Maleko 2
2
Kua Fakamālōlō e Iehu he Tamāloa e Mate te Tino Kātoa
(Mat 9.1-8; Luk 5.17-26)
1Kua teka atu ni aho, oi na toe foki ai ia Iehu ki Kapenaumi, ma kua halalau foki te tala ko Iehu kua i tona kāiga. 2Oi na ōmamai ai nā tino e tokalahi kia te ia, ma kua hē ofi ia loto o te fale, ke pa lava ki fafo o te faitotoka. Ka koi folafola atu e Iehu te Tala Lelei kia te kilātou, 3kae papā mai ni tamāloa e toka fa nae hiki mai e kilātou kia Iehu, he tamāloa nae mate tona tino kātoa. 4Kae ona ko te tumu o te kaifenua, na hē mafai ai ke hao atu te tauale kia Iehu. Oi na fakapū ai e kilātou te tuāfale o te fale, i luga tonu lava o te mea nae iei ai ia Iehu. Kua uma te fakapū, oi na tukutuku ifo ai e kilātou te tamāloa ki lalo, e takoto i luga o tona moega. 5I te kiteaga e Iehu te lahi o to lātou fakatuatua, oi na vāgana atu ai ki te tamāloa nae mate tona tino kātoa, “Toku ataliki, ko au agahala kua fakamāgalo.”
6Ko iētahi faiākoga o te Tūlāfono nae i kinā, kua vē ifo i o lātou loto, 7“E mafai vēhea e te tino tēnei oi tautala vēia? Ko te fāifai moni lava tēnei! Nā ko te Atua oioti lava te ia mafaia oi fakamāgalo nā agahala!”
8Na iloa vave lele e Iehu nā mea i o lātou māfaufau, ma na vāgana atu ai ki ei, “Heā te māfaufau ai koutou ki ni mea vēnā? 9Tēfea te mea e faigōfie, ko toku lea ki te tino e mate te tino kātoa, ‘Ko au agahala kua fakamāgalo,’ pe ko toku lea ki ei, ‘Tū ki luga, hiki tō moega, ma havali?’ 10Ka kō fakamāonia atu la kia te koutou, e i te Ataliki o te Tagata te pule i te lalolagi, ke fakamāgalo ai nā agahala.” Oi na lea atu ai ki te tamāloa e mate tona tino kātoa, 11“Ko au e lea atu kia te koe, tū ki luga, hiki tō moega, ma fano ki tō kāiga!”
12Ka koi kikila atu kilātou, ka kua tū te tamāloa ki luga, kua hiki ake tona moega ma na fano kehe vave ai. Na taufai ofo lele kilātou uma ma na viviki ake ai kilātou ki te Atua ma lea vē, “E hēki kimātou kiteagia lele he mea vēnei!”
Kua Kalaga ia Iehu kia Levi
(Mat 9.9-13; Luk 5.27-32)
13Kua toe fano ia Iehu ki te matāfaga o te Vaitūloto ko Kalilaia. E tokalahi nā tino na ōmamai kia te ia, oi na akoako atu ai e ia kilātou. 14Koi havali atu ia Iehu, kae ia kitea atu he aolāfoga, ko Levi te Ataliki o Alefaio, nae nofo mai i loto o tona ōfiha. Kua vāgana atu ia Iehu ki ei, “Mulimuli mai kia te au.” Oi na tū ai ki luga ia Levi kua mulimuli kia Iehu.
15I he taimi mulimuli ake, na fai ai te katiga a Iehu i te fale o Levi.#2.15 i te fale o Levi pe i tona fale (fale o Iehu) E tokalahi nā aolāfoga ma iētahi tino inohia nae mulimuli kia Iehu, ma e tokalahi kilātou iēnei na kakai fakatahi ma ia ma ona hoko i te laulau. 16Ko iētahi faiākoga o te Tūlāfono, ni Falehaio, kua kilātou kitea atu ia Iehu e kakai fakatahi ma nā aolāfoga vēnā ma nā tino inohia, oi na fehili vē atu ai ki ona hoko, “Heā te kakai fakatahi ai ia Iehu ma nā tino iēia?”
17Na lagona atu kilātou e Iehu oi na tali vē atu ai, “Ko nā tino mālōlō, e hē kilātou manakomia he fōmai, kae vaganā ai nā tino e tauāle. Ko au e hēki hau ke kalaga ki nā tino fakaaloalogia, kae ki nā tino e inohia e tagata.”
Ko te Fehili e Uiga ki te Fakalāina
(Mat 9.14-17; Luk 5.33-39)
18I tētahi aho nae fakalāina ai nā hoko o Ioane ma nā hoko o te kau Falehaio. Oi na ōmamai ai nā tino kua lea vē mai kia Iehu, “Heā te fakalāina ai nā hoko o Ioane te Papatiho, ma nā hoko o te kau Falehaio, kae ko nā hoko o koe e hē fakalāina?”
19Na tali atu ia Iehu kia te kilātou, “E mafai te kau valakaulia i he fakaipoipoga ke fakalāina ka koi fakatahi kilātou ma te tama fakaipoipo? Kāfai te tama fakaipoipo e fakatahi pea lava ma kilātou, e hē kilātou faia he mea vēnā. 20Kae e hau te aho e kave kehe ai te tama fakaipoipo mai ia te kilātou, oi fātoā fakalāina ai kilātou.
21“E hēai he tino e fakaaogā e ia he meakie fōu ke fono ai he kofu tuai, auā ka mimigi te meakie fōu ma matala kehe mai te meakie tuai, ma ātili ai te lahi o te gahae. 22E hē utua foki e he tino he uaina fōu, ki loto o ni fagu pakumanu tuai, auā ka gāpāpā nā fagu pakumanu, ma gogolo ki fafo te uaina, ma ka fakakino ai nā fagu pakumanu. Kae ko te uaina fōu, e tatau ke utu ki loto o nā fagu pakumanu fōu.”
Ko te Fehili e Uiga ki te Hāpati
(Mat 12.1-8; Luk 6.1-5)
23I tētahi aho Hāpati, ko Iehu ma nā hoko o ia nae hāvavali kuiloto o he togā haito. Ka koi hāvavali atu kilātou i kinā kae kua kāmata oi tau e ona hoko nā uluhaito. #Teu 23.25 24Oi na lea atu ai nā Falehaio kia Iehu, “Kikila, e fakahā i te tātou Tūlāfono, ke fai e nā hoko o koe te mea tēnā i te Hāpati!”
25Na tali mai ia Iehu, “E hēki faitau nei koutou ki te mea a Tavita na fai, i te fia mauaga e ia o he mea ke kai? Ko ia ma kilātou nae fakatahi ma ia nae fia kakaia, #1 Ham 21.1-6 26oi na fano ai ki loto o te fale o te Atua, i nā aho o Apiata te Ulu Ohitāulaga, ma kai nā falaoa kua uma te fakapaia mo te Atua. E fakahā i te tātou Tūlāfono ke kai ki ei he tino vāganā nā ohitāulaga, ma na ia fōkia foki ki nā tino nae fakatahi ma ia.”#Lev 24.9
27Na toe vāgana atu ia Iehu kia te kilātou, “Ko te Hāpati na fai mo te lelei o te tagata, kae e hēki faia te tagata mo te Hāpati. 28Ko te mea ia, ko te Ataliki o te Tagata, ko te pule foki ia o te Hāpati.”
Currently Selected:
Maleko 2: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
