Maleko 15
15
Ko Iehu i Mua o Pilato
(Mat 27.1, 2, 11-14; Luk 23.1-5; Ioa 18.28-38)
1I te tāeaopō o te aho na hohoko ai na fono fakavave ai nā ohitāulaga pule ma nā toeaina, nā faiākoga o te Tūlāfono, ma te Taupulega kātoa, ma na fakatonu ai e kilātou ke noanoa ia Iehu ma takitaki kehe mai kinā, ma ke tukulima atu kia Pilato ke fakamahino e ia. 2Na fehili atu ia Pilato kia Iehu, “Ko koe moni ko te tupu o tagata Iutaia?”
Na tali mai ia Iehu, “Ko tēnā lava e lea ai koe.”
3E lahi nā mea na mōlia ai ia Iehu e nā ohitāulaga pule, 4ko te mea ia na toe fehili ai ia Pilato kia Iehu, “E hēai lele hau tali e fai mai? Fakalogo atu ake ki te lahi o nā mea kua mōlia ai koe e kilātou!”
5Kae na muhu ia Iehu ke toe tali atu ki ei, ma na kavea tēnā ma mea na ofo lele ai ia Pilato.
Kua Fakahala ia Iehu i te Oti
(Mat 27.15-26; Luk 23.13-25; Ioa 18.39—19.16)
6Nae iei te faiga nae māhani ai lava ia Pilato i te taimi o te Kaiga Fakamanatu o te Pāheka, nae tatala e ia ho he pāgotā e fokotahi, e fofou ia tagata ke fakahaoloto e ia. 7I te taimi tēnā nae i te falepuipui ai he tino nae igoa kia Palapa, fakatahi ai ma ni tino o he kāuga na tāmatea ni tino i he vevehitū. 8Kua potopoto ia tagata ma na kāmata ai oi talohaga atu kilātou kia Pilato ki te pāgotā e fofou kilātou ke fakahaoloto, 9ma na fehili atu ai ia Pilato kia te kilātou, “E fofou koutou ke tatala atu e au kia te koutou te tupu o tagata Iutaia?” 10Auā na ia iloa lelei lava ko te loto kino o nā ohitāulaga pule, te na kilātou kavakea ai ia Iehu kia te ia.
11Kae na fakaoho e nā ohitāulaga pule te kaifenua, ke lea kia Pilato ke tatala ake ia Palapa kia te kilātou. 12Kua toe lea atu ia Pilato ki te kaifenua, “Heā la te fofou koutou ke kō faia ki te tino e lea koutou ko te tupu o tagata Iutaia?”
13Oi na taukālalaga mai ai kilātou, “Fakahātaulo te tino tēnā!”
14Kae kua fehili atu ia Pilato, “Aiheā, ko he holitūlāfono ā ta ia na fai?”
Kae kua fakaātili ai te taukālalaga leo lahi o kilātou, “Fakahātaulo te tino tēnā!”
15Ko Pilato na fofou ke fakafiafia te kaifenua, oi na tatala ai e ia ia Palapa kia te kilātou. Kae kua fakatonu e ia ke kini ia Iehu ma tuku atu ai loa ke fakahātaulo.
Kua Fakatauemu nā Fitafita kia Iehu
(Mat 27.27-31; Ioa 19.2, 3)
16Oi na kave ai ia Iehu e nā fitafita ki loto o te lōtoā o te fale o te kōvana, ma na fakamāopōpo mai ai e kilātou iētahi fitafita uma o te lātou vāega. 17Na fakakofu ai e kilātou ia Iehu i he kofuloloa lanu violē, ma tuku he pale na fai i ni lālā o he lākau tālatala, ki tona ulu. 18Oi na kāmata ai kua fai a lātou kupu fakatāfafai kia Iehu, kua lea vē atu kilātou, “Ke manuia te Tupu o tagata Iutaia!” 19Kua kini e kilātou ia Iehu i he mealākau ki tona ulu, kua tūfeanu kia te ia, ma na tōtutuli ai ki lalo ma ifo atu kia te ia. 20Kua uma te fakatauemu o kilātou kia Iehu, oi na toe ui kehe ai e kilātou te kofuloloa lanu violē, kae kua toe fakakofu lava i nā kofu o ia. Oi na takitaki ai e kilātou ki fafo ke fakahātaulo.
Kua Fakahātaulo ia Iehu
(Mat 27.32-44; Luk 23.26-43; Ioa 19.17-27)
21I to lātou auala, na fetaui ai ma he tamāloa nae igoa kia Himona, nae āgai mai ki te kakai mai nā nuku i tua, oi na fakamālohia ai e nā fitafita ia Himona ke amo e ia te hātaulo o Iehu. (Ko Himona na hau mai Kulene, ma ko te tamana ia o Alehana ma Lufo.) #Lom 16.13 22Na kave e kilātou ia Iehu ki te koga nae takua ko Kolokota, ko te uiga o te igoa tēnei ko te, “Koga o te Ulupoko.” 23I kinā na taumafai ai kilātou ke fōki kia Iehu he uaina na palu ki ei te vai na fai i te mulo, kae na hēki inu ki ei. 24Oi na fakahātaulo ai e kilātou ia Iehu, ma na fai ai te lātou vili ke iloa ai te meakofu o Iehu e maua e te tino, ma na tufatufa ai vēnā e kilātou nā kofu o Iehu. #Hal 22.18 25Ko te iva i te tāeao te na fakahātaulo ai e kilātou ia Iehu. 26Ko te fakakupuga o nā mōliaga o ia, e vēnei, “Ko te Tupu o Tagata Iutaia.” 27Na kilātou fakahātauloa foki ni tino kaihohoa e toka lua fakatahi ma Iehu, ko tētahi i tona itū taumatau ma tētahi i tona itū tauagavale. 28#15.28 Ko iētahi tuhituhiga e fakaopōpo ki ei te fakakupuga 28: Kua taunuku ai te tuhi e leamai, “Kua fakahala fakatahi ia ma tagata holi tūlāfono” (Kikila ki te Luk 22.37) #Iha 53.12
29Ko nā tino na kui ake i kinā na lūlū o lātou ulu ma fai a lātou kupu fakatauemu kia Iehu. Na lea vē atu kilātou, “Ko koe tēnā na lea e kē talepea ki lalo te Mālumalu oi toe fakatū ai i nā aho e tolu! #Hal 22.7; 109.25; Mlk 14.58; Ioa 2.19 30Fanaifo la ki lalo mai te hātaulo ma fakaola lava koe e koe!”
31Na vēnā foki oi fakatauemu nā ohitāulaga pule ma nā faiākoga o te Tūlāfono kia Iehu. Kua vē atu tētahi ki tētahi, “Na fakaola e ia iētahi tino, ka ko tēia e hē ia mafaia oi fakaola ia ia lava! 32Tātou kikila la ki te Mehia, te tupu o Ihalaelu, ke fanaifo ki lalo o te hātaulo i te taimi nei, kae ke talitonu ai kitātou kia te ia!”
Na vēnā foki oi fakatauemu kia Iehu te toka lua na fakahātaulo fakatahi ma ia.
Ko te Mate o Iehu
(Mat 27.45-56; Luk 23.44-49; Ioa 19.28-30)
33Kua ta te itūlā e hefulu lua i te aoauli, oi na pōulitia ai te fenua kātoa ke pa ki te tolu i te afiafi. 34I te tolu i te afiafi, na kalaga leo lahi ai ia Iehu, “Eloi, Eloi, lama hapatani?” ko tona uiga, “Toku Atua, toku Atua, heā te kua kē tīakia ai au?” #Hal 22.1
35Ko iētahi tino nae i kinā, na kilātou lagona atu ana kupu na kalaga ai ma na lea vē ai, “Fakalogo atu ake, ko te tagata nei e taukalaga kia Elia!” 36Oi na vili atu ai hētahi o kilātou ma he oma kua uma te lolō ki he uaina taugōfie; kua tuku e ia ki te pito o he mealākau, ma na hiki ake ai e ia ki nā laugutu o Iehu ma na vē atu tana kupu, “Fakatali! Tātou kikila pe i na hau ia Elia oi tuku ifo ki lalo te tagata tēnei mai te hātaulo!” #Hal 69.21
37Oi na kalaga leo lahi ai ia Iehu, ma na tō ai loa tana mānava.
38Ma na haelua ai te kiepupuni i loto o te Mālumalu, mai luga ke pa ki lalo. #Eho 26.31-33 39Ko te takitakikau o te toka helau nae tū i mua o te hātaulo, na ia kitea te otiga o Iehu,#15.39 otiga o Iehu ko iētahi tuhituhiga e leamai te kalagaga o Iehu, ma i te otiga ma na lea vē ai, “E hako lava, ko te tagata tēnei ko te Ataliki o te Atua!”
40Nae iei nā fafine i kinā nae taukikila mamao atu. Ko iētahi o kilātou iēnei ko Malia te Makatala, ko Halome, ma Malia te mātua o Iakopo tamaiti ma Iohefa.#Luk 8.2-3 41Ko kilātou iēnei nae mulimuli kia Iehu ka koi i Kalilaia ai, ma nae fehoahoani kia te ia. E tokalahi iētahi fafine nae i kinā, na ōmamai fakatahi ma Iehu ki Ieluhalema.
Ko te Tanuga o Iehu
(Mat 27.57-61; Luk 23.50-56; Ioa 19.38-42)
42-43I te afiafipō na taunuku ifo ai ia Iohefa, he tino e hau mai Alimatea. He tino o te Taupulega ma nae fakaaloalogia lele e tagata, ma ko he tino foki nae fakatalitali ma tona amanaki ki te taimi e fakatāunuku ai te pule a te Atua. I te aho tēnei o Tāpenapenaga (te aho e hohoko ki ei te Hāpati), na fano ai ia Iohefa ma te lototele kia Pilato, ke tuku ake te tino o Iehu ke kave e ia. 44Na teki ia Pilato i te ia lagona atuga ko Iehu kua oti, oi na fekau ai e ia te takitakikau o te toka helau ma na fehili ai ki ei pe ko Iehu kua oti. 45I te ia iloaga mai te lipoti a te takitakikau o te toka helau ko Iehu kua oti, oi na fakataga ai e Pilato ke kave te tino o Iehu e Iohefa. 46Na fakatau mai e Iohefa he kie lino, oi na tuku ifo ai te tino o Iehu ki lalo mai te hātaulo; kua āfīfī e ia i te kie lino, ma na tuku ai ki loto o he tugamau na ia kelia ki loto o he itū mauga papa. Oi na fuli ai e ia he fatupae lahi, kua pupuni ai te gutu o te tugamau. 47Ko Malia te Makatala ma Malia te mātua o Iohefa nae taukikila atu ki ei, ma na kitea e kilāua te mea na teu ai te tino o Iehu.
Currently Selected:
Maleko 15: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
