau mo nā tino uma lele e faia he agahala ma te hē iloa, pe ni tagatā nuku Ihalaelu kilātou pe ni tino kehe e nonofo i te mea e iei kilātou.
30“ ‘Kae ko ai lava e ia faia he mea hehē ma tona mautinoa, pe he tagatā nuku Ihalaelu pe he tino kehe, kua hala ia ona kua fāifai ki te Aliki, ma ka momotu kehe ia mai te fakapotopotoga a ona tagata. 31Ona kua inoino kilātou ki te kupu a te Aliki ma holia ana fakatonuga, ka matuā momotu kehe ai lava kilātou; ka tūmau foki lava to lātou nofohala i luga o kilātou.’ ”
Te Tino na Holia te Hāpati
32Ka ko iei ai nā tino Ihalaelu i te toafa, na kilātou maua he tamāloa e fakaputu fafie i te Hāpati. 33Ko nā tino na kilātou maua te tino e fai fafie, kua kaumai e kilātou te tamāloa kia Mohe ma Alona, ma te fakapotopotoga kātoa o Ihalaelu. 34Oi na tāofi haihaitia ai te tamāloa e kilātou ona e hēki manino lelei pe heā te tatau ke fai kia te ia. 35Oi na vāgana mai ai te Aliki kia Mohe, “Ko te tamāloa e tatau ke fakauma tona ola. Lea ki te fakapotopotoga kātoa ke kave te tamāloa ki fafo o te api, ma fetogi i nā fatu ke mate.” 36Oi na kave ai te tamāloa e te fakapotopotoga kātoa ki fafo o te api, ma fetogi i nā fatu ke mate, e vē ko te fakatonuga a te Aliki kia Mohe.
Nā Teuteu i nā Pito o nā Kofu
37Kua vāgana vēnei mai te Aliki kia Mohe, 38#Teu 22.12“Tautala ki nā tino Ihalaelu ma lea vē ki ei: ‘I augā tupulaga uma lele e hau, e fai e koutou ni mea teuteu ki nā pito o nā kofu o koutou, ma fakamau ki ei he meafilo vavae lanu moana. 39Ko nā mea teuteu iēnei ka manatua ai e koutou i taimi uma lava e kikila ai koutou ki ei, ia fakatonuga uma a te Aliki ma uhitaki ki ei; oi ka hē toe liliu kehe ai koutou ma au, ma mulimuli ki tuinanauga o nā loto ma nā mata o koutou. 40Ma ka manatua ai e koutou ma tauhi ki aku fakatonuga uma lele, ma ka paia ai foki koutou ki te koutou Atua. 41Ko au ko te Aliki te koutou Atua, tē na kaumaia koutou mai te fenua ko Aikupito, ke fai ma outou Atua. Ko au ko te Aliki, te Atua o koutou.’ ”
Currently Selected:
Nūmela 15: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
