Luka 14
14
Kua Fakamālōlō e Iehu he Tamāloa e Tauale
1I tētahi Hāpati na fano ai ia Iehu ki te fale o he takitaki o te kau Falehaio mo he lā katiga; ma nae tautuku atu lava ia e nā tino. 2Oi na hau ai he tamāloa e fulafula ona vae ma ona lima, kia Iehu, 3ma kua fehili atu ia Iehu ki nā faiākoga o te Tūlāfono ma te kau Falehaio, “E taga i te tātou Tūlāfono ke fakamālōlō ni tauale i te Hāpati, pe hēai?”
4Kae kua hēai he tino o kilātou na tautala. Oi na kave ai e Iehu te tamāloa, kua fakamālōlō, ma uga ai ke fano. 5Oi na lea vē atu ai ia Iehu kia te kilātou, “Kāfai he tino o koutou e pakū hona ataliki, pe ko hana pōvi ki loto o he vaikeli i te Hāpati, ka hē tago moni nei lava koe i te taimi lava tēnā, oi toho ake ki luga i te Hāpati?” #Mat 12.11
6Kae na hēki mafai ke tali mai kilātou ki te mea tēnei.
Ko te Loto Maulalo ma te Loto Alofa
7Na kitea atu e Iehu ni iētahi o te kau valakaulia, kua filifili e kilātou nā nofoaga fakaaloalogia ke nonofo ai. Oi na fai ai e ia te talafakatuha tēnei kia te kilātou uma. 8“Kāfai koe e valakaulia e he tino ki he kaiga o he fakaipoipoga, nahe kē nofo i he nofoaga e fakaaloalogia, nā meakē na valakaulia foki ma he tino e hili atu te tāua i lo koe, #Alk 25.6-7 9oi hau ai te tino na ia valakaulia koulua uma, oi lea vē atu, ‘Fōki te nofoaga tēnā ki te tino tēnei.’ Oi ka lagona ai e koe te mā, ma fano ai koe oi nofo i te nofoaga e pito hili te hē fakaaloalogia. 10Kae kāfai koe e valakaulia, fano oi nofo i te nofoaga e hili atu te hē fakaaloalogia, kae ke hau te tino na ia valakaulia koe ma lea vē atu, ‘Te uō, hau ki te nofoaga tēia e hili atu ia’; oi ka fakaaloalo atu ai ia tagata kia te koe, ona ko nā tino e nonofo fakatahi ma koe i te laulau. 11Auā ko kilātou e loto fakamaualuga, ka fakamaulalogia, ka ko kilātou e loto maulalo, ka fakaeke ki luga.” #Mat 23.12; Luk 18.14
12Oi na vāgana atu ai foki ia Iehu ki te tino na ia valakaugia ia, “Kāfai e fai hau kaiga o te aoauli, pe he kaiga o te afiafi, nahe valakauliagia nā uō a koe, pe ko nā taina o koe, pe ko nā tino o tō kāiga, pe ko nā tuākoi maukoloa o koe—auā ka kilātou valakauliagia foki koe, ma i te faiga tēnei, ka toe totogi atu ai lava tau mea na fai. 13Kae kāfai e fai hau kaiga, valakaulia nā tino mātitiva, nā pipili, nā tino e hē kātoatoa nā itūtino, ma nā tino tāuaho; 14oi ka fakamanuia ai koe, auā e hē kilātou mafaia oi toe totogi atu koe. Ko koe ka totogi atu e te Atua i te aho e toe fakatutū ai e ia mai te oti, nā tino nae āmiotonu.”
Ko te Talafakatuha o te Kaiga Lahi
(Mat 22.1-10)
15I te lagona atuga o te mea tēnei e hētahi o nā tino nae i te laulau fakatahi ma Iehu, oi na lea vē atu ai ia kia Iehu, “Amutia nā tino ka nonofo ki lalo oi kakai i te kaiga i te Mālō o te Atua!”
16Kae kua lea mai ia Iehu ki ei, “Nae iei he tamāloa na fai tana kaiga lahi, ma na valakaulia e ia nā tino e tokalahi. 17Kua pa ki te aho o te kaiga, oi na uga ai e ia tana kaukauna ke lea vē ki te kau valakaulia, ‘Ōmamai loa, kua uma te tāpena o nā mea uma!’ 18Kae na kāmata kua tofu kilātou ma te fakaleku kua fai. Kua lea vē te tino muamua ki te kaukauna, ‘E iei toku fenua kua fakatau, oi ko au e fia fano oi āhi; fakamolemole kō oi talia taku fakanoi.’ 19Ko tētahi tino kua lea vē atu, ‘E iei aku pōvi poa e hefulu na fakatau ke tohoa taku mea fakamalū kelekele, oi ko au ka fano oi fakatakitaki pe lelei; fakamolemole kō fakanoi atu au.’ 20Ko tētahi tino kua lea vē, ‘Na fātoā uma nei lava toku fakaipoipo, oi ko te mea ia e hē mafai ai au ke fanatu.’
21“Oi na toe foki ai te kaukauna oi taku ki tona matai nā mea uma iēnei. Na ita lele tona matai, ma na lea vē atu ai ki tana kaukauna, ‘Fano vave nei loa ki nā auala lalahi ma nā tamā auala o te kakai, oi kaumai nā tino mātitiva, nā pipili, nā tāuaho ma nā tino e hē kātoatoa nā itūtino.’ 22Ma na lea vē atu ai te kaukauna ki ei, ‘Te aliki, ko te mea na fakatonu mai e koe, kua uma te fai, kae koi iei lava nā avanoa.’ 23Oi na lea atu ai te matai ki te kaukauna, ‘Fano ki nā auala lalahi, ma nā tamā auala, oi fakamālohi ki nā tino ke ōmamai, kae ke tumu toku fale. 24Auā e lea atu au kia te koutou uma, e hēai he tino e fokotahi o kilātou uma na valakaulia, e tomi ki taku kaiga!’ ”
Ko te Tau o te Kavea o he Tino ma Hoko
(Mat 10.37-38)
25I te tētahi taimi, na malaga fakatahi ai he kaifenua e tokalahi ma Iehu, oi na liliu atu ai ia Iehu ma lea vē atu kia te kilātou, 26“Ko ai lava he tino e hau kia te au, ka hē mafai ke kavea ia ma oku hoko, vaganā e hili atu tona alofa mai kia te au, i lo ki tona tamana ma tona mātua, tana āvaga ma tana fānau, ona uho ma ona tuafafine, ma ke pa lava ki tona lava ola. #Mat 10.37 27Ko ai lava he tino e hē ia amoa tona hātaulo ma mulimuli mai kia te au, e hē mafai ke kavea ia ma oku hoko. #Mat 10.38; 16.24; Mlk 8.34; Luk 9.23
28“Kāfai he tino e fia fau hona fale maualuga lahi, e mua nofo ki lalo oi fuafua pe fia te tau, ke ia kitea ai pe lava tana tupe ke fai ai te gāluega ke uma. 29Kāfai e hē ia faia vēnā, ka hē ia mafaia oi fakauma te fale kāfai e uma te faiga o te fakavae; oi ka fakatauemu ai kia te ia nā tino uma na kitea e kilātou. 30Ka lea vē kilātou, ‘Ko te tagata tēnei na kāmata oi fau e ia he fale, kae e hēki ia mafai oi fakauma.’
31“Kāfai he tupu ma hana kautau e toka hefulu afe, e hiki taua ki hētahi tupu e toka lua hefulu afe tana kautau, ka hē nofo muamua nei ia ki lalo ma fuafua pe lava tona mālohi, ke fakafetaui ai e ia te tupu e toka lua hefulu afe tana kautau? 32Kāfai e fuafua e ia e hē ia mafaia, oi ka uga ai e ia nā kavefekau ki tētahi tupu ka koi mamao lele, mo he māliliega ke tauhi ai te fīlēmū. 33E vēnā foki lava ona hē mafai e he tino o koutou ke kavea ma oku hoko, vaganā e tīaki e ia ana mea uma lele.
Ko te Māhima kua Hēai hona Aogā
(Mat 5.13; Mlk 9.50)
34“Ko te māhima e lelei, kae kāfai te māhima kua uma tona kokona, e mafai vēhea nei ke toe fakakokona? 35E hē aogā mo te kelekele pe mo te fakapalagāvao e fakalelei ai te kelekele, ma e togi ki fafo. Kāfai e iei ni outou taliga, fakalogo mai la.”
Currently Selected:
Luka 14: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
