Luka 15
15
Ko te Māmoe na Galo
(Mat 18.12-14)
1I tētahi aho na ōmamai ai nā aolāfoga e tokalahi, ma iētahi tino inohia oi fakalogologo ki nā akoakoga a Iehu, #Luk 5.29-30 2ma na kāmata ai kua mūimui te kau Falehaio ma nā faiākoga o te Tūlāfono ma lea vēia, “Ko te tagata nei e talia e ia nā tino inohia, ma kakai fakatahi ma kilātou!” 3Oi na fai ai e Iehu te talafakatuha tēnei kia te kilātou:
4“Ko ai he tino o koutou e iei ni ana māmoe e helau, ma kāfai e galo hētahi o kilātou, e hē ia tukua iētahi māmoe e iva hefuluiva i te vao, kae fano oi hakili ke maua te māmoe e fokotahi e galo? 5Ma kāfai e ia maua, e hiki e ia ki luga i ona takuau ma te fiafia lahi. 6Ma kāfai e pa ki te fale, ka fakapotopoto mai e ia ana uō ma ona tuākoi ma lea vē atu ki ei, ‘Ōmamai tātou fiafia fakatahi, auā ko taku māmoe na galo, kua toe maua.’ 7E lea atu au kia te koutou, ka vēnā foki oi hili atu te fiafia i te lagi ki he tino agahala e fokotahi e halamō, i lo ki ni tino e toka iva hefuluiva e manatu ko kilātou e āmiotonu, ma e hēai he mea e tatau ai kilātou ke halamō.”
Ko te Tupe Hiliva na Galo
8Kua fai tētahi talafakatuha e Iehu. “Ko ai he fafine e iei ni ana tupe hiliva e hefulu, ma kāfai e galo he tupe hiliva e fokotahi, e hē ia tutua he mōlī ma halu te fale, ma hakili fakalelei lele ke maua? 9Ma kāfai e maua e ia, ka fakapotopoto mai e ia ana uō ma ona tuākoi ma lea vē atu ki ei, ‘Ōmamai tātou fiafia fakatahi, auā ko taku tupe hiliva na galo, kua toe maua.’ 10E lea atu au kia te koutou, ka fiafia lahi ia āgelu a te Atua, ona ko he tino agahala e fokotahi kua halamō.”
Ko te Talafakatuha o te Ataliki Fakamāumau Mea
11Kua toe vāgana atu ia Iehu, “Nae iei he tamāloa e toka lua ona ataliki. 12Kua lea atu te kimuli ki tona tamana, ‘Toku tamana, tuku mai kō kia te au i te taimi nei toku tofi.’ Oi na vāevae ai loa e te tamana nā mea a ia, ki ona ataliki e toka lua. 13Kua teka atu ni nāi aho, oi na fakaputu uma ai e te kimuli ana mea, ma na fano ai ki he fenua mamao. Nae ola ia i kinā i he olaga hē tāupulea, ma na fakamāumau ai e ia ana tupe. 14Kua mole te fakaaogā e ia o ana mea, ma na tupu ai he oge lahi i te fenua tēnā, ma kua hē maua hana mea ke kai. 15Oi na fano ai kua galue mo he tino i te nuku tēnā, ma na uga ai ki te fātoaga, ke tauhi e ia nā puā. 16Na fofou lele ke ia kaia nā mea nae fafaga ai nā puā, kae e hēai lele he tino na fōkia hana mea ke kai. 17Mulimuli ake, kua toe akoakogia tona māfaufau ma na vē ake ai tana kupu, ‘Ko nā tino faigāluega uma a toku tamana e lahi lele nā meakai e kakai ai, ka ko tēnei au, ka mate i te fia kaia! 18Ko au ka tū ki luga oi fano ki toku tamana, ma lea vē ki ei: Toku tamana, ko au kua agahala ki te Atua, vēnā ma koe. 19Kua hē toe aogā ke takua au, ko he ataliki e o koe; kae fai kō au e vē ko hētahi o nā tino faigāluega a koe.’ 20Oi na tū ai ki luga, kua toe foki ki tona tamana.
“Koi mamao lele te mea e havali mai ai ia, ka kua kitea atu ia e tona tamana; na tumu lele te loto o te tamana i te alofa, ma na vili atu ai oi ōpoi mai tona ataliki, ma hogi atu kia te ia. 21Kua lea mai te ataliki, ‘Toku tamana, ko au kua agahala ki te Atua vēnā ma koe. E hē toe aogā ke takua au ko he ataliki e o koe.’ 22Kae kua kalaga atu te tamana ki ana kaukauna, ‘Fai vave! Kaumai te kofuloloa e pito hili ona lelei, oi fakakofu ai toku ataliki. Hulu he mama ki te lima, ma hulu ni taka#15.22 mama… taka Ko nā mea iēnei e fakaalia ai kua talia kātoatoa e te tamana tona ataliki. Ko te mama ko he fakailoga o te maualuga o te tūlaga i loto o he kāiga. Ko nā taka e fakailoa ai ko ia ko he ataliki kae hē ko he pologa, ona ko nā pologa nae hē māhani oi fai ni o lātou taka ki ona vae. 23Oi olo ai kaumai te punuāpōvi peti oi tāmate, ma fai ai he tātou kaiga fiafia. 24Auā ko toku ataliki tēnei, na oti kae kua toe ola mai; na galo, kae nei kua toe maua.’ Ma na kāmata ai loa te kaiga fiafia a kilātou.
25“I te taimi tēnā, ko te ataliki ulumatua nae galue i te fātoaga. I te foki maiga, kua pili mai ki te fale, kae ia lagona atu nā pehe ma nā hiva e fai. 26Oi na kalaga ai ki tētahi kaukauna ke fanake ma na fehili ai ki ei pe ko heā te fai. 27Na tali atu te kaukauna, ‘Ko te uho o koe kua toe foki mai, ma kua tāmate e tō tamana te punuāpōvi peti, auā kua toe foki mai tona ataliki ma te haogalēmū.’
28“Na ita lahi lele te ulumatua, ma na muhu ai oi fano ki loto o te fale. Oi na hau ai ki fafo tona tamana, kua tauānau ke fanake ki lotofale. 29Kae na tali vē atu ki tona tamana, ‘Kikila ki nā tauhaga e lahi nae galue ai au mo koe e vē he pologa, ma e hēki iei lele hau fakatonuga e fokotahi e hēki uhitaki au ki ei. Kae heā nei ta aku na kua kē fōki maia? E hēai he mea. Kae ke fōki mai foki la he oti ke fai ai haku kaiga ma aku uō! 30Ka ko tō ataliki tēnei na ia fakamāumaua au mea ki nā fafine talitāne, kua tāmate e koe he punuāpōvi peti mo ia!’ 31Na tali atu te tamana, ‘Toku ataliki, ko koe ei kinei pea lava ma au, ma ko nā mea uma lele a aku, e a koe. 32Kae kua tatau kitātou ke kakai ma fiafia, auā ko te uho o koe na mate ma kua toe ola mai; na galo ka kua toe maua.’ ”
Currently Selected:
Luka 15: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
