Maleko 8
8
Kua Fafaga e Iehu te Toka Fa Afe
(Mat 15.32-39)
1E hēki mataloa, kae toe fakapotopoto mai foki he kaifenua tokalahi. Ona kua hēai ni meakai ke kakai ai ia tagata, na kalaga atu ai loa ia Iehu ki ona hoko ke ōake kia te ia, ma nā vāgana atu ai ki ei, 2“Ko au te alofa ki nā tino iēnei auā ko te tolu tēnei o aho koi kinei lava kilātou ma au, ma kua hēai ni a lātou mea ke kai. 3Kāfai nei ka uga e au ke olo ka ko hēki iei he lātou mea ke kai, e matapogia nei ni tino i te auala auā ko iētahi tino e mamao lele nā koga e ōmamai ai.”
4Kua fehili mai ona hoko kia te ia, “Ko fea nei i te togāvao tēnei ke maua ai e he tino ni meakai e lava, ke fafaga ai nā tino uma iēnei?”
5Na fehili atu ia Iehu, “E fia autou falaoa?”
Na tali mai kilātou, “E fitu ia falaoa.”
6Oi na fakatonu loa lava e Iehu te kaifenua ke nonofo ki lalo ki luga o te kelekele. Ma na tago ai ki nā falaoa e fitu, kua fakafetai ki te Atua, ma na tavaevae ai e ia ma fōki ki ona hoko ke fakahoa ki te kaifenua; na vēnā lava ona fai e te kau hoko. 7Nae iei foki ni nāi ika taigogole a kilātou. Kua fakafetai ia Iehu ki te Atua mo nā mea iēnei, oi na fōki ai ki nā hoko ke tufa foki ki tagata. 8Kua kakai ia tagata uma ma kua mākokona; oi na fakaputu ai e te kau hoko nā tōega ma na tūtumu ai nā polapola e fitu. 9E tuha e toka fa afe ia tino nae iei. Oi na uga ai loa e Iehu nā tino ke olo, 10kae kua hohopo ma ona hoko ki he vaka ma na olo ai ki te itūmālō ko Talamanuta.
Kua Fofou te kau Falehaio ki he Fakailoga Ofōfogia
(Mat 12.38-42; 16.1-4)
11Kua ōmamai ni tino o te kau Falehaio kia Iehu ma kāmata oi fai fīnauga ma ia. Nae fofou ke kilātou tofotofoa ia Iehu, oi na lea ai ki ei ke fai he fakailoga ofōfogia ke iloa ai pe kua ia te ia moni te pule mai te Atua.#Mat 12.38; Luk 11.16 12Kae na mānava lahi ia Iehu ma na lea vē atu ai, “Heā nei te fofou ai nā tino o nā aho nei ki he fakailoga ofōfogia? E lea atu au e hēai! E hēai he fakamāoniga vēnei e fai ki nā tino iēnei!”#Mat 12.39; Luk 11.29
13Na fano kehe ai loa ia mai ia te kilātou, ma kua toe hopo ki luga o te vaka ma fano ai āgai ki tētahi itū o te vaitūloto.
Ko te Mea Fakafefete a te kau Falehaio ma Helota
(Mat 6.5-12)
14Na puli i nā hoko ke kave ke lava ni a lātou falaoa, ma e fokotahi oioti lava te falaoa na olo ma kilātou i te vaka. 15Na lapataki atu ia Iehu kia te kilātou, “Koutou ke mataala ma fakaetēte i te mea fakafefete a te kau Falehaio, ma te mea fakafefete a Helota.” #Luk 12.1
16Oi na kāmata ai kua fakataufai te kau hoko nā ko kilātou ma lea vē tētahi ki tētahi, “E lea mai vēnei auā e hēai ni a tātou falaoa.”
17Kua iloa e Iehu nā mea nae fakataufai ai kilātou, oi na vāgana atu ai kia te kilātou, “Heā te fakataufai ai koutou ki te hēai o ni falaoa? Ko hēki koutou hāfia moni nei lava, pe mālamalama? Ko nā loto nei o outou e makaka? 18E fai outou mata kae e hē koutou kitea? E fai outou taliga kae e hē koutou lagona? E hē koutou manatua #Iel 5.21; Ehk 12.2; Mlk 4.12 19te tavaevaega e au o nā falaoa e lima mo nā tino e toka lima afe? E fia ia polapola na tūtumu i nā tōega na ao e koutou?”
Na tali mai te kau hoko, “E hefulu lua.”
20Kua toe fehili atu ia Iehu, “I te tavaevaega e au o nā falaoa e fitu mo nā tino e toka fa afe, e fia ia polapola na tūtumu i nā tōega na ao e koutou?”
Na tali mai te kau hoko, “E fitu.”
21Oi na vē atu ai loa tana fehili, “Ko koutou la ko hēki mālamalama lava?”
Kua Fakamālōlō e Iehu he Tāuaho i Petehaita
22Kua taunuku atu ia Iehu ma ona hoko ki Petehaita, oi na ōmamai ai nā tino oi kaumai he tāuaho kia Iehu. Kua fakatagi atu kilātou kia Iehu ke paki ake ona lima ki te tāuaho. 23Na puke atu loa ia Iehu ki te lima o te tāuaho ma na tataki ai e ia ki fafo o te kakai. Kua feanu ia Iehu ki nā mata o te tāuaho ma fakauta atu ona lima ki ona luga, ma fehili vē atu ki ei, “E kē kitea he mea?”
24Kua tagaki ake te tino ki luga oi na tali vē atu ai, “Io, kua kō kitea nā tino, kae e vē ni lākau e hāvavali.”
25Na toe tuku atu nā lima o Iehu ki nā mata o te tāuaho; oi na pupula hako loa nā mata o te tāuaho ki mua, ma kua kitea lelei e ona mata, kua manino lelei tana kikila ki nā mea uma. 26Oi na uga ai e Iehu te tino tēnei ke toe foki ki tona kāiga ma te fakatonuga e vēnei, “Ia koe nahe kui atu i te kakai.”
Ko te Takutinoga a Petelu e Uiga kia Iehu
(Mat 16.13-20; Luk 9.18-21)
27Oi na olo ai ia Iehu ma ona hoko ki nā nuku nae tafapili ki Kaihaleia Filipi. Ka koi hāvavali kilātou i to lātou auala, kae kua fehili vē atu ia Iehu ki ona hoko, “Ko nā tino e lea, ko ai au?”
28Ma na tali mai kilātou, “Ko iētahi tino e lea ko Ioane te Papatiho, ko iētahi e lea ko Elia, ma iētahi e lea ko hētahi o te kau pelofeta.” #Mlk 6.14-15; Luk 9.7-8
29Kua fehili atu ia Iehu kia te kilātou, “Kae e vēhea ake la koutou? E lea koutou ko ai au?”
Na tali mai ia Petelu, “Ko koe ko te Mehia.” #Ioa 6.68-69
30Oi na fakatonu vēnei atu ai kilātou e Iehu, “Nahe koutou lea lele ki he tino e uiga kia te au.”
Kua Tautala ia Iehu e Uiga ki Ona Puapuagā ma Tona Mate
(Mat 16.21-28; Luk 9.22-27)
31Oi na kāmata ai oi akoako atu vēnei e Iehu ki ona hoko, “Ko te Ataliki o te Tagata e tatau ke maua i nā puapuagā e lahi, ma teteke kia te ia nā toeaina, nā ohitāulaga pule, ma nā faiākoga o te Tūlāfono. Ka tuku atu ia ke tāmate, kae i tona tolu o aho, ka toe tū ai ia mai te oti.” 32Na fakamanino lelei lava e Iehu te mea tēnei kia te kilātou. Ma na tataki kehe ai e Petelu ia Iehu, ma na kāmata ai kua tautala mālohi ki ei ma lea vē atu, “Nahe faia kō ni au tala vēnā.” 33Kae na māfuli atu ia Iehu ki ona tua, kua kikila atu ki nā hoko o ia, ma na tautala mālohi atu ai kia Petelu, kua lea vē atu, “Hatani, fano kehe koe ma au! Auā ko nā manatu o koe e hē mai te Atua, kae ni manatu faka-te-tagata!”
34Oi na kalaga atu loa ia Iehu ki te kaifenua ma ona hoko ke ōake kia te ia, ma na vāgana atu ai vē ki ei, “Kāfai he tino e fia mulimuli mai kia te au, e tatau ke tīaki e ia nā mea e fiafia ia ki ei, kae amo tona hātaulo ma mulimuli mai kia te au. #Mat 10.38; Luk 14.27 35Auā ko ai lava e mānumanu ki tona ola, ka hē ia maua; kae ko ai lava e māumau tona ola ona ko au ma te Tala Lelei, ka maua e ia. #Mat 10.39; Luk 17.33; Ioa 12.25 36Heā nei te aogā kāfai e maua e he tino te lalolagi kātoa, kae māumau ai tona ola? 37E hēai lele he mea e fokotahi e mafai ke fōki e he tino ke toe maua ai tona ola. 38Ko ai lava he tino i tēnei tupulaga hē talitonu ma agahala e mā ia te au ma aku akoakoga, ka vēnā foki oi mā te Ataliki o te Tagata i te tino tēnā, kāfai e hau i te mamalu o tona Tamana ma te kau āgelu paia.”
Currently Selected:
Maleko 8: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
