Maleko 9
9
1Ma na toe lea vē atu ia Iehu kia te kilātou, “E takutino atu e au kia te koutou, e iei nā tino ka kilātou kiteagia te Mālō o te Atua kāfai ka pa mai ma te mālohi o tana pule, ka ko hēki feoti kilātou.”
Ko te Hūiga ki te Tino o Iehu
(Mat 17.1-13; Luk 9.28-36)
2Kua teka atu nā aho e ono, oi na kave ai e Iehu ia Petelu ma Iakopo ma Ioane, kua olo ki luga o he mauga maualuga nā ko kilātou. Ka koi kikila atu kilātou, ka kua iei te hūiga ki te tino o Iehu,#2 Pet 1.17, 18 3ma ko ona kofu kua paepae hihina—kua hili atu te paepae i lo ho hētahi mea lava e mafai ke ufi fakapaepae e he tino i te lalolagi. 4Oi na kitea atu ai foki e kilātou ia Elia ma Mohe e faitatala ma Iehu. 5Oi na lea atu ai ia Petelu kia Iehu, “Te faiākoga, te lelei ko kimātou e i kinei! Ka fakatutū la e kimātou ni fakamalumalu e tolu; ko tētahi mo koe, ko tētahi mo Mohe, ma tētahi mo Elia.” 6Ko te mātataku o Petelu ma tētahi toka lua, na hē hāfia lele ai e Petelu pe ka vēhea ake hana kupu.
7Oi na hula mai ai he ao ma kua malutū ai kilātou, ma na fanaifo ai he leo mai te ao e vē ifo, “Ko toku Ataliki pele tēnei—fakalogo kia te ia!” #Mat 3.17; Mlk 1.11; Luk 3.22 8Na kikila vave atu kilātou, ma na tēteki lele ona kua hēai hētahi tino i kinā ma kilātou, kae nā ko Iehu oioti.
9Ka koi ōifo kilātou ki lalo o te mauga ka kua fakatonu vēnei atu e Iehu te toka tolu, “Nahe koutou takua lele ki he tino te mea na koutou kitea, heiloga kua toe tū te Ataliki o te Tagata mai te oti.”
10Na uhitaki kilātou ki te fakatonuga a Iehu, kae kua kāmata oi fakataufai kilātou lava, “Heā nei te uiga o tana kupu, ‘toe tū mai i te oti?’ ” 11Oi na fehili atu ai kilātou kia Iehu, “Heā te lea ai nā faiākoga o te Tūlāfono ko Elia e tatau ke hau muamua?” #Mal 4.5; Mat 11.14
12Na tali mai ia Iehu, “E hako ko Elia e hau muamua ke hāuni nā mea uma. Ka ko heā nei foki la te tūhia ai i nā Tuhituhiga Paia, ko te Ataliki o te Tagata e tatau ke maua i nā puapuagā e lahi ma teteke e tagata? 13Kae ko au e lea atu kia te koutou, ko Elia kua hau, ma na kilātou faia kia te ia ho he mea lava na fofou kilātou ki ei, e vē lava oi tūhia i nā Tuhituhiga Paia e uiga kia te ia.”
Kua Fakamālōlō e Iehu he Taumalo nae Ulufia e he Agaga Kino
(Mat 17.14-21; Luk 9.37-43)
14I te papā ifoga o kilātou ki lalo ki te mea nae iei iētahi hoko o ia, na kitea ai e kilātou he kaifenua tokalahi i kinā ma ni faiākoga o te Tūlāfono nae fai fīnauga ma ona hoko. 15Na tēteki lele ia tagata i te kitea atuga e kilātou o Iehu, ma na fetutuli atu ai oi fakafeiloaki kia te ia. 16Kua fehili atu ia Iehu ki ona hoko, “He matākupu ā te fai fīnauga ai koutou ma nā tino iēnā?”
17Na tali mai he tamāloa i te kaifenua kia Iehu, “Te Faiākoga, ko au na hau oi kaumai toku ataliki kia te koe ona e ulufia e he agaga kino ma hē mafai ke tautala. 18Ko nā taimi uma lava e ulufia ai, nae ato lava ia e ia ki lalo, ma hau te takāpia i te gutu, e gugu ona nifo ma mākeketū tona tino kātoa. Na lea au ki nā hoko o koe ke kilātou tulia ki fafo te agaga kino, kae na hēki mafai e kilātou.”
19Oi na tali atu ai ia Iehu kia te kilātou, “Kai te hē talitonu o tagata o tēnei tupulaga! Heā nei te mataloa e tatau ke māfuta ai pea au ma koutou? Heā nei te mataloa ka onohai ai pea au? Kaumai te tamaiti kia te au!” 20Oi na kaumai ai e kilātou te taumalo kia Iehu.
Na kitea atu lava ia Iehu e te agaga kino, oi na fakatete loa lava e ia te tino o te taumalo, ma na pakū ai te taumalo ki te kelekele kua takafilifili ai, kae kua hau te takāpia i te gutu. 21Na fehili atu loa ia Iehu ki te tamana o te taumalo, “Heā nei te mataloa talu te tauale vēnei?”
Na tali mai te tamana, “Na tauale vēnei mai lava ka koi tamaiti lele. 22E lahi nā taimi e taumafai ai te agaga kino ke tāmate toku ataliki, e ala i te togi o ia ki loto o te afi pe ki loto o te vai. Alofa kō ma fehoahoani mai kia te kimāua, kāfai e kē mafaia!”
23Kua lea atu ia Iehu ki ei, “Heā te lea ai koe, ‘Kāfai e kē mafaia’? E mafai ia mea uma e te tino e fakatuatua.”
24Ko te taimi lava tēnā na tagi ai te tamana, ma lea vē atu kia Iehu, “Ko au e fakatuatua, kae e hē lava. Fehoahoani mai kō kia te au kae ke fakalahi ātili ai toku fakatuatua!”
25Kua kitea atu e Iehu te kaifenua kua kāmata nunu atu ki te mea nae iei kilātou, oi na fakatonu loa e ia te agaga kino vēnei, “Ko au e lea atu kia te koe, te agaga e tutuli ma gūgū ai te tamaiti, hau nei loa ki fafo, e hā foki koe oi toe ulu kia te ia!”
26Na taukekē loa te agaga kino ma fakatete lahi te tamaiti oi na hau ai ki fafo. Kua tātia te tamaiti e vē he tino kua oti, ko te mea ia na lea vē ai te tokalahi o nā tino, “Ko te tamaiti kua oti!” 27Ka kua tago atu ia Iehu ki te lima o te tamaiti kua fakatū ki luga, ma na tū ai ki luga.
28Kua fano ia Iehu ki loto o te fale, kua nā ko ia ma ona hoko, oi na fehili atu ai ona hoko ki ei, “Heā nei te hēki mafai ai e kimātou oi tuli ki fafo te agaga kino?”
29Na tali atu ia Iehu, “Ko te tatalo oioti lava te mafai ke tuli ai ki fafo te itūkāiga agaga kino tēnei.”
Kua toe Tautala ia Iehu e Uiga ki Tona Mate
(Mat 17.22, 23; Luk 9.43-45)
30Kua olo kehe ia Iehu ma ona hoko mai kinā, ma na olo ai kui loto atu i Kalilaia. Na hēki fofou ia Iehu ke iloa e he tino te mea e iei ai ia, 31ona nae fai ai ana akoakoga ki ona hoko. Na vāgana atu ia ki ona hoko, “Ko te Ataliki o te Tagata ka tukulima atu ki lalo o te pule a tagata, ma ka kilātou tāmatea. Kae ka toe fakatū mai te oti i tona tolu o aho.”
32Kae na hēki mālamalama kilātou i te uiga o te fakakupuga tēnei, ma nae mātataku foki oi fehili e uiga ki ei.
Ko Ai te Hili te Tāua?
(Mat 18.1-5; Luk 9.46-48)
33Kua pa atu kilātou ki Kapenaumi, kua ulu atu ki loto o te fale, oi na fehili atu ai ia Iehu ki ona hoko, “He matākupu ā kō te nae fīnau ai koutou i te auala?”
34Na hēki iei he tino na vaivaia, auā nae fīnau pe ko ai o kilātou te hili ona tāua. #Luk 22.24 35Na nofo ifo loa ki lalo ia Iehu, ma na lea ai ki nā hoko e toka hefulu lua ke hōhō ake kia te ia, ma na lea vē atu ai kia te kilātou, “Ko te tino e fia kavea ma muamua, e tatau ke ia tukua ia ia lava ke kavea ma mulimuli, ma fai ma tāvini ki tagata uma.” #Mat 20.26-27; 23.11; Mlk 10.43-44; Luk 22.26 36Oi na tago atu ai ia Iehu oi fakatū he tamaiti i mua o kilātou. Kua ōpoipoi mai e ia te tamaiti i ona lima, ma na lea vē atu ai ki ona hoko, 37“Ko ai lava he tino e talia e ia he tamaiti vēnei i toku igoa, kua ia talia foki au; ma ko ai lava e ia talia au, kua ia talia foki tē na ia uga maia au.” #Mat 10.40; Luk 10.16; Ioa 13.20
Ko te Tino e hē Teteke mai e Kau ma Kitātou
(Luk 9.49, 50)
38Oi na lea atu ai ia Ioane kia te ia, “Te faiākoga, na kimātou kitea he tino na ia tulia ki fafo nā tēmoni i tō igoa, oi na vavao ai e kimātou auā e hē he tino o kitātou.”
39Kae na vāgana atu ia Iehu kia te kilātou, “Nahe vavaoa te tino tēnā; auā e hēai he tino e ia faia he vāvega i toku igoa kae hohoko ai, kua tautala i ni kupu kino e uiga kia te au. 40Auā ko te tino e hē teteke mai kia te kitātou, e kau ma kitātou. #Mat 12.30; Luk 11.23 41E takutino atu e au kia te koutou, ko ai lava e ia fōki atua he ipu vai kia te koutou ona ko koutou e āku, ka maua lava e ia tona taui. #Mat 10.42
Ko nā Fakaohōhoga ki te Agahala
(Mat 18.6-9; Luk 17.1, 2)
42“Ko ai lava he tino e ia faia he mea ke uma ai te fakatuatua mai kia te au o hētahi o kilātou iēnei e tamaiti, e hili ai mo te tino tēnā pe kana nonoa he fatupae lahi ki te ua, ma togi ai ki te tai. 43-44Kāfai la ko tō lima te māfua ai oi uma tō fakatuatua, tipi kehe! E hili atu tō hao ki te ola e hē gata kae lima tahi, i lo te kātoa o nā lima kae togi ai koe ki Kēna, ki te afi e hē mafai lele ke mate.#9.43-44 Ko iētahi tuhituhiga e fakaopōpo ki ei te fuaikupu 44: I kinā, ko nā gāio e kaia kilātou e hē mamate lele, ma te afi e huhunu ai kilātou e hē mate lele. Kikila ki te fuaikupu 48 #Mat 5.30 45-46Ma kāfai ko tō vae te māfua ai oi uma tō fakatuatua, tipi kehe! E hili atu tō hao ki te ola e hē gata kae vae tahi, i lo te kātoa o nā vae kae togi ai koe ki Kēna.#9.45-46 Ko iētahi tuhituhiga e fakaopōpo ki ei te fuaikupu 46: I kinā, ko nā gāio e kaia kilātou e hē mamate lele, ma te afi e huhunu ai kilātou e hē mate lele. Kikila ki te fuaikupu 48 47Ma kāfai ko tō mata te māfua ai oi uma tō fakatuatua, hali kehe ki ko! E hili atu tō hao ki te Mālō o te Atua kae mata tahi, i lo te kātoa o nā mata kae togi ai koe ki Kēna. #Mat 5.29 48I kinā, ‘ko nā gāio e kaia kilātou e hē mamate lele, ma te afi e huhunu ai kilātou e hē mate lele.’ #Iha 66.24
49“Auā ka fakamamāgia ia tagata tau toka tahi uma i te afi, e vē ona fakamamāgia he tāulaga i te māhima.
50“Ko te māhima e lelei, kae kāfai te māhima kua uma tona kokona, e mafai vēhea nei ke toe fakakokona e koutou? #Mat 5.13; Luk 14.34-35
“Ke ia te koutou te māhima ke tūmau ai pea te koutou ola fealofani ma i te fīlēmū, i te vā o tētahi ma tētahi.”
Currently Selected:
Maleko 9: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
