Luka 7
7
Kua Fakamālōlō e Iehu te Kaukauna a he Takitakikau Loma
(Mat 8.5-13)
1Kua uma te lea atu o Iehu ki tagata i nā mea uma iēnei, oi na fano ai ki Kapenaumi. 2Nae i kinā he takitakikau Loma, nae iei hana kaukauna fakamoemoegia lahi nae tauale ma kua tāli oti. 3I te ia lagonaga o te tala e uiga kia Iehu, oi na uga ai e ia ni toeaina Iutaia, ke lea ki ei ke hau oi fakamālōlō tana kaukauna. 4Oi na ōmamai ai nā tino iēnei kia Iehu, kua fakatagi vē atu ki ei ma te agaga naunau, “Ko te tino tēnei he tino lelei, ma e tatau koe ke fehoahoani kia te ia. 5He tino e alofa ki o tātou tagata, ma na fau foki e ia to tātou hūnako.”
6Oi na fano ai ia Iehu kua olo ma nā toeaina. Kua hē mamao ia Iehu ma te fale, kae uga mai e te takitakikau ni uō e a ia, ke lea vē ki ei, “Te Aliki, koe nahe fakafītā. Ko au ko he tino fakatauvā ma e hē talafeagai ke ulu koe ki loto o toku fale, 7pe ko toku fanatu foki kia te koe. Kae tau lava ko hau kupu, ma ka mālōlō ai taku kaukauna. 8Auā ko au foki ko he tino kua tuku ki lalo o te pule a nā takitakikau e maualuluga atu ia te au, ma e iei foki nā fitafita e i lalo o taku pule. Ma kāfai au e lea ki te tino tēia, ‘Fano vē!’ oi e fano; kāfai au e lea ki tētahi tino, ‘Hau!’ oi e hau foki; ma kāfai au e lea ki taku kaukauna, ‘Fai te mea tēia!’ oi e vēnā lava ona fai e ia.”
9Na ofo lele ia Iehu i te ia lagona atuga o te mea tēnei; oi na liliu ai ki ona tua ma na vāgana atu ai ki te kaifenua nae tau mulimuli mai kia te ia, “E lea atu au kia te koutou, e hēki kō iloa lele he tino i Ihalaelu e vēnei hona fakatuatua!”
10Kua toe liliu nā kavefekau ki te fale o te takitakikau, ma na maua atu e kilātou ko te kaukauna kua mālōlō.
Kua Fakaola e Iehu te Ataliki o he Fafine kua Oti tana Tāne
11E hēki mataloa#7.11 E hēki mataloa ko iētahi tuhituhiga e leamai I te aho na hohoko ai oi na fano ai ia Iehu ki he kakai e igoa ko Naina, ma na mulimuli atu ai foki kia te ia ona hoko ma he kaifenua tokalahi. 12Na pa atu lava ia Iehu ki te faitotoka o te kakai, kae fakahao mai te holo, nae hiki mai he tino kua oti. Ko te tamāloa kua oti, he tama tautahi e a he fafine kua oti tana tāne, ma nae fakatahi ma te mātua he kaifenua e tokalahi mai te kakai. 13Kua kitea atu e te Aliki te fafine, oi na fakatumulia ai tona loto i te alofa, ma na lea vē atu ki ei, “Koe nahe tagi.” 14Oi na havali atu ai ia Iehu kua tago ki te fata nae hiki ai te oti, ma na tutū ai loa nā tāulelea nae kilātou hikia. Oi na vāgana atu ai ia Iehu, “Te taumalo, ko au e lea atu kia te koe, nofo ki luga!” 15Na nofo ake loa lava ki luga te tamāloa na oti ma kāmata oi tautala, ma na tuku atu ai ia e Iehu ki tona mātua.
16Na mātataku uma lele kilātou, ma viviki ake ai ki te Atua. Kua lea vē kilātou, “Ko he pelofeta tāua tēnei kua kikila kitātou ki ei! Ko te Atua kua hau ke fakaola ona tagata!”
17Ma na halalau ai te tala tēnei e uiga kia Iehu ki Iutea kātoa, ma vēnā ki nā fenua nae tuākoi mai.
Ko nā Kavefekau mai ia Ioane te Papatiho
(Mat 11.2-19)
18I te taku atuga kia Ioane e ona hoko nā mea uma iēnei, oi na kalaga atu ai ia ki ni hoko e toka lua ke ōake, 19ma na uga ai te toka lua e ia ki te Aliki ke fehili vē atu ki ei, “Ko koe nei te tino na folafola e Ioane e hau,#7.19 te tino na folafola e Ioane e hau ātonu e fakatatau ki te fakamoemoe o tagata Iutaia ki te Mehia ke hau oi fakaola kilātou. E tākua e Ioane te mea tēnei i te Luka 3.16,17 pe e iei hētahi tino e fakatalitali kimātou ki ei?”
20Kua ōatu kilāua kia Iehu, ma lea vē atu ki ei, “Ko kimāua na uga mai e Ioane te Papatiho, ke fehili atu pe ko koe nei te tino na lea ia e tuku e hau, pe e iei hētahi tino e fakatalitali kimātou ki ei?”
21I te taimi tēnā, na fātoā uma te fakamālōlō e Iehu o nā tino e tokalahi mai nā tauale, nā fāmai pēhi, nā agaga kino, ma fakapupula nā mata o nā tāuaho e tokalahi. 22Oi tali atu ai ia Iehu kia te kilāua, “Olo oi taku kia Ioane, nā mea kua kikila ma fakalogo koulua ki ei: kua pupula ia mata o tāuaho, kua hāvavali nā tino e hē kātoatoa nā itūtino, kua fakamamā#7.22 fakamamā Kikila ki te 5.12 kilātou e maua i nā tauale kino o te kili, kua logo ia taliga o tutuli, kua toe fakatutū nā tino na oti, ma ko te Tala Lelei kua folafola ki tagata mātitiva.#Iha 35.5-6; 61.1 23Amutia nā tino e hē māhalohalo mai kia te au!”
24Kua olo kehe nā kavefekau a Ioane, ma na kāmata ai oi tautala atu ia Iehu ki te kaifenua, e uiga kia Ioane: “I te koutou ologa kia Ioane i te vao, heā te nae fia kikila koutou ki ei? He lau mutia e āgina i te matagi? 25Heā la te na olo koutou ke kikila ki ei? He tamāloa e lākei i ni lākei uiga kehe te gali? Ko nā tino e fai ni lākei vēnei ma ola i he olaga taugatā, e nonofo i nā fale o nā tupu! 26Lea mai ake, heā te na olo koutou ke kikila ki ei? He pelofeta? Io, e hako; ka ko te tino na koutou kiteagia e hili atu tona tāua i lo he pelofeta. 27Auā ko Ioane te fakatatau ki ei te tuhituhiga paia e vē mai: ‘Na vāgana te Atua, kikila, ka uga atu e au taku kavefekau ke muamua atu ia te koe, ke ia hāunia te auala mo koe.’#Mal 3.1 28E lea atu au kia te koutou, i nā tino kua fānanau mai ki te lalolagi, e hēai he tino e hili atu tona tāua i lo Ioane. Kae ko te tino e pito hili ona hē tāua i te Mālō o te Atua, e hili atu la tona tāua i lo Ioane.”
29Ko nā tino uma lele nae fakalogologo kia Ioane; ma e pa foki lava ki nā aolāfoga, na uhitaki ki te Atua ma na kilātou faia te mea e hako i te kua ōatu ke papatiho kilātou e Ioane. #Mat 21.32; Luk 3.12 30Kae kua teteke e te kau Falehaio ma nā faiākoga o te Tūlāfono, te fuafuaga a te Atua mo kilātou, ma e hēki kilātou talia ai ke papatiho kilātou e Ioane.
31Kua toe lea vē atu ia Iehu, “Heā nei te ka kō fakatuhagia ki ei nā tino o tēnei tupulaga? E vē nei niā? 32E vē kilātou ko nā tamaiti e nonofo i te māketi ma e taukālalaga atu tētahi vāega ki tētahi, ‘Nae ta atu e kimātou nā pehe fiafia mo koutou, kae nae hē hihiva koutou! Nae uhu atu e kimātou nā haumate, kae nae hē faitatagi koutou!’ 33I te hauga o Ioane te Papatiho, nae fakalāina ma hēki inu ki he uaina, kae na lea vē koutou, ‘E ulufia e he tēmoni!’ 34I te hauga o te Ataliki o te Tagata, nae kai ma inu, kae kua lea vē koutou, ‘Kikila ki te tagata tēnei! E kai fakaatuatuvale ma konā i te uaina, ma ko he uō a nā aolāfoga ma iētahi tino inohia!’ 35Ka ko te poto o te Atua e fakaalia te moni, e ala ia te kilātou uma kua kilātou taliagia.”
Ko Iehu i te Fale o Himona te Falehaio
36Na valakaulia e hētahi o te kau Falehaio ia Iehu ke kakai kilāua i tona fale, i te ōmoe o te afiafi. Oi na fano ai ki ei ia Iehu, ma kua hāuni ka kakai.#7.36 hāuni ka kakai I nā taimi fakapitoa, e māhani nā tino Iutaia oi mulimuli ki nā tu a nā tino Eleni ma a nā tino Loma, e tākokoto fakatafa ki o lātou itū tauagavale, ma fakalagolago ki nā tuli lima agavale, kae kakai fakaaogā nā lima taumatau. Ko te auala tēnei na mafai ai te fafine ke kui mai i tua o Iehu, oi fulufulu ona vae (kikila ki te fuaikupu 38) 37Nae i te kakai tēnā he fafine nae ola i he olaga agahala, ma i te ia lagonaga ko Iehu nae kai i te fale o te Falehaio, oi na fakatau ai e ia he fagu na gaohi i te alapaha, e tumu i nā lolo manogi taugatā. #Mat 26.7; Mlk 14.3; Ioa 12.3 38Ma na fano ai kua tū i tua i tafa o nā vae o Iehu, kua tagi ma fakahuhū nā vae o Iehu i ona loimata. Oi na holo ai e ia nā vae o Iehu i tona lāulu ma hogi ki ei, ma na liligi ai ki luga nā lolo manogi taugatā. 39I te kitea atuga e te Falehaio o te mea tēnei, oi na lea vē ifo ai i tona loto, “Kāfai e moni ko te tagata tēnei he pelofeta, kua tatau ke ia iloa pe ko ai te fafine tēnei, kae pe he itūkāiga fafine vēhea foki tēia e pa ake kia te ia; kua tatau ke ia iloa ko te fafine e ola i he olaga agahala!”
40Oi na lea atu ai ia Iehu ki ei, “Himona, e iei te mea e fia lea atu ai au kia te koe.”
Kua lea mai ia Himona, “Io, te Faiākoga, lea mai ake pe heā.”
41Oi na vāgana atu ai ia Iehu, “E iei nā tamāloa e toka lua nae nofo kaitālafu ki he tino e kaitālafu mai ai nā tupe e tagata. Ko tētahi tamāloa nae nofo kaitālafu i he lima helau tēnali, ka ko tētahi nae nofo kaitālafu i he lima hefulu tēnali. 42Ona kua hē mafai e te toka lua tēnei oi toe totogi a la kaitālafu, oi na fakamāgalo ai kilāua e te tino e a ia nā tupe. Ko ai la o te toka lua tēnei ka hili atu tona alofa ki te tino e a ia nā tupe?”
43Na tali mai ia Himona, “Hōvē pe ko te tino na lahi tana kaitālafu na fakamāgalo.”
Kua lea atu ia Iehu, “E hako koe.” 44Oi na liliu atu ai ki te fafine, ma lea vē atu kia Himona, “E kē kitea te fafine tēnei? Na ulu mai au ki tō fale kae e hēki kē kaumaia ni vai mo oku vae, ka kua fulufulu e te fafine oku vae i ona loimata, ma holo i tona lāulu. 45E hēki kē fakafeiloakia au i te hogi, kae talu toku hau kua hē uma te hogi o te fafine tēnei ki oku vae.#7.45 te hogi… ki oku vae he tu a Iutaia e fakailoa ai te fakaaloalo lahi ma te tāua o te tino e fai ki ei 46E hēki kē ukua toku ulu i he lolo olive, kae kua ia ukua oku vae i nā lolo manogi. 47Ko au la e lea atu kia te koe, ko ana agahala e lahi kua uma te fakamāgalo, ona ko te lahi o tona alofa kua fakaalia. Kae ko ai lava e hē lahi ana agahala e fakamāgalo, e hē lahi foki tona alofa e fakaalia.”
48Oi na lea atu ai ia Iehu ki te fafine, “Ko au agahala kua fakamāgalo.”
49Ko iētahi tino nae kakai ma ia, kua kāmata oi fakataufai vēia, “Ko ai te tino tēnei ke fakamāgalo ai e ia nā agahala.”
50Kae kua lea atu ia Iehu ki te fafine, “Ko tō fakatuatua kua ola ai koe; fano la i te fīlēmū.”
Currently Selected:
Luka 7: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
