Maleko 11
11
Kua Ulufale ia Iehu ki Ieluhalema ma te Manumālō
(Mat 21.1-11; Luk 19.28-40; Ioa 12.12-19)
1Ka koi āgai atu kilātou ki Ieluhalema, ma kua pili ki nā kakai ko Petehake ma Petania, na tau atu ai kilātou ki te Mauga o Olive. Oi na uga atu ai e Iehu ni hoko e toka lua ke muamua 2ma te fakatonuga e vēnei, “Olo ki te nuku tēnā i mua atu. Ko te taimi lava e taunuku atu ai koulua ka koulua kitea he punua āhini poa ko hēki tiketike lele ai he tino, e tau i kinā. Tatala te āhini oi kaumai ki kinei. 3Ma kāfai he tino e lea atu, ‘Heā ta koulua e fai?’ oi lea vē ki ei, ‘Ko te Aliki,#11.3 Aliki pe te tino e a ia e fofou mai ki ei, ma e toe fakafoki vave mai lele.’ ”
4Oi na olo ai te toka lua, ma na maua atu e kilāua te punua āhini poa e tau ki te faitotoka o he fale. Ka koi tau tatala e kilāua te āhini, 5kae fehili atu ki ei iētahi tino nae tutū i kinā, “Heā ta koulua e tatala ai te punua āhini poa?”
6Na tali mai kilāua ki ei e vē lava ko te leaga ki ei o Iehu, oi na tuku ai kilāua e nā tino ke olo. 7Kua kaumai e kilāua te punua āhini poa kia Iehu, kua togi o lā kofutatao ki luga o te āhini, ma na hopo ai ki luga ia Iehu. 8Ma e tokalahi ia tagata kua fola o lātou kofutatao ki luga o te auala, kae ko iētahi kua tatipi mai e kilātou nā lālā mai nā lākau i te fenua ma fola ki luga o te auala. 9Ko nā tino nae i mua, ma kilātou nae mulimuli mai i tua, kua kāmata oi taufai kālalaga, “Ke vīkia te Atua! Ke fakamanuia e te Atua ki tē e hau i te igoa o te Aliki! #Hal 118.25-26 10Ke fakamanuia e te Atua te mālō ka pa mai o te Tupu ko Tavita, tō tātou tamana! Ke vīkia te Atua!”
11Kua pa atu ia Iehu ki Ieluhalema, oi na fano ai ki loto o te Mālumalu. Kua fakaholo tana kikila ki nā mea uma lele i loto. Kae ona kua pōuli, na olo ai ki Petania ma ona hoko e toka hefulu lua.
Kua Fetuku e Iehu te Mati
(Mat 21.18-19)
12I te aho alafaki, kua toe liliu ifo kilātou mai Petania, kae kua lagona e Iehu te fia kaia. 13Na ia kitea mamao atu he mati e tū mai ma ona lau e lahi. Oi na havali ai ki ei ke kite pe i nā ia maua ai ni fuāmati. Kae e pa atu ki ei, ni lau oioti lava te iei, ona ko hēki pa ki nā aho o te fuata. 14Ma na vāgana ai ia Iehu ki te mati, “E hēai lele he tino e toe kai ki he fuāmati mai ia te koe!”
Ma na lagona e ona hoko tana kupu tēnei.
Kua Fano ia Iehu ki te Mālumalu
(Mat 21.12-17; Luk 19.45-48; Ioa 2.13-22)
15I te taunuku atuga o kilātou ki Ieluhalema, na fano ai ia Iehu ki loto o te Mālumalu ma na kāmata ai oi tuli uma e ia ki fafo nā tino nae fai a lātou fefakatauakiga koloa i loto. Kua tafuli e ia nā laulau a nā tino huitupe, ma nā nofoa o nā tino fakatau lupe; 16ma na hēki ia fakatagagia foki he tino ke amo hana mea kui loto o nā lotoā o te Mālumalu. 17Oi na akoako atu ai e ia ki nā tino, kua lea vēnei atu, “E tūhia i nā Tuhituhiga Paia, ko te Atua na vāgana vē, ‘Ko toku Mālumalu ka takua he fale tatalo mo tagata o mālō uma.’ Kae kua fai e koutou ma ana o tagata kaihohoa!”#Iha 56.7; Iel 7.11
18I te lagonaga e nā ohitāulaga pule ma nā faiākoga o te Tūlāfono te mea tēnei, oi na kāmata ai kua tau hakili e kilātou he auala ke tāmate ai ia Iehu. Nae mātataku kilātou ia Iehu, ona ko te kaifenua na ofo lele ki ana akoakoga.
19Kua pa ki te afiafipō, oi na olo kehe ai ia Iehu ma ona hoko mai te kakai.
Ko te Akoakoga mai te Mati
(Mat 21.20-22)
20I te tāeaopō o te aho na hohoko ai, ka koi hāvavali atu kilātou i te auala kae kilātou kitea te mati kua mate kātoa ke pa ki ona aka. 21Kua manatua e Petelu te mea na tupu oi na lea vē atu ai kia Iehu, “Te Faiākoga, kikila atu ki te mati na fetuku e koe, kua mate!”
22Na tali mai ia Iehu ki ona hoko, “Fakatuatua ki te Atua. 23E lea atu au kia te koutou, ko ai lava e lea atu ki te mauga tēnei ‘fakamahiki ki luga oi togi ki te tai’ e aunoa ma he māhalohalo o tona loto kae talitonu ko te mea e lea ai ia ka taunuku, ka vēnā lava ona fai mo ia.#Mat 17.20; 1 Kol 13.2 24Ko te mea ia e lea atu ai au kia te koutou: Kāfai koutou e tatalo ma gogō atu ki he mea, talitonu kua maua e koutou, oi ka fōki atu ai kia te koutou ho he mea lava e gogō atu koutou ki ei. 25Kāfai koutou e tutū ki luga oi tatalo, fakamāgalo ho he tino na fai kino atu kia te koutou, kae ke fakamāgalo ai nā mea hehē a koutou kua fai, e te koutou Tamana i te lagi.”#Mat 6.14, 15 26#11.26 Ko iētahi tuhituhiga e fakaopōpo ki ei te fuaikupu 26: Kāfai e hē koutou fakamāgaloa iētahi tino, ka hē fakamāgaloa foki koutou e te koutou Tamana i te lagi i autou mea hehē
Ko te Fehili e Uiga ki te Pule a Iehu
(Mat 21.23-27; Luk 20.1-8)
27Kua toe taunuku atu kilātou ki Ieluhalema. Ma ka koi havalivali ia Iehu i loto o te Mālumalu, kae kua ōmamai nā ohitāulaga pule, nā faiākoga o te Tūlāfono ma te kau toeaina 28oi fehili vē mai ki ei, “E āi te pule e fai ai e koe nā mea iēnei? Ko ai te na ia fōki atua kia te koe te pule tēnei?”
29Na tali atu ia Iehu kia te kilātou, “Ka fehili atu foki la au, ma kāfai e tali mai koutou, oi ka taku atu ai foki e au pe a ai te pule e fai ai e au nā mea iēnei. 30Ko te pule a Ioane na fai ai tana papatihoga na hau mai fea: na hau mai te Atua pe mai tagata?”
31Kua kāmata oi fai fīnauga kilātou ma lea vē tētahi ki tētahi, “Kāfai kitātou e lea, ‘E mai te Atua,’ ka lea mai nei, ‘Heā la te hēki talitonu ai koutou kia Ioane?’ 32Kae kāfai kitātou e lea, ‘E mai tagata…’ ” (Nae mātataku kilātou i nā tino, auā nae talitonu uma nā tino, ko Ioane nae he pelofeta.) 33Oi na tali vē mai ai kilātou kia Iehu, “E hē kimātou iloa.”
Na vāgana atu ai ia Iehu kia te kilātou, “Ka hē kō taku atua foki la kia te koutou, pe a ai te pule e kō faia ai nā mea iēnei.”
Currently Selected:
Maleko 11: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
