Luka 8
8
Ko nā Fafine nae Fehoahoani kia Iehu
1I he taimi mulimuli ake, oi na fano ai ia Iehu kua kui atu i nā kakai ma nā nuku, oi tālaki atu te Tala Lelei e uiga ki te Mālō o te Atua. Na olo fakatahi ma ona hoko e toka hefulu lua, 2vēnā foki ma ni fafine kua uma te fakamālōlō mai ni agaga kino ma ni tauale: ko tētahi o nā fafine iēnei ko Malia (nae takua ko he tino mai Makatala), na tuli kehe mai ai nā tēmoni e fitu; #Mat 27.55-56; Mlk 15.40-41; Luk 23.49 3ko Ioana te āvaga a Kouha, te kaukauna pule i te fale o te tupu ko Helota; ko Huihana, ma iētahi fafine e tokalahi nae fakaaogā a lātou tupe ma iētahi a lātou meatōtino, ke fehoahoani ki te tauhiga o Iehu ma ona hoko.
Ko te Talafakatuha o te Tino Lūlūhaito
(Mat 13.1-9; Mlk 4.1-9)
4Kua gāholo mai pea nā tino mai tēia kakai ma tēia kakai kia Iehu, ma na tokalahi lele ai te kaifenua kua fakapotopoto. Oi na fai ai e Iehu te talafakatuha tēnei kia te kilātou:
5“Nae iei he tino na fano oi lūlū ni fatu haito. I te lūlūga e ia o nā fatu haito, na pakukū ai iētahi fatu haito ki luga o te auala, ma na holi ai i nā vae o tagata ma kai e nā manulele. 6Ko iētahi na pakukū ki luga o te kelekele fatufatua, ma i te ola akega oi na kāmata ai oi magumagu, ona ko te kelekele nae hē huhū. 7Ko iētahi fatu haito na pakukū ki te mea nae ola ai nā vao mātuituia, ma na ola ake ai nā vao mātuituia kua taomia ai nā tamā lākau ma na hēki mafai ai ke ola. 8Ka ko iētahi na pakukū ki luga o te kelekele lelei; kua ola ake nā lākau ma na fua mai nā fuāhaito e taki tau helau.”
Kua fakauma ia akoakoga a Iehu oi na lea vē atu ai, “Kāfai e iei ni outou taliga, fakalogo mai la!”
Ko te Ala e Fakaaogā ai e Iehu nā Talafakatuha
(Mat 13.10-13; Mlk 4.10-12)
9Oi na fehili atu ai ona hoko kia te ia, pe ko heā te uiga o te talafakatuha tēnei, 10ma na tali vē atu ai ia, “Kua uma te fakailoa atu kia te koutou nā mealilo e uiga ki te Mālō o te Atua; kae ko iētahi tino, e fakailoa ki ei e ala i nā talafakatuha, kae ke kikila o lātou mata kae hē kilātou kitea, ma fakalogo o lātou taliga, kae hē mālamalama.#Iha 6.9 (LXX)
Kua Fakamālamalama e Iehu te Uiga o te Talafakatuha o te Lūlūhaito
(Mat 13.18-23; Mlk 4.13-20)
11“Ko tēnei te uiga o te talafakatuha: ko te fatu haito, ko te kupu a te Atua. 12Ko nā fatu haito na lūlū ki luga o te auala, e fakatuha ki nā tino e kilātou lagona te fekau; kae e hau te Tiāpolo oi kave kehe te fekau mai o lātou loto, kae ke hē talitonu ai kilātou ma hē maua ai e kilātou te ola. 13Ko nā fatu haito na lūlū ki luga o te kelekele fatufatua, e fakatuha ki nā tino e kilātou lagona te kupu ma talia ma te fiafia. Kae e hēai ni o lātou aka; e talitonu oioti i he taimi pukupuku, kae pa mai loa te taimi o nā tofotofoga, e vave lele oi uma to lātou talitonu. 14Ko nā fatu haito na lūlū ki te mea e ola ai te vao mātuituia, e fakatuha ki nā tino e kilātou lagona te kupu; kae ko te mānumanu ki koloa ma fiafiaga o te olaga, e taomia ai ma hē mātutua ona fua. 15Ka ko nā fatu haito na lūlū ki luga o te kelekele lelei, e fakatuha ki nā tino e kilātou lagona te kupu ma tāofi mau ki ei ma te fakamāoni ma te loto lelei, ma e taumafai pea lava ke pa ki te taimi e fua mai ai e kilātou ni fua.
He Mōlī i Lalo o he Tānoa
(Mlk 4.21-25)
16“E hēai he tino e ia tutua he mōlī, ma tatao ai ki lalo o he tānoa, pe tuku ki lalo o he hofa. Kae e tuku ki luga o he tūgālāmepa, kae ke kitea te māina e nā tino e ulu ki loto o te fale. #Mat 5.15; Luk 11.33
17“Auā e hēai he mea e mumuni ka hē fakaalia. E hēai foki he mealilo ka hē fakailoagia, ma kaumai ki te mea mālama. #Mat 10.26; Luk 12.2
18“Kikila lelei la, pe lagona vēhea e koutou te kupu; auā ko nā tino kua iei ni mea ka toe fōki ki ei iētahi mea, kae ko nā tino e hēai ni mea, ka kave kehe mai ia te kilātou, ke pa lava ki he tamā mea e manatu kilātou e ia te kilātou.” #Mat 25.29; Luk 19.26
Ko te Mātua ma nā Taina o Iehu
(Mat 12.46-50; Mlk 3.31-35)
19Kua ōmamai te mātua ma nā uho o Iehu kia te ia, kae na hēki mafai ke pa kilātou ki te mea nae iei ai, ona ko te kaifenua. 20Ma na lea atu ai he tino kia Iehu, “Ko te mātua ma nā uho o koe e tutū mai i fafo, e fia kikila kia te koe.”
21Kae kua vāgana atu ia Iehu kia te kilātou uma, “Ko toku mātua ma oku uho ko kilātou iēnā e kilātou lagona te kupu a te Atua ma uhitaki ki ei.”
Kua Fakamālū e Iehu he Afā
(Mat 8.23-27; Mlk 4.35-41)
22I tētahi aho na hopo ai ia Iehu ki luga o he vaka fakatahi ma ona hoko, ma na lea vē atu ai kia te kilātou, “Tātou olo ki tētahi itū o te vaitūloto.” Oi na kāmata ai kua fano to lātou vaka. 23Ka koi tele to lātou vaka, ka ko Iehu kua moe. Kae nā lava e teki he matagi mālohi kua kikini i loto o te vaitūloto, ma na kāmata ai kua hopokia te vaka, ma na pa ai kilātou ki he tūlaga fakahētonu lahi. 24Oi na olo ai te kau hoko kua fafagu ia Iehu ma na lea vē atu ki ei, “Te faiākoga, te faiākoga! Ko kitātou ka mamate!”
Na nofo ake ai ia Iehu ki luga, ma na fakatonu ai e ia te matagi ma nā galu, ma na toku ai loa te matagi ma toka ma te tai, ma kua tokihi te malino. 25Oi na lea atu ai ia Iehu ki ona hoko, “Tēfea te koutou fakatuatua?”
Kae ko te kau hoko na ofo lele ma mātataku, ma kua lea vē tētahi ki tētahi, “Ko ai te tagata tēnei? E fakatonu e ia te matagi ma nā galu, ma e uhitaki foki lava kilātou kia te ia!”
Kua Fakamālōlō e Iehu he Tino e Ulufia e nā Tēmoni
(Mat 8.28-34; Mlk 5.1-20)
26Na fakaauau lava te malaga a Iehu ma ona hoko, ma na taunuku atu ai ki te kogāfenua nae igoa kia Kelaha,#8.26 Kelaha ko iētahi tuhituhiga e leamai Katala (kikila ki te Mat 8.28); ka ko iētahi Kekeha i tētahi itū o te vaitūloto, e fakafehāgai ma Kalilaia. 27Na tū ake lava ia Iehu ki gāuta, kae fakafetaui atu kia te ia he tamāloa mai te kakai, nae ulufia e tēmoni. Kua lahi lele nā aho e eva vē ai e hēai ni ona kie, ma kua hē nofo i he fale, kae kua nofo lava i nā tugamau. 28I te ia kitea atuga o Iehu, oi na kekē lahi ai ma fakapakū ki tafa o ona vae, ma taukalaga vē, “Iehu, te Ataliki o te Atua Hilihilikehe! Heā kō ta koe e fai mai kia te au? Ko au e talohaga atu ke nahe kē fakahāuā mai kō kia te au!” 29Na lea vēnā te tamāloa ona na fakatonu e Iehu te agaga kino, ke fano ki fafo o ia. E lahi nā taimi nae ulufia ai te tamāloa, ma e ui lava nae noanoa nā lima ma nā vae i nā filifili ma nā loka ukamea, kae nae tamotu lava e ia ona noataga, ma tuli e te tēmoni ki te vao.
30Kua fehili atu ia Iehu ki te tamāloa, “Ko ai tō igoa?”
Na tali mai ia, “Ko toku igoa ko ‘Lēkeona,’ ” —auā e tokalahi nā tēmoni nae ulufia ai ia. 31Oi na fakatagi atu ai kilātou kia Iehu ke nahe ia fakatonua ke uga kilātou ki lalo ki te lua e hē gata te loloto.#8.31 lua e hē gata te loloto Nae iei he talitonuga ko te mea tēnei e i te takele o te kelekele e haihaitia ai nā tēmoni, ke pa ki te taimi e fai ai to lātou toe fakahalaga
32Nae iei he lafu puā lahi nae i kinā, nae kakai i tafa o he mauga. Ma na fakatagi atu ai nā tēmoni kia Iehu, ke tuku ake kilātou ke olo oi ulu ki nā puā, ma na fakataga ai kilātou e ia. 33Oi na olo ai nā tēmoni ki fafo mai te tamāloa ma kua olo oi feulu ki loto o nā puā. Ma na fetutuli ifo ai te lafu puā ki lalo i te tafatō ki loto o te vaitūloto, ma na mālelemu uma ai.
34Kua kitea e nā tino nae kikilāgia nā puā te mea kua tupu, oi na fetutuli kehe ai ma fakahalalau te tala i te kakai, ma i nā koga nae pili atu ki ei. 35Oi na olo ai ia tagata oi kikila ki te mea na tupu, ma i te tau atuga o kilātou kia Iehu, na kilātou maua atu te tamāloa na olo kehe mai ai nā tēmoni, e nofo i tafa o nā vae o Iehu, kua fai ona kofu ma kua lelei tona māfaufau; oi na mātataku uma ai kilātou. 36Ko kilātou na kiteagia, na fakamatala e kilātou ki nā tino, te fakamālōlōga o te tamāloa. 37Oi na lea ai nā tino uma na ōmamai i te kogāfenua tēnā kia Iehu, ke fano kehe auā ko kilātou kua mātataku lahi lele. Oi na hopo ai ia Iehu ki te vaka, ma na fano kehe ai mai kinā. 38Kua fakatagi vē atu te tamāloa na ōmamai ai ki fafo nā tēmoni, kia Iehu, “Fanatu kō au i tau kau.”
Kae kua uga e Iehu ke fano, ma na lea vē atu ai ki ei, 39“Toe liliu ki tō kāiga, ma taku ki ei nā mea kua fai e te Atua mo koe.”
Oi na fano ai te tamāloa kui loto i te kakai ma fakailoa atu ki ei nā mea na fai e Iehu mo ia.
Ko te Afafine a Iāilo ma te Fafine na Paki atu ki te Kofuloloa o Iehu
(Mat 9.18-26; Mlk 5.21-43)
40I te toe liliuga o Iehu ki tētahi itū o te vaitūloto, na talia fiafia e tagata i kinā, ona nae fakatalitali uma kilātou kia te ia. 41Oi na hau ai he tamāloa nae igoa kia Iāilo; he takitaki o te hūnako. Kua fakapakū ki tafa o nā vae o Iehu, ma na fakatagi ai ki ei ke fanake ki tona fale, 42auā ko tona afafine e fokotahi, kua hefulu lua ona tauhaga, kua tali oti.
Ka koi fanatu ia Iehu āgai ki ei, kae kua nunu lele atu te kaifenua ki nā itū uma o ia. 43Nae i te kaifenua tēnā, he fafine kua kātoa te hefulu lua tauhaga nae tauale ai i te punatoto; kua mole ana tupe i te totogiga o nā fōmai#8.43 kua mole… nā fōmai Ko iētahi tuhituhiga e hē i loto te fakakupuga tēnei kae na hēki mafai ke fakamālōlō ia e he tino. 44Na hau te fafine i loto o te kaifenua i tua o Iehu ma paki atu ki te pito o te kofuloloa o Iehu, ma ko te taimi foki lava tēnā na uma ai te punatoto. 45Oi na fehili atu ia Iehu, “Ko ai te na paki mai tona lima kia te au?”
Na fakafiti uma ia tagata, oi na lea vē atu ai ia Petelu ki ei, “Te faiākoga, ko tagata kua hiko fakatakamilo ma nunu mai kia te koe.”
46Kae kua lea atu ia Iehu, “E iei lava te tino na pa mai tona lima kia te au; na kō hāfia lava i te māui atuga ki fafo o te mana mai ia te au.” 47Kua iloa e te fafine ko ia kua maua, oi na hau ai, e tete ma fakapakū ki tafa o nā vae o Iehu. Oi na taku ai e ia kia Iehu, i mua o tagata, te māfuaga na paki ake ai tona lima kia te ia, ma te fakamālōlōga o ia i te taimi lava tēnā. 48Ma na vāgana atu ai ia Iehu ki te fafine, “Toku afafine, ko tō fakatuatua kua mālōlō ai koe. Fano la, ma ke ia te koe te fīlēmū.”
49Ka koi tautala vēnei atu ia Iehu, kae pa mai he faifekau mai te fale o Iāilo, kua lea vē mai kia Iāilo, “Ko te afafine o koe kua oti; nahe toe fakalavelave tauānoa la ki te Faiākoga.”
50Kae i te lagona atuga e Iehu o te mea tēnei, oi na lea vē atu ai kia Iāilo, “Ia koe nā mataku; talitonu oioti, oi ka mālōlō ai tō afafine.”
51I te pa atuga o Iehu ki te fale, na hēki fakataga e ia he tino ke fanake i tana kau ki lotofale, vaganā ai ia Petelu, ma Ioane, ma Iakopo, ma te tamana ma te mātua o te tamaiti. 52Ko nā tino uma nae iei, nae faitatagi ma lauē, ona ko te tamaiti. Kae na vāgana atu ia Iehu, “Koutou nahe faitatagi; ko te tamaiti e hēki oti, kae e moe!”
53Kae kua kāmata oi fakatauemu kilātou kia Iehu, ona kua kilātou iloa, ko te tamaiti kua oti. 54Oi na tago atu ai ia Iehu ki te lima o te tamaiti ma lea vē atu ki ei, “Te tautiti, nofo ki luga!” 55Ma na toe ola ai te tamaiti, ma na tū ake ai loa ki luga i te taimi lava tēnā; ma na fakatonu ai e Iehu ke fōki he mea ma te tamaiti ke kai. 56Na ofo lele nā mātua o te teine, kae na fakatonu atu kilāua e Iehu, ke nahe takua lele ki he tino te mea na tupu.
Currently Selected:
Luka 8: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
