Maleko 16
16
Ko te Toetū o Iehu
(Mat 28.1-8; Luk 24.1-12; Ioa 20.1-20)
1Kua uma te Hāpati, oi na olo ai ia Malia te Makatala, ko Halome, ma Malia te mātua o Iakopo, kua fakatau mai ni meamanogi ke kave oi uku ai te tino o Iehu. 2Ma i te tāeaopō o te aho muamua o te vaiaho, kua hopo ake te lā, oi na olo ai kilātou ki te tugamau. 3-4Kua lea vē atu tētahi ki tētahi, “Ko ai nei te ka ia fuli kehea te fatupae i te gutu o te tugamau?” (Ko he fatupae lahi lele.) Kae i te taunuku atuga o kilātou, ko te fatupae kua uma te fuli kehe. 5Oi na ulu atu ai kilātou ki loto o te tugamau ma na kilātou kitea atu he taumalo nae nofo i te itū taumatau, ma nae kofu i he kofuloloa paepae; ma na mātataku lele ai kilātou.
6Kae kua leamai ia kia te kilātou, “Koutou nahe mātataku. E iloa e au ko Iehu te Nahaleta tēia na fakahātaulo, te hakili e koutou. E hē i kinei—kua toe tū mai ia i te oti! Kikila ki te mea na tuku e kilātou ki ei tona tino. 7Olo loa oi fai te fekau tēnei ki nā hoko o ia ma Petelu: ‘Ko ia e muamua atu ia te koutou ki Kalilaia; ka koutou kitea ia i kinā, e vē lava ko te mea na lea atu ai ia kia te koutou.’ ” #Mat 26.32; Mlk 14.28
8Oi na olo ai ki fafo nā fafine, kua fetutuli kehe mai te tugamau auā kua maua kilātou i te loto popole ma te atuatuvale. E hēki takua foki e kilātou ki he tino, auā kua mātataku.#16.8 I loto o iētahi tuhituhiga kua leva lele, ko te Mau a Maleko e uiga ki te Tala Lelei, e uma i te fuaikupu e 8. Ka ko iētahi tuhituhiga mulimuli mai, e i loto ai te Fakaikuga Loa (9-20), ma ko iētahi e i loto ai foki ma te Fakaikuga Pukupuku (9-10)
KO TE FAKAIKUGA LOA O MALEKO 16.9-20
Kua Fakakitea ia Iehu kia Malia te Makatala
(Mat 28.9, 10; Ioa 20.11-18)
[9I te toe tū maiga o Iehu mai te oti i te tāeaopō o te aho Hā, na fakakitea muamua ia kia Malia te Makatala, tē na ia tuli kehea mai ai nā tēmoni e toka fitu. 10Oi fano ai ia Malia oi taku ki nā tino nae fakatahi ma Iehu, nae faitatagi i to lātou loto fakanoanoa. 11Kae i te kilātou lagonaga ko Iehu kua toe ola mai, ma na kitea e Malia, na hēki talitonu kilātou ki ei.
Kua Fakakitea ia Iehu ki nā Hoko e Toka Lua
(Luk 24.13-35)
12Kua uma atu te mea tēnā, oi na fakakitea ai ia Iehu i he tūlaga e kehe mai i te fakakiteaga muamua, ki ni hoko e toka lua ka koi hāvavali kehe atu kilāua mai te kakai. 13Na toe liliu te toka lua ki Ieluhalema oi taku ki iētahi o te kau hoko, kae e hēki iei he tino na talitonu kia te kilāua.
Kua Fakakitea ia Iehu ki nā Hoko e toka Hefulutahi.
(Mat 28.16-20; Luk 24.36-49; Ioa 20.19-23; Gāl 1.6-8)
14Mulimuli ake oi na fakakitea ai ia Iehu ki nā hoko e toka hefulu tahi ka koi fai te lātou katiga. Oi na munaia ai e ia kilātou ona ko to lātou hē fakatuatua ma te loto makaka, kua hē talitonu ai ki nā tino na kilātou kiteagia ia talu tona toe tū mai i te oti. 15Ma na vāgana atu ai ia kia te kilātou, “Olo ki nā itū uma o te lalolagi oi tālaki atu te Tala Lelei ki tagata uma.#Gāl 1.8 16Ko ai lava e talitonu ma papatihogia, ka fakaolagia; kae ko ai lava e hē talitonu, ka fakahalagia. 17Ko nā tino kua talitonu ka ia te kilātou te pule ke fai ai nā vāvega; ka kilātou tuli kehea nā tēmoni; ka tautatala i nā gagana kehekehe; 18kāfai e kilātou hikia ki luga nā gata, pe inua ho he meakona, ka hē āfāina kilātou; kāfai e fakauta o lātou lima ki luga o nā tauale, ka mālōlō ai nā tauale.”
Kua Hikitia ake ia Iehu ki te Lagi
(Luk 24.50-53; Gāl 1.9-11)
19Kua uma te vāgana atu o te Aliki ko Iehu kia te kilātou, oi na hikitia ake ai ki te lagi ma kua nofo i te itū taumatau o te Atua.#Gāl 1.9-11 20Ma na olo ai nā hoko oi tālaki atu te Tala Lelei ki nā itū uma o te lalolagi; nae gālulue fakatahi foki kilātou ma te Aliki, ma na fakamāonia te moni o ta lātou tālakiga i nā vāvega nae kilātou faia.]
KO TE FAKAIKUGA PUKUPUKU O MALEKO
[9Kua olo nā fafine kia Petelu ma ona hoa, oi taku ki ei nā mea uma lele na lea ake ai ia Iehu kia te kilātou. 10Kua uma atu te mea tēnei, oi na fakahalalau ai e Iehu, mai hahae ki hihifo, te fekau paia ma te moni e uiga ki te fakaolataga e fakavavau, e ala i nā hoko o ia.]
Currently Selected:
Maleko 16: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
