Luka 16
16
Ko te Kaukauna Pule Potokino
1Na vāgana atu ia Iehu ki ona hoko, “E iei he tino maukoloa nae iei hana kaukauna nae pule i te kikilaga o ana meatōtino. Kua logotala te tino maukoloa, ko ana tupe e fakamāumau e tana kaukauna pule. 2Oi na fekau ai e ia tana kaukauna pule ma kua lea vē atu ki ei, ‘Heā tēnei kua kō lagona atu e uiga kia te koe? Hāuni mai la he tala kātoa o aku mea uma e kikila e koe, auā ko koe ka hē toe kavea ma kaukauna pule.’ 3Oi na vē ake ai te kaukauna pule i tona loto, ‘Heā nei ta aku ka fai, auā ia au ka tuli kehe e toku matai mai taku gāluega? Kua hē lava toku mālohi oi keli autu, ma ko au foki e mā oi kaitagōgō tupe. 4Ko tēnei taku mea ka fai kae ke talia ai au e nā tino ki loto o nā fale o kilātou, kāfai au ka fakateka ma taku gāluega.’
5“Oi na fekau ai e ia nā tino tau toka tahi uma nae nofo kaitālafu ki tona matai. Kua fehili vē atu ki te tino muamua, ‘E fia tau kaitālafu ki toku matai?’ 6Na tali mai te tino, ‘E helau ia hiā lolo olive.’ Oi na lea atu ai ki ei te kaukauna pule, ‘Tēia la te pili a koe, nofo ki lalo oi hui fakavave ki he lima hefulu.’ 7Ma na lea atu ai ki tētahi tino, ‘Ka ko koe—e fia tau kaitālafu?’ Na tali mai te tino, ‘E helau ia taga haito.’ Oi na lea atu ai ki ei te kaukauna pule, ‘Tēia te pili a koe, tago oi hui ki he valu hefulu.’
8“Ona ko te mea tēnei, na fakamālō ai te matai ki tana kaukauna pule, ona ko tona poto kino; auā e hili atu te popoto faitogafiti o nā tino o nā aho nei i te kikilaga o a lātou mea, i lo nā tino o te mālama.”#16.8 nā tino o te mālama Nā tino e kilātou fakatāuagia nā mea tau ki te Mālō o te Atua
9Ma na toe vāgana atu ia Iehu, “Ko au la e lea atu kia te koutou: fakaaogā nā koloa faka-te-lalolagi#16.9 faka-te-lalolagi pe na maua i ni auala hē fakamāoni a koutou ke fehoahoani ki iētahi tino ma fai ma uō a koutou. Kāfai la e mole, ka ono talia koutou i te nofoaga e tūmau pea lava ke pa ki te fakavavau. 10Ko ai lava e fakamāoni i nā tamā mea, ka fakamāoni foki i nā mea lalahi; ma ko ai lava e hē fakamāoni i nā tamā mea, ka hē fakamāoni foki i nā mea lalahi. 11Kāfai la koe kua hē fakamāoni i te kikilaga o nā koloa e maua i ni auala hē fakamāoni, e vēhea la ona mafai ke tuku atu nā koloa moni, ke kikila e koe? 12Ma kāfai koe kua hē fakamāoni i nā mea a hētahi tino, ko ai la te ka ia fōki atua kia te koe, nā mea lava a koe?
13“E hēai he tino e mafai ke kaukauna ki ni matai e toka lua; auā ka ita ki tētahi, kae alofa ki tētahi; ka fakamāoni ki tētahi kae inoino ki tētahi. E hē mafai koe ke kaukauna uma ki te Atua ma ki nā tupe.” #Mat 6.24
Ko Iētahi o Fakakupuga a Iehu
(Mat 11.12-13; 5.31-32; Mlk 10.11-12)
14I te lagona atuga o nā mea uma iēnei e te kau Falehaio, oi na fai ai a lātou kupu fakatauemu kia Iehu, auā ko kilātou ni tino nae fiafia ki nā tupe. 15Kua vāgana atu ia Iehu kia te kilātou, “Ko koutou iēnā e fia āmiotonu i mua o tagata, kae e kitea e te Atua nā mea i nā loto o koutou. Auā ko nā mea e fakatāua i te kikila a te tagata, ni mea iēnā e inoino ki ei te Atua.
16“Ko nā Tūlāfono a Mohe ma nā tuhituhiga a te kau pelofeta, nae fakaaogā lava ke pa ki nā aho o Ioane te Papatiho; talu lava te kāmata o te folafolaga o te Tala Lelei e uiga ki te Mālō o te Atua, ko tagata uma lele e taumafai ke olo fakamālohi ki loto.#Mat 11.12-13 17Kae e faigōfie te mou kehe atu o te lagi ma te lalolagi, i lo te tōkehea o he koma, pe he mataituhi e fokotahi mai te Tūlāfono.#Mat 5.18
18“Ho he tamāloa e tatala e ia tana āvaga kae fakaipoipo ki hētahi fafine, kua agahala ia i te mulilua; ma ko te tamāloa e fakaipoipo ki he fafine kua tatala tana āvaga, kua agahala ia i te mulilua. #Mat 5.32; 1 Kol 7.10-11
Ko te Tamāloa Maukoloa ma Lahalo
19“Nae iei he tamāloa maukoloa nae lākei i ni kofu lanu violē ma fai i te kie lino e hili te lelei, ma nae kai i nā meakai nae pito hili te lelei, i aho uma. 20Ma nae i te faitotoka ki tona fale he tino mativa e igoa kia Lahalo, nae papala kātoa tona tino, 21ma nae fofou lele ke ia kaia nā matutuga nae malili ifo ki lalo mai te laulau a te maukoloa. E pa ki nā maile nae ōmamai oi hepo e kilātou nā papala o ia.
22“Kua oti te tino mativa, oi na kave ai e nā āgelu ke nofo i tafa o Apelaamo, i te kaiga i te lagi. Kua oti foki te tamāloa maukoloa, oi na tanu ai; 23ma i loto o Heoli, te nofoaga kua maua ai ia i te pagātia, kua kikila ake ki luga oi ia kitea mamao atu ai ia Apelaamo, ma Lahalo e i tētahi ona itū. 24Oi na kalaga atu ai vē, ‘Toku tamana e, Apelaamo! Alofa mai kō. Uga mai kō ia Lahalo ke lolō tona muamuālima ki ni vai, ma fakamālū ake ai toku laulaufaiva, auā ko au nei kua tīgāina i te mumū o te afi tēnei!’
25“Kae kua lea vē atu ia Apelaamo, ‘Toku ataliki, e manatua e koe, i tō olaga kātoa, nae maua e koe nā mea lelei uma, kae nae maua e Lahalo nā mea kino uma. Kae nei, kua fiafia ia Lahalo i kinei, kae kua maua koe i nā tīgā. 26E hē gata i tēnā, kua iei te vanu loloto kua i te vā o kitātou, kae ke nahe mafai ai ni tino e fia ōatu mai kinei ki kinā, pe ni tino mai kinā e fia ōmamai ki kinei.’ 27Kua lea vē atu te maukoloa, ‘Ko au la e fakatagi atu kia te koe Apelaamo te tamana, uga kō ia Lahalo ki te fale o toku tamana, 28auā e toka lima oku uho—ke fakailoa ki ei kae ke nahe ōmamai ai ki te nofoaga tēnei o puapuagā.’
29“Na tali atu ia Apelaamo, ‘Kua ia te kilātou ia Mohe ma te kau pelofeta.#16.29 Mohe ma te kau pelofeta E fakatatau ki nā tuhituhiga a Mohe ma te kau pelofeta i te Feagaiga Tuai E tatau la nā uho o koe, ke fakalogo ki nā mea e lea ai kilātou.’ 30Na tali mai te maukoloa, ‘Apelaamo te tamana, e hē lava ai! Kae kāfai he tino kua toe fakatū mai i te oti e fano ki ei, oi ka mafai ai kilātou ke halamō.’ 31Kae kua lea atu ia Apelaamo, ‘Kāfai ka hē fakalogo kilātou kia Mohe ma te kau pelofeta, e tuha lava pe iei he tino e fakatū mai te oti, ka hē mafai lava kilātou ke talitonu.’ ”
Currently Selected:
Luka 16: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
