Malaki 2
2
He Lapatakiga ki nā Ohitāulaga
1Kua vāgana te Aliki o Kautau o te Lagi ki nā ohitāulaga, “Ko te fakatonuga tēnei e mo koutou: 2Ko koutou ke āva mai kia te au i autou mea uma e fai. Kāfai koutou ka hē fakalogo ki te mea e lea atu ai au, oi ko koutou ka fetuku e au. Ka fetuku e au nā mea e fehoahoani atu kia te koutou. Ko te meamoni, kua uma te fetuku e au o nā mea iēnei, auā ko koutou e manatu māmā ki taku fakatonuga. 3Kikila, ka fakahala e au autou fānau, ma olo nā mata o koutou ki nā fekau a nā manu e ohi ai autou tāulaga—ma ka kave ai ma koutou ki te fakaputuga o fekau a nā manu. 4#Nūm 3.1-13Oi ka iloa ai e koutou ko te fakatonuga tēnei kua fōki atu e au kia te koutou, kae ke mautū ai taku feagaiga ma Levi.
5 #
Nūm 25.12
“Ko taku feagaiga ko he feagaiga ma ia, he feagaiga o te ola ma te fīlēmū, ma na fōki e au kia te ia, kae ke fakaaloalo mai ai ia kia te au, ma mataku i toku igoa. 6Ko nā fakahinoga moni nae i tona gutu, ma e hēai he mea hehē i ona laugutu. Nae havali ia fakatahi ma au i te fīlēmū ma te āmiotonu, ma na liliu kehe e ia te tokalahi mai te agahala.
7“Auā ko laugutu o he ohitāulaga e tatau ke mau ai te poto, auā ko ia ko te kavefekau a te Aliki o Kautau o te Lagi, ma e hakili e tagata nā fakahinoga mai tona gutu.
8“Kae ko koutou nā ohitāulaga kua olokehe mai ala o te Atua. Ko autou fakahinoga e māfua ai te pākukū o te tokalahi o tagata ki te agahala. Kua holi e koutou te feagaiga ma Levi,” kua vāgana ai te Aliki o Kautau o te Lagi. 9“Oi kua fai ai e au ke inohia koutou ma fakamātagā i mua o tagata, auā kua hē uhitaki mai koutou kia te au, kae kua fakapito koutou i te faiga o autou fakahinoga.”
Kua hē Fakamāoni ia Tagata ki te Atua
10E hē fokotahi nei to tātou tamana? E hē ko te Atua nei e fokotahi te na foafoa e ia kitātou? Heā la te fakalata ai e tētahi te tētahi, ma holi ai e kitātou te feagaiga a nā tupuna? 11Ko Iuta kua hē fakamāoni, ma ko he mea mātagā ma inohia, kua fai i luga o Ihalaelu ma o Ieluhalema. Kua fai e Iuta he mea e hē mamā ai te Mālumalu tēia e alofa te Aliki ki ei, ona kua fakaipoipo ki ni fafine e tāpuaki ki ni atua kehe. 12Ke kave kehe e te Aliki mai te potopotoga a tagata Ihalaelu, ho he tino e ia faia te mea tēnei, ma ka hē toe fakataga lele foki kilātou ke auai ki te faiga o nā tāulaga ki te Aliki o Kautau o te Lagi.#2.12 E fokotahi te fakaliliuga tuai Ke kave… te Lagi E hē manino te uiga i te gagana Epelu 13Ko tēnei tētahi mea e fai e koe. E tatao e koe te fata faitāulaga o te Aliki i nā loimata o koe ma tagi auē, auā kua hē toe ia talia nā tāulaga e ofo atu e koe kia te ia. 14E fehili koe pe heā te kua hē talia ai e ia? E māfua ona e ia iloa kua holi e koe tau takutinoga ki tau āvaga na fakaipoipo koe ki ei, ka koi talavou ai koe. Ko ia nae ko he hoa e o koe, ma kua holi e koe tau folafolaga i mua o te Atua, ko koe ka fakamāoni pea lava kia te ia. 15Na hēki faia nei koe e te Atua ke tahi koulua ma tau āvaga i te tino ma te agaga?#2.15 E ono vē te tuhituhiga Na hēki… te agaga E hē manino te uiga o te tuhituhiga Epelu Heā nei te pogai na ia faia ai te mea tēnei? Kae ke i ei ni autou fānau ke takua ni tagata moni e o te Atua. Ke mautinoa la e hē kē holia tau takutinoga ke fakamāoni ki tau āvaga.
16“Ko au e inoino ki te tatala āvaga,” kua vāgana ai te Aliki, te Atua o Ihalaelu. “Ko au e inoino lele kāfai he tino o koutou e ia faia he mea mātuiā vēnei ki tana āvaga, Ke mautinoa la e hē holia e koe tau takutinoga ke fakamāoni pea lava ki tau āvaga.”
Ko te Aho o te Fakamahinoga kua Pili Mai
17Kua fītā te Aliki oi fakalogo ki autou kupu. Kae kua fehili koutou, “E fītā vēhea te Aliki ia te kimātou?”
I te lea vē o koutou, “Ko te Aliki e manatu, ko nā tino āmiokino uma e lelei; ko te mea moni, e fiafia ia kia te kilātou.” Pe fehili vē foki, “E i fea te Atua o te faimeatonu?”
Currently Selected:
Malaki 2: TOKU
Highlight
Share
Copy
Want to have your highlights saved across all your devices? Sign up or sign in
Bible Society New Zealand Charitable Trust
