Maleko 3
3
Ko te Tamāloa e Mate te Lima
(Mat 12.9-14; Luk 6.6-11)
1Oi na toe liliu ai ia Iehu ki te hūnako, nae iei ai he tamāloa nae mate tona lima. 2Nae i kinā ai foki ma ni tino nae taumafai ke kilātou mōlia ia Iehu i hana holitūlāfono; oi nae tautuku ai lava e kilātou pe i na fakamālōlō e ia te tamāloa i te Hāpati. 3Kua vāgana atu ia Iehu ki te tamāloa, “Hau ki mua i kinei.” 4Oi na fehili atu ai ia Iehu ki nā tino, “Heā te fakataga i te tātou Tūlāfono ke fai i te Hāpati? Ko te fai o he mea ke fakahao ai he ola, pe ke fakauma ai?”
Kae kua hēai he tino o kilātou na vaivaia. 5Kua fakaholo atu tana kikila kia te kilātou i tona loto tīgā, kae kua ia lagona foki te alofa ona ko te hehē ma te makaka o nā loto o kilātou. Oi na vāgana atu ai ki te tamāloa, “Fakahako atu tō lima.” Kua fakahako te lima o te tamāloa, ma na toe lelei ai. 6Oi na olo ai te kau Falehaio ki fafo, kua taupulepule vave ma ni tino o te vāega e kau kia Helota, ki he faiga ke tāmate ai ia Iehu.
Ko te Kaifenua i Tafa o te Vaitūloto
7Kua olo ia Iehu ma ona hoko ki tafa o te vaitūloto ko Kalilaia, ma na mulimuli atu ai kia te ia he kaifenua tokalahi. Na ōmamai mai Kalilaia ma Iutea, 8mai Ieluhalema, mai te kogāfenua o Itumaia, mai te kogāfenua i te itū ki hahae o te Iolitana, e vēnā foki ma nā kogāfenua e tafapili ki nā kakai ko Tulo ma Haitonu. Kua ōmamai uma kilātou kia Iehu i te kilātou lagonaga o te tala e uiga ki nā mea kua fai e ia. 9Ona ko te tokalahi o te kaifenua, na lea ai ia Iehu ki nā hoko o ia ke hāuni he vaka nā ia ia e komahia e tagata.#Mlk 4.1; Luk 5.1-3 10E tokalahi nā tino na fakamālōlō e ia, ma ko te ala foki ia na fakatau tūfēke ai nā tino tauale uma, kae ke mafai oi paki atu o lātou lima kia te ia. 11Ko taimi uma lava e kitea atu ai ia Iehu e nā tino nae ulufia e nā agaga kino, nae fakapakukū ki lalo i mua o ia ma taufōlua vē atu, “Ko koe ko te Ataliki o te Atua!”
12Kae kua fakatonu mālohi atu e Iehu nā agaga kino ke nahe kilātou takua ki he tino pe ko ai ia.
Kua Filifili e Iehu nā Apohitolo e toka Hefululua
(Mat 10.1-4; Luk 6.12-16)
13Oi na fanake ia Iehu ki luga o he mauga, ma na kalaga atu ai ki nā tino na fofou ia ki ei. Kua ōmamai kilātou kia te ia, 14ma na filifili ai e ia he toka hefulu lua na fakaigoa e ia ni apohitolo. Ma na vāgana atu ai kia te kilātou, “Kua kō filifilia koutou ke fakatahi ma au, ma ka kō uga atua foki koutou ke tālaki te Tala Lelei, 15ma ka ia te koutou foki te pule e tuli ai ki fafo nā tēmoni.”
16Ko nā tino iēnei e toka hefulu lua na ia filifilia: ko Himona (na fakaigoa e Iehu kia Petelu); 17ko Iakopo ma Ioane tona uho, nā ataliki o Hepetaio (na fakaigoa kilāua e Iehu kia Poaneke, ko tona uiga “nā ataliki o tāgulu”); 18ko Anitelea, ko Filipo, ko Patolomaio, ko Mataio, ko Toma, ko Iakopo te Ataliki o Alefaio, ko Tataio, ko Himona te Lotonuku, 19ma Iuta te Ihikaliota, tē na fakalata e ia ia Iehu.
Ko Iehu ma Pelehepulo
(Mat 12.22-32; Luk 11.14-23; 12.10)
20Oi na fano ai ia Iehu ki tona kāiga. Ka kua toe tumu atu foki ki ei he kaifenua e tokalahi, ma kua hē maua ai he avanoa o ia ma ona hoko ke kakai ai. 21I te lagonaga e nā tino o tona kāiga te mea tēnei, oi na olo ai oi tau fai ke kave kehe mai ia Iehu, ona nae lea vē nā tino, “Ko Iehu kua hē lelei tona māfaufau.”
22Ko iētahi faiākoga o te Tūlāfono na ōifo mai Ieluhalema kua lea vē, “Ko te tagata tēnei e ulufia e Pelehepulo. Ko te takitaki o nā tēmoni te ia fōkia kia te ia te pule ke tuli ai ki fafo nā tēmoni.” #Mat 9.34; 10.25
23Oi na kalaga atu ai ia Iehu ki nā faiākoga o te Tūlāfono ke ōake kia te ia, ma na tautala ai kia te kilātou e ala i ni talafakatuha: “E tuli vēhea ake ki fafo ia Hatani e Hatani? 24Kāfai he mālō e fevaevaeaki ma tauai miha lava kilātou, ko te mālō tēnā ka mālepelepe. 25Kāfai he kāiga e fevaevaeaki ma tauai miha lava kilātou, ko te kāiga tēnā ka mālepelepe. 26Kāfai la te mālō o Hatani e fevaevaeaki, e hē mafai ke tūmau kae ka mālepelepe ma uma ai lava.
27“E hē mafai he tino ke fano ki loto o te fale o he tamāloa mākeke ke kaihohoa ana mea, heiloga e mua noanoa e ia te tamāloa mākeke, oi fātoā ia mafaia ai oi kaihohoa nā mea uma i tona fale.
28“E takutino atu e au kia te koutou, ko nā agahala uma a tagata e mafai ke fakamāgalo ma vēnā ni kupu fāifai e tautatala ai kilātou.#3.28 kupu fāifai e tautatala ai kilātou pe kupu kino e fai āgai ki te Atua 29Kae ko ai lava e fāifai ki te Agaga Paia, ka hē mafai lele ke fakamāgaloa, auā kua ia faia te agahala e hē mafai ke fakamāgaloa ke pa ki te fakavavau.” #Luk 12.10 30(Na lea vēnā atu ia Iehu, ona nae iei nā tino nae lea vē, “Ko Iehu e ulufia e he agaga kino.”)
Ko te Mātua ma nā Taina o Iehu
(Mat 12.46-50; Luk 8.19-21)
31Oi na papā mai ai te mātua ma nā uho o Iehu. Kua tutū atu i fafo ma kave te lātou faifekau kia Iehu ke fanake. 32Kua lea vē atu te kaifenua nae nonofo fakatakamilo ia Iehu, “Kikila, ko te mātua ma nā uho o koe e i fafo, e fofou mai kia te koe.”
33Kua tali mai ia Iehu, “Ko ai toku mātua? Ko ai oku uho?” 34Na fakaholo atu tana kikila ki nā tino nae laupae mai i ona tafa, oi na vē atu ai tana kupu, “Kikila, iēnei oku mātua ma oku uho! 35Ko ai lava e faia te finagalo o te Atua, ko toku uho tēnā, ko toku tuafafine tēnā, ma toku mātua tēnā.”
Currently Selected:
Maleko 3: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
