Maleko 1
1
Ko te Tālakiga a Ioane te Papatiho
(Mat 3.1-12; Luk 3.1-18; Ioa 1.19-28)
1Ko tēnei te kāmataga o te Tala Lelei kia Iehu Keliho te Ataliki o te Atua.#1.1 Ko iētahi tuhituhiga e hē i loto ai te Ataliki o te Atua 2E vēia oi tūhia e te pelofeta ko Ihaia:
“Na vāgana te Atua,
‘Kikila, ka uga atu e au taku kavefekau
ke muamua atu ia te koe,
ke ia hāunia te auala mo koe.’ #Mal 3.1
3Ko te leo o he tino e taukalaga i te vao;
‘Hāuni te auala o te Aliki;
fakahakohako ona ala!’ ” #Iha 40.3 (LXX)
4Na kitea foki ia Ioane i te vao, e fai tana papatihoga ma tana tālakiga,#1.4 Ioane i te vao, e fai tana papatihoga ma tana tālakiga ko iētahi tuhituhiga e leamai Ioane te Papatiho i te vao, e fai tana tālakiga nae lea vē atu, “Liliu kehe mai autou agahala ma papatihogia ke iloa ai ko koutou kua halamō moni, oi fakamāgalo ai e te Atua autou agahala.” 5E tokalahi nā tino kua lolofi atu kia te ia mai nā itūmālō uma o Iutea, vēnā foki ma nā tino uma o Ieluhalema. Kua tōlaulau atu a lātou agahala, ma na papatiho ai kilātou e ia, i loto o te vaitafe ko te Iolitana.
6Nae kofu ia Ioane i nā kofu na fai i nā fulufulu kāmela, ma he fuhi pakumanu i tona taugātiti, ma ko ana meakai ko te hē-akelihe ma te melivao. #2 Tup 1.8 7Na folafola vēnei atu e ia ki tagata, “E mulimuli mai ia te au he tino e hili atu lele ia i lo au. E hē aogā au ke punou ifo ki lalo oi tatala ona hēvae. 8E kō papatihoa koutou i te vai, kae ka ia papatihoa koutou i te Agaga Paia.”
Ko te Papatihoga ma nā Fakaohōhoga o Iehu
(Mat 3.13—4.11; Luk 3.21-22; 4.1-13)
9E hēki mataloa, oi na fanaifo ai ia Iehu mai Nahaleta i Kalilaia, ma na papatiho ai e Ioane i te vaitafe ko te Iolitana. 10Ka koi fanake ia Iehu ki luga mai te vai, na ia kitea atu ai te lagi kua matala ma te Agaga kua fanaifo ki ona luga e vē he lupe. 11Ma he leo na fanaifo mai te lagi, “Ko koe ko toku Ataliki pele, e fiafia lahi au kia te koe.” #Ken 22.2; Hal 2.7; Iha 42.1; Mat 3.17; 12.18; Mlk 9.7; Luk 3.22
12I te taimi lava tēnā na tataki ai ia Iehu e te Agaga ki te vao, 13ma na nofo ai i te vao i nā aho e fagafulu, ma i kinā na fakaohōho ai e Hatani. Nae iei foki nā manu fekai nae i kinā, kae ko Iehu na tauhi e nā āgelu.
Kua Kalaga ia Iehu ki nā Tautai e Toka Fa
(Mat 4.12-22; Luk 4.14, 15; 5.1-11)
14Kua i te falepuipui ia Ioane, oi na fano ai ia Iehu ki Kalilaia kua tālaki atu te Tala Lelei mai te Atua. 15Na vāgana vē atu, “Ko te taimi tatau kua pa mai, ma ko te Mālō o te Atua kua tafapili mai; liliu kehe mai autou agahala ma talitonu ki te Tala Lelei!”
16Ka koi havali atu ia Iehu i tafa o te Vaitūloto ko Kalilaia, kae ia kitea atu ia Himona ma tona uho ko Anitelea, nae togi to lā kupega i te vai; auā ko kilāua ni tino faifaiva. 17Oi na vāgana atu ai ia Iehu kia te kilāua, “Mulimuli mai kia te au, oi fakaako atu ai koulua e au ke fai ma tino faifaiva, ke maua ai ia tagata.” 18I te taimi lava tēnā, na tuku ai o lā kupega, kae kua mulimuli kia Iehu.
19Kua hēleka mālie atu ia Iehu ki mua, oi na ia kitea atu ai hētahi kau uho e toka lua, ko Iakopo te ataliki o Hepetaio ma Ioane tona uho, nae i luga o to lātou vaka e fonofono o lātou kupega. 20Oi na kalaga atu ai ia Iehu ki ei ke ōmamai; na tuku ai loa e kilāua to lā tamana ko Hepetaio ma te kau faifaiva i luga o te vaka, kae kua mulimuli kia Iehu.
He Tamāloa nae Ulufia e he Agaga Kino
(Luk 4.31-37)
21Kua taunuku atu ia Iehu ma ona hoko ki Kapenaumi, ma i te Hāpati na hohoko ai, na fano ai ia Iehu ki te hūnako ma akoako atu ki tagata. 22Na ofo lele kilātou ki te faiga o ana akoakoga, ona nae vē ko he tino kua ia te ia te pule, kae kua he vē ko nā faiākoga o te Tūlāfono.#Mat 7.28-29
23I te taimi lava tēnā na ulu mai ai ki loto o te hūnako he tamāloa nae ulufia e he agaga kino ma nae taufōlua vē, 24“Iehu te Nahaleta, heā kō ta koe e fai mai kia te kimātou? Ko koe kua hau ke fakatāugā kimātou? E kō iloa koe—ko koe ko te Tokatahi Paia a te Atua!”
25Kae kua muna atu ki ei ia Iehu, kua lea vē atu, “Te piha kae hau loa ki fafo o te tino tēnā!”
26Na fakatete ai loa e te agaga kino te fuaitino o te tamāloa ma na taukekē leo lahi lele ai, oi na fano ai ki fafo. 27Na ofo lele ia tagata uma ma kāmata ai kua fakataufai ma lea vē tētahi ki tētahi, “Heā tēnei? He akoakoga fōu nei? E pa foki ki nā agaga kino e ia fakatonua, oi e uhitaki foki lava kilātou kia te ia!”
28Oi na halalau vave ai te tala kia Iehu, ki nā pitonuku uma lele o Kalilaia.
Kua Fakamālōlō e Iehu nā Tino e Tokalahi
(Mat 8.14-17; Luk 4.38-41)
29Kua olo kehe ia Iehu ma ona hoko mai te hūnako, nae iei ai foki ia Iakopo ma Ioane, ma na olo hako ai ki te fale o Himona ma Anitelea. 30Ko te mātua o te āvaga a Himona nae takoto, e tauale i te fiva. Na pa atu lava ia Iehu ki te fale, oi na taku ai loa ki ei te tauale tēnei. 31Oi na fano ai ia Iehu kua tago ki te lima o te mātua ma fakanofo ki luga. Oi na teka ai te fiva o te mātua, ma na fano ai oi laulau te lātou meakai.
32I te afiafipō kua goto te lā, na kaumai ai e kilātou kia Iehu nā tauale uma lele ma nā tino nae ulufia e ni tēmoni. 33Ko nā tino uma lele o te kakai kua fakapotopoto i mua o te fale. 34Na fakamālōlō e Iehu nā tino e tokalahi nae maua i nā itūkāiga tauale kehekehe, ma tuli ki fafo nā tēmoni e tokalahi. Na hēki fakataga e ia nā tēmoni ke tautatala, auā na iloa e kilātou ko ia ko Iehu.
Kua Tālaki e Iehu te Tala Lelei i Kalilaia
(Luk 4.42-44)
35I te tāeaopōpō o te aho alafaki ka ko hēki matea he tino, na fano ai ia Iehu ki he koga nae hēai ni tino nae nonofo ai i fafo o te kakai, ma na tatalo ai i kinā. 36Ka ko Himona ma ona hoa, kua olo oi hakili pe kua i fea, ma 37i te mauaga o ia e kilātou, oi na lea vē atu ai kilātou ki ei, “Ko koe e hakili e tagata.”
38Kae na tali mai ia Iehu, “Ko kitātou e tatau ke olo ki iētahi kakai e pili mai. E tatau au ke tālaki atu foki i kinā, auā ko te pogai ia na hau ai au.”
39Oi na malaga atu ai ia Iehu ki nā koga uma o Kalilaia ma folafola atu te Tala Lelei i loto o nā hūnako, ma tuli ki fafo nā tēmoni. #Mat 4.23; 9.35
Kua Fakamālōlō e Iehu he Lēpela
(Mat 8.1-4; Luk 5.12-16)
40Na hau ai he tino nae maua i te lēpela kia Iehu, kua tōtuli i mua o ia ma fakatagi ki ei mo he fehoahoani. Kua lea vē mai ia kia Iehu, “Kāfai koe e loto ki ei, e kē mafaia oi fakamamā#1.40 fakamamā Ko te tino e maua i te tauale tēnei, e hē mafai ke fakatahi ki nā tāpuakiga ona e takua e hē mamā au.”
41Na tumu lele ia Iehu i te alofa,#1.41 alofa ko iētahi tuhituhiga e lea mai ita oi na papae atu ai kua paki atu tona lima ki te lēpela ma lea vē atu ki ei, “Ko au e loto ki ei. Mamā loa!” 42Ma ko te taimi lava tēnā na teka ai te lēpela mai ia te ia, ma kua mamā ai. 43Na tautala mālohi ia Iehu kia te ia, oi na uga ai ke fano i te taimi lava tēnā, 44ka kua uma ai te lea vē ki ei, “Fakalogo mai koe! Ko koe e hē lea lele ki he tino, kae fano oi fakaali tō tino ki he ohitāulaga, ma ofo atu ai he tāulaga mo te fakamamāgia o koe, e vē ona fakatonu mai e Mohe, ke fai ma fakamāoniga ki tagata ko koe kua mamā.”#Lev 14.1-32
45Kae kua fano te tino kua kāmata tālaki valevale te tala. Ko te mea ia na hē mafai ai ia Iehu ke fano ki he kakai, ka kua fano oi nofo i nā mea nae hēai ai ni tino. Kae nae hē uma ai te holo mai o tagata kia te ia, mai nā koga kehekehe.
Currently Selected:
Maleko 1: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
