Maleko 10
10
Kua Akoako e Iehu e Uiga ki te Tatala Āvaga
(Mat 19.1-12; Luk 16.18)
1Oi na fano kehe ai ia Iehu mai te kogāfenua tēnā, kua fano āgai ki te itūmālō o Iutea, ma na fano ai ki tētahi itū o te vaitafe ko Iolitana. E tokalahi foki te kaifenua na toe lolofi atu kia te ia, ma na akoako atu ai kilātou e ia, e vē lava ko tana māhani.
2Oi na ōmamai ai ni tino o te kau Falehaio, kua taumafai ke tofotofo ia Iehu i he fehili. Kua fehili vē atu kilātou, “Taku mai ake, e fakataga i te tātou Tūlāfono he tamāloa ke tatala e ia tana āvaga?”
3Na tali atu ia Iehu i he fehili, kua lea vē atu, “E vēhea te tūlāfono na tuku atu e Mohe kia te koutou?”
4Na tali mai kilātou, “Na tuku mai e Mohe te fakatagaga ke tuhi ai e he tamāloa he tuhi ki tana āvaga, ke fakailoa ki ei ko te lā āvaga kua tatala, ma uga ai tana āvaga ke fano.” #Teu 24.1-4; Mat 5.31
5Na tali atu ai ia Iehu kia te kilātou, “Na tuhi e Mohe te tūlāfono tēnei mo koutou ona ko koutou e loto makaka. 6Kae i te kāmataga o te foafoaga, ‘Na fai e te Atua kilāua, he tamāloa ma he fafine. #Ken 1.27; 5.2 7Ko te mea ia ka tukua ai e te tamāloa tona tamana ma tona mātua kae fakatahi ma tana āvaga,#10.7 Ko iētahi tuhituhiga e hē i loto te kae fakatahi ma tana āvaga #Ken 2.24 8ma kavea ai kilāua toka lua ma tino e tahi.’ Kua hē toe toka lua la kilāua, kae kua tino e tahi. 9Ko te mea la kua tuku fakatahi e te Atua, e hēai he tagataola e ia toe tuku kehekeheagia.”
10Kua i loto kilātou o te fale, oi na fehili atu ai te kau hoko kia Iehu e uiga ki te matākupu lava tēnei. 11Ma na vāgana mai ai ia Iehu kia te kilātou, “Ko ai lava he tamāloa e tatala e ia tana āvaga, kae fakaipoipo ki hētahi fafine, kua agahala ia i te mulilua. #Mat 5.32; 1 Kol 7.10-11 12E vēnā foki he fafine e tatala e ia tana āvaga kae fakaipoipo ki hētahi tamāloa, kua agahala ia i te mulilua.”
Kua Fakamanuia e Iehu nā Tamaiti
(Mat 19.13-15; Luk 18.15-17)
13Na kaumai e ni tino ni tamaiti kia Iehu ke fakaeke atu ona lima ki o lātou ulu, kae kua munaia kilātou e te kau hoko. 14Kua kitea atu e Iehu te mea tēnei, oi na tīgā lele ai tona loto ma na lea vē atu ai ki ona hoko, “Tuku nā tamaiti ke ōmamai kia te au nahe vavaoa, auā ko te Mālō o te Atua e mo kilātou e vē ko kilātou iēnei.” 15E takutino atu e au kia te koutou, ko ai lava e hē ia talia te Mālō o te Atua e vē ko he tamaiti, ka hē hao atu lele ia ki ei.#Mat 18.3 16Oi na ōpoipoi mai ai e Iehu nā tamaiti, kua fakaeke ona lima ki o lātou ulu tau toka tahi, ma na fakamanuia ai e ia kilātou.
Ko te Tamāloa Maukoloa
(Mat 19.16-30; Luk 18.18-30)
17Kua kāmata oi toe fakaauau te malaga a Iehu, kae kua vili mai he tamāloa oi tōtuli i mua o ia ma fehili vē mai ki ei, “Te Faiākoga lelei, heā nei te tatau ke kō faia ke maua ai e au te ola e fakavavau?”
18Kua fehili atu ia Iehu ki ei, “Heā te lea vēnā mai ai koe ko au e lelei? E hēai he tino e lelei kae nā ko te Atua oioti lava. 19Kua iloa e koe nā fakatonuga: ‘Ia koe nahe tāmate tino; ia koe nahe mulilua; ia koe nahe kaihohoa; ia koe nahe molimau pepelo; ia koe nahe fākaimamago; āva ki tō tamana ma tō mātua.’ ” #Eho 20.12-16; Teu 5.16-20
20Na tali mai te tamāloa, “Te Faiākoga, na kāmata mai lava koi tamaiti au, ko au e uhitaki pea lava ki nā fakatonuga uma iēnei.”
21Na kikila hako atu ia Iehu ki te tamāloa ma tona alofa, oi na lea vē atu ai ki ei, “Toe tahi lava la te mea ko hēki kē faia. Fano oi fakatau atu nā mea uma ā koe ma fōki te tupe mā nā tino mātitiva, ma ka maua ai e koe nā koloa e lahi i te lagi; oi hau ai oi mulimuli mai kia te au.” 22I te lagona atuga e te tamāloa o te mea tēnei, oi na fāūū ai ona mata ma na fano kehe ai loa ma tona loto fakanoanoa, auā ko ia ko he tino maukoloa.
23Kua fakaholo atu te kikila a Iehu ki ona hoko oi na vāgana atu ai kia te kilātou, “Kai te faigatā lele mo nā tino maukoloa ke hao atu ki te Mālō o te Atua!”
24Na ofo lahi lele te kau hoko ki nā kupu iēnei a Iehu. Kae kua toe vāgana atu ia Iehu kia te kilātou, “Taku fānau, kai te faigatā lele ke hao atu he tino ki te Mālō o te Atua! 25E faigatā lele atu mo he tino maukoloa ke hao atu ki te Mālō o te Atua, i lo mo he kāmela ke ulu i te pū o he gila.”
26Ko nā kupu iēnei na ofo lahi lele ai te kau hoko, ma na fehili ai tētahi ki tētahi vēnei, “Ko ai nei la te i na mafai ke fakaola?”
27Oi na kikila hako atu ai ia Iehu kia te kilātou ma na tali vē atu ai, “Ko te mea tēnei e matuā hē mafai lava e tagata, kae e mafai e te Atua, auā e hēai he mea fokotahi e hē mafai e te Atua.”
28Oi na lea atu ai ia Petelu, “Kikila, kua tuku e kimātou a mātou mea uma lele kae mulimuli atu kia te koe.”
29“Io,” na vāgana mai ai ia Iehu kia te kilātou, “ma e takutino atu e au kia te koutou, ho he tino e ia tukua tona fale, ona uho, ona tuafafine, tona mātua, tona tamana, tana fānau, pe ko ona fenua ona ko au ma te Tala Lelei, 30ka maua e ia ni fale, ni uho, ni tuafafine, ni mātua, ni fānau, ma ni fenua e taki hautua helau—fakatahi ai ma nā fakahāuāga; kae i te olaga fōu koi hau, ka maua e ia te ola e fakavavau. 31Kae e tokalahi kilātou e muamua nei ka kavea ma mulimuli, ma e tokalahi foki kilātou e mulimuli nei ka kavea ma muamua.”#Mat 20.16; Luk 13.30
Ko te Fakatolu oi Vāgana ia Iehu e Uiga ki Tona Mate
(Mat 20.17-19; Luk 18.31-34)
32Kua i luga nei o te auala e fano ki Ieluhalema ia Iehu ma ona hoko. Ko Iehu nae havali i mua o te kau hoko, ma kua tumu foki nā loto o te kau hoko i te popole lahi; ko nā tino nae mulimuli atu i o lātou tua kua mātataku foki. Oi na toe fakamāopōpo mai ai e Iehu ona hoko e toka hefulu lua, ma na tautala ai e uiga ki nā mea ka pa ia ki ei. 33Na lea vēnei atu, “Kikila, ko kitātou e olo ki Ieluhalema. Ko kinā ka tukulima atu ai te Ataliki o te Tagata ki te pule a nā ohitāulaga pule ma nā faiākoga o te Tūlāfono. Ka kilātou fakahalagia ia i te oti, ma tukulima atu ki tagata nukukehe, 34ma ka fakatauemu kilātou kia te ia ma tūfeanu ki ei ma kini, ma tāmate ai e kilātou; ma ka toe fakatū mai ai ia i te oti, i tona tolu o aho.”
Ko te Fakatagi a Iakopo ma Ioane
(Mat 20.20-28)
35Oi na ōmamai ai ia Iakopo ma Ioane nā ataliki o Hepetaio kia Iehu, kua lea vē mai kia te ia, “Te Faiākoga, e iei te mea e fofou kimāua, ke fai e koe mo kimāua.”
36Na lea atu ia Iehu, “Ko heā?”
37Na tali mai kilāua, “Kāfai koe e nofo i te nofoāliki i te mamalu o tō Mālō, fakanonofo kō kimāua fakatahi ma koe, ko tētahi i tō itū taumatau, ma tētahi i tō itū tauagavale.”
38Kae kua vāgana atu ia Iehu kia te kilāua, “E hē koulua iloa te mea tēnā e lea mai ai koulua. E koulua mafaia moni oi inu ki te ipu o nā puapuagā e tatau ke inu au ki ei? E mafai nei koulua ke papatiho i te itūkāiga papatihoga ka papatiho ai au?”#Luk 12.50
39Na tali mai kilāua, “E ki mā mafaia.”
Oi na vāgana atu ai ia Iehu kia te kilāua, “Ko te ipu e inu ai au ka inu ai koulua, ma ko te papatihoga e papatiho ai au ka papatiho ai koulua. 40Kae e hē ia te au te pule e filifili ai pe ko ai te ka nofo i toku itū taumatau ma toku itū tauagavale. Ko te Atua lava ia te ka ia fōkia nā nofoaga iēnei mo kilātou kua ia filifilia ke nonofo ai.”
41I te lagonaga e iētahi hoko e toka hefulu e uiga ki te mea tēnei, oi na feita lahi lele ai kia Iakopo ma Ioane. 42Ma na fakamāopōpo uma mai ai e Iehu ona hoko ma na lea vē atu ai kia te kilātou, “E koutou iloa, ko nā tino e takua ni tupu i nā mālō o tagata nukukehe, e pūlea fakamālohi e kilātou ia tagata, ma ko o lātou takitaki e kātoatoa te lātou pule. #Luk 22.25-26 43Kae ko koutou e hē vēnā; ko ai lava o koutou e fia kavea ma pule, e tatau te tino tēnā ke fai ma kaukauna ki iētahi o koutou; #Mat 23.11; Mlk 9.35; Luk 22.26 44ma ko ai lava o koutou e fia kavea ma muamua, e tatau te tino tēnā ke fai ma tāvini a koutou uma. 45Auā e pa foki lava ki te Ataliki o te Tagata e hēki hau ke kaukauna ake ia tagata kia te ia, kae na hau ke kaukauna ki tagata ma tuku atu tona ola ke togiola ai ia tagata e tokalahi.”
Kua Fakamālōlō e Iehu te Tāuaho ko Patimaio
(Mat 20.29-34; Luk 18.35-43)
46Kua tau atu kilātou ki Ieliko, ma i te taimi ka toe olo kehe ai ia Iehu ma ona hoko ma he kaifenua tokalahi, nae nofo mai i tafa o te auala he tāuaho ko tana māhani ko te kaitagōgō ki tagata e kui ake i te auala. Ko tona igoa ko Patimaio te ataliki o Timaio. 47I te ia lagona atuga ko Iehu te Nahaleta e kui ake i te auala, oi na kāmata loa kua taufōlua vē, “Iehu! Te Ataliki o Tavita! Alofa mai kō kia te au!”
48E tokalahi nā tino kua mumuna ki te tāuaho ma lea ki ei ke nahe piha. Kae na ātili ai te tau kalaga leo lahi vē atu, “Te Ataliki o Tavita, alofa mai kō kia te au!”
49Oi na tū ai ia Iehu ma na lea vē atu ai ki nā hoko o ia, “Kalaga ki te tāuaho ke hau.”
Na kālalaga ai kilātou ki te tāuaho, kua lea vē atu, “Fakamākeke! Tū ki luga, ko Iehu e lea atu ko koe ke hau.”
50Oi na togi kehe ai loa tona kofuloloa, kua tū ake ki luga, ma na fano ai kia Iehu.
51Kua fehili atu ia Iehu, “Heā te fofou koe ke kō faia mo koe?”
Na tali mai ia, “Te Faiākoga, ko au e fofou ke toe pupula nā mata o oku.”
52Oi na vāgana atu ai ia Iehu kia te ia, “Fano, ko tō fakatuatua kua mālōlō ai koe.”
Ko te taimi lava tēnā na mafai ai ke kitea e ona mata, ma na mulimuli ai kia Iehu i luga o te auala.
Currently Selected:
Maleko 10: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
