Malaki 3
3
1 #
Mat 11.10; Mlk 1.2; Luk 1.76; 7.27 “Kikila, ka uga atu e au taku kavefekau ke hāunia te ala mo oku. Oi ka fakafuaheki ai oi hau ki tona Mālumalu te Aliki tēia e hakili e koutou. Ko te kavefekau tēia kua leva te fia kikila o koutou ki ei, ka hau ke fakailoa atu taku feagaiga,” kua vāgana ai te Aliki o Kautau o te Lagi.
2 #
Ioe 2.11; Fkl 6.17 Kae ko ai te i nā mafai ke hao i te aho e hau ai ia? Ko ai te i nā mafai ke ola kāfai ia e hula mai? Auā ka vē ia he afi e fakamamā ai te ukamea, pe ko he meamoli mālohi e fakamamā ai nā mea kelekelea. 3Ka hau ia ke fakamahino e vē ko he tino e fakamamā e ia te hiliva. E vē ona fakaliu ke fakamamā e te tino galue ukamea te hiliva ma te aulo, e vēnā foki ona fakamamā e te kavefekau a te Aliki nā ohitāulaga, kae ke kilātou kaumaia ki te Aliki nā tāulaga e hako. 4Oi ka fiafia ai te Aliki ki nā tāulaga e ofo atu e tagata o Iuta ma Ieluhalema kia te ia, e vē ona māhani ai i nā aho kua teka.
5“Ma ka fanatu ai au ke fakamahino koutou, ma ke fai ma molimau e teteke ki nā tino fai mea fakataulāitu, nā tino e faia te mulilua, nā tino e molimau pepelo, nā tino e hē fakamāoni i te faiga o nā totogi o a lātou tino faigāluega, nā tino e fai kino ki nā fafine kua oti a lātou tāne, ki tamaiti mātuaoti, ma ki nā tino nukukehe—ke teteke kia te kilātou uma e hē āva mai kia te au,” kua vāgana ai te Aliki o Kautau o te Lagi.
Ko te Totogiga o nā Hefuluaki
6“Ko au te Aliki, e hē huia. Oi ko koutou, nā lāpuna o Iakopo, e hē fakatāugāgia. 7Ko koutou, e vē foki lava ko nā tupuna o koutou i mua atu, kua liliu kehe mai aku vāiniuga ma kua hē tauhi ki ei. Toe liliu mai kia te au, oi ka liliu atu ai au kia te koutou,” kua vāgana ai te Aliki o Kautau o te Lagi.
“Kae kua fehili vē koutou, ‘E vēhea ona toe liliu atu kimātou?’
8“E tatau nei he tino ke kaihohoa e ia he mea a te Atua? Oi kae kua kaihohoa e koutou aku mea!
“Kae kua lea koutou, ‘E vēhea ona kaihohoa e kimātou nā mea a koe?’
“I autou hefuluaki ma autou tāulaga. 9Ko koutou kua fetuku auā ko te nuku kātoa kua kaihohoa e kilātou mai ia te au. 10#Lev 27.30; Nūm 18.21-24; Teu 12.6; 14.22-29; Nem 13.12Kaumai kātoa autou hefuluaki ki te fale teu koloa, kae ke iei ni meakai i toku fale. Tofotofo au i te mea tēnei,” kua vāgana ai te Aliki o Kautau o te Lagi, “oi ka koutou kitea ai ka tatala e au nā fāmalama o te lagi mo koutou, ma liligi ifo ai te lahi lele o nā itūkāiga mea lelei. 11Ka tāofi e au nā hē-akelihe ke nahe fakakinoa e kilātou ia fua o autou fātoaga, ma ka hē malili ia fuāvine o autou tōvine ka ko hēki pula,” kua vāgana ai te Aliki o Kautau o te Lagi. 12“Oi ka lea ai ia tagata o mālō uma, ko koutou kua fakamanuiagia, auā ko te fenua o koutou ka kavea ma fenua lelei ke nonofo ai,” kua vāgana ai te Aliki o Kautau o te lagi.
Kua Folafola e te Atua Tona Alofa Fakamāgalo
13“Kua tautatala koutou i nā kupu matuā hē lelei e uiga kia te au,” kua vāgana ai te Aliki.
“Kae kua fehili koutou, ‘Niā te kua lea ai kimātou e uiga kia te Koe?’
14“Ko koutou kua lea vē, ‘E hēai he aogā e tautua ai ki te Atua. Heā ta kitātou e maua kāfai e fai e kitātou nā mea e leamai ai ia, pe taumafai kitātou ke fakaali ki te Aliki o Kautau o te Lagi, ko kitātou kua halamō i nā mea kua fai e kitātou? 15I te mea e kitea e kitātou, ko nā tino fāfifia ko kilātou iēnā te fiafia. Ko nā tino faiāmio mātagā, e hē gata e tamaokāiga, kae e kilātou tofotofoa foki te onohai o te Atua ia lātou faiga kino, ma e hēai he āfāina e pa kilātou ki ei.’ ”
16Oi ko nā tino nae mātataku i te Aliki kua faitala tētahi ki tētahi, ma nae fakalogo te Aliki ki nā mea nae lea ai kilātou. I mua lava o ia, na fakamau ai i loto o he tuhitākai, kilātou nae mātataku i te Aliki ma āva kia te ia.
17“Ko kilātou iēnei ka kavea ma oku tagata,” kua vāgana ai te Aliki o Kautau o te Lagi. “I te aho kua tonu ia te au, ka kavea ai kilātou ma aku mea tāua fakapitoa. Ka kō fakaalia kia te kilātou te alofa fakahao, e vē ona fakaalia e nā mātua te alofa fakahao ki te lā fānau e tautua kia te kilāua. 18Oi ka toe kitea ai e koutou te kehekehega o te mea e pa ki ei te tino āmiotonu ma te tino āmiokino, ki te tino e kaukauna mai kia te au, ma ki te tino e hē kaukauna mai kia te au.”
Currently Selected:
Malaki 3: TOKU
Highlight
Share
Copy
Want to have your highlights saved across all your devices? Sign up or sign in
Bible Society New Zealand Charitable Trust
