Luka 13
13
Toe Liliu ki te Atua
1Nae iei ni tino nae i kinā i te taimi tēnā, na kilātou takua kia Iehu e uiga ki nā tino Kalilaia na tāmate e Pilato ka koi ofo atu a lātou tāulaga mū ki te Atua. 2Kua tali atu ia Iehu kia te kilātou, “I te kikila a koutou, e hili atu nei te kino lahi o nā agahala a nā tino Kalilaia iēnei, i lo iētahi tino Kalilaia, ona na tāmate i he auala vēnei? 3E lea atu au, e hēai! Kae kāfai koutou e hē halamō i autou agahala, ko koutou uma ka feoti foki vēnā. 4Kae e vēhea nā tino e toka hefuluvalu na holo ki luga o kilātou te fale maualuga i Hiloma, ma na feoti ai? I te koutou kikila, e hili atu nei to lātou holi tūlāfono i lo iētahi tino uma lele nae nonofo i Ieluhalema? 5E lea atu au, e hēai! Kae kāfai koutou e hē halamō i autou agahala, ko koutou uma ka feoti foki vēnā.”
Ko te Talafakatuha o te Mati e hē Fua
6Oi na fai ai e Iehu te talafakatuha tēnei: “E iei he tamāloa na totō e ia he mati i loto o tona tōvine; ma na fano ai oi kikila pe kua iei ni fuāmati, kae na hēki ia maua he mea. 7Oi na lea vē atu ai ki tana tino tauhi tōvine, ‘Kikila mai ake, kua tolu nei ia tauhaga e tauahiahi mai e au te mati pe iei ni fua, kae e hēai he mea e fokotahi. Ta ki lalo! Heā te ka fakamāumau ai te kelekele ki ei?’ 8Na tali mai te tauhi tōvine, ‘Te toeaina, tuku vē kō mo he tahi tauhaga lava e fokotahi, ke fano au oi keli fakatāmilo, ma togi ki loto ni mea fakalelei kelekele. 9Kāfai e fua mai ni ona fua i te tauhaga ka ala nei, kai te gali; kae kāfai e hēai, oi kua ta ai loa ki lalo.’ ”
Kua Fakamālōlō e Iehu he Fafine i te Hāpati
10Ko Iehu nae akoako atu i hētahi hūnako, i te Hāpati. 11Ma nae i kinā he fafine, kua kātoa te hefulu valu tauhaga e fakapipili e he agaga kino. Na punou lahi lele ki lalo ma na hēki mafai e ia ke toe tū hako ki luga. 12I te kiteaga e Iehu o te fafine, oi na kalaga atu ai ki ei ke fanake, ma na lea vē atu ai ki ei, “Te māfine, ko koe kua mālohi mai tō tauale!” 13Na fakauta atu ai ona lima ki luga o te fafine, ma ko te taimi lava tēnā na tū hako ake ai ki luga te fafine, ma na viviki ake ai ki te Atua.
14Ka ko te takitaki o te hūnako, na ita lele auā kua fakamālōlō e Iehu he tauale i te Hāpati. Kua lea vē atu ia ki nā tino, “E ono ia aho e tatau ke fai ai nā gāluega; ōmamai i nā aho iēnā ke fakamālōlō ai koutou, kae hē i te Hāpati!” #Eho 20.9-10; Teu 5.13-14
15Kae na tali atu te Aliki ki ei, “Ko koutou ni tagata āmio pepelo! E hē tatala moni nei e he tino o koutou tana pōvi, pe ko tana āhini mai te falemanu i te Hāpati, ma takitaki kehe ke fakainu? 16Ka ko te lāpuna tēnei o Apelaamo, kua kātoa te hefulu valu tauhaga e noanoatia e Hatani; e hē tatau nei ke tatala i te Hāpati?” 17Ko tana tali tēnei na lagona ai te māhiahi e nā tino nae feita kia te ia; ka ko te kaifenua kātoa kua fiafia lele, ona ko nā mea lelei uma kua ia faia.
Ko te Talafakatuha o te Hīnapi
(Mat 13.31-32; Mlk 4.30-32)
18Oi na fehili atu ai ia Iehu, “E vēhea nei te Mālō o te Atua? Heā nei te ka fakatuha e au ki ei? 19E fakatuha ki he fatu hīnapi e kave e he tamāloa oi totō i tona fātoaga; ma e ola ake ma kavea ma lākau, ma ōmamai ai nā manulele oi fai o lātou ōfaga i ona lālā.”
Ko te Talafakatuha o te Mea Fakafefete
(Mat 13.33)
20Kua toe lea atu ia Iehu, “Ko heā nei te ka fakatuha e au ki ei te Mālō o te Atua? 21E vēia ko te fefete e fakaaogā e he fafine ke fai ai he falaoa. E ui lava ni tamā mea fefete te palu e ia ki ni fuagā falaoa e tolu, kae e fefete uma ai te paluga kātoa.”
Ko te Faitotoka Vāiti
(Mat 7.13-14, 21-23)
22Oi na kui atu ai ia Iehu i nā tamā kakai ma nā nuku i tana malaga ki Ieluhalema, ma akoako atu ki tagata. 23Oi na lea vē atu ai he tino ki ei, “Te aliki, ni tamā tino oioti nei te mafai ke fakaola?”
Na tali atu ia Iehu kia te kilātou, 24“Taumafai ke kui koutou ki loto i te faitotoka vāiti; auā e lea atu au kia te koutou, e tokalahi nā tino ka taumafai ke kui ai, kae ka hē mafai. 25E pa loa ki te taimi e tū ai ki luga te tino e o ia te fale oi tapuni te faitotoka, ko koutou ka kāmata oi tutū i fafo ma tukituki te faitotoka ma lea vē, ‘Te aliki, tatala mai kō te faitotoka kia te kimātou!’ oi ka tali vē mai ia kia te koutou, ‘E hē kō iloa koutou pe ōmamai i fea!’ 26Oi ka lea vē atu koutou kia te ia, ‘Ko kimātou nae kakai ma inu fakatahi ma koe; ko koe nae akoako atu ki tagata i luga o nā auala o to mātou nuku!’ 27Kae ka tali vē mai ia, ‘E hē kō iloa pe ko koutou e ōmamai i fea! Olo kehe ma au, koutou uma nā tino faiāmio mātagā!’ #Hal 6.8 28Ka lauē ma katigū outou nifo kāfai e koutou kitea atu ia Apelaamo, ia Ihaako ia Iakopo, ma nā pelofeta uma lele i te Mālō o te Atua, i te taimi e togi ai koutou ki fafo! #Mat 22.13; 25.30#Mat 8.11-12 29Ma ka ōmamai nā tino mai hahae ma hihifo, mai mātū ma haute, oi nonofo ki lalo i te kaiga lahi i te Mālō o te Atua. 30Ma ko nā tino e mulimuli i te taimi nei, ka kavea ma muamua, ma ko nā tino e muamua i te taimi nei, ka kavea ma mulimuli.” #Mat 19.30; 20.16; Mlk 10.31
Ko te Alofa o Iehu kia Ieluhalema
(Mat 23.37-39)
31I te taimi lava tēnā na ōmamai ai iētahi Falehaio kia Iehu, ma lea vē mai ki ei, “Fano kehe ma kinei, auā ko Helota e fofou ke tāmate koe.”
32Na tali atu ia Iehu kia te kilātou, “Olo oi lea ki te ālope tēnā, ‘Kikila, e tuli e au nā tēmoni ki fafo ma fakamālōlō nā tauale i te aho nei, ma tāeao, ma i tona tolu o aho ka fakauma ai aku gāluega.’ 33Kae e tatau lava ke fakaauau taku malaga i te aho nei, tāeao, ma te aho e hohoko mai; auā e hē tatau ke tāmate he pelofeta i hētahi mea, vaganā ai i Ieluhalema.
34“Ieluhalema, Ieluhalema! Kua tāmate e koe nā pelofeta ma fetogi nā kavefekau na uga atu e te Atua kia te koe! E lahi lele nā taimi na fia ōpoipoi mai ai au fānau i oku lima, e vē oi fakamāopōpo mai e he kaumatua moa tana ōfaga ki lalo o ona kapahau, kae ko koutou na mumuhu! 35Ma ko te mea ia ka tīaki ai te Mālumalu o koe. Ma e takutino atu e au kia te koe, ka hē kē toe kitea au, heiloga kua pa ki te taimi e lea vē ai koe, ‘Ke fakamanuia e te Atua tē e hau i te igoa o te Aliki!’ ” #Hal 118.26; Iel 22.5
Currently Selected:
Luka 13: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
