Levitika 15
15
Nā Hua hē Mamā mai te Tino
1Na vāgana te Aliki kia Mohe ma Alona, 2“Tautala ki nā tino Ihalaelu ma lea vē ki ei: ‘Kāfai he tamāloa e hau ai he hua o te tino mai ia te ia lava, ka hē mamā ia i nā tu tau tāpuakiga. 3Pe ko te hua e fano lava ki fafo pe poloka, ka hē mamā ai lava ia i nā tu tau tāpuakiga. Ko tēnei te auala ka hē mamā ai ia i te hua e hau mai ia te ia lava:
4“ ‘Ho he moega e nofo pe takoto ki luga te tamāloa e hau ai te hua ia te ia lava, ka hē mamā i nā tu tau tāpuakiga. 5Ho he tino e paki atu ki tona moega e tatau ke ufi ona kofu ma tākele, ma ka hē mamā ia i nā tu tau tāpuakiga ke pa ki te afiafipō. 6Ho he tino e nofo ki luga o he mea na nofo ki ei te tino e hau ai te hua, e tatau ke ufi ona kofu ma tākele i ni vai, ma ka hē mamā ia i nā tu tau tāpuakiga ke pa ki te afiafipō.
7“ ‘Ko ai lava he tino e paki atu ki te tino e hau ai te hua, e tatau ke ufi ona kofu ma tākele i ni vai, ma ka hē mamā ia i nā tu tau tāpuakiga ke pa ki te afiafipō.
8“ ‘Kāfai te tino e hau ai te hua e feanu ki he tino e mamā, e tatau ke ufi e ia tēnā ona kofu ma tākele i ni vai, ma ka hē mamā ia i nā tu tau tāpuakiga ke pa ki te afiafipō.
9“ ‘Ho he nofoa holofanua e nofo ki luga te tino e hau ai te hua, ka hē mamā, 10ma ko ai lava he tino e paki atu ki he mea na nofo ki ei te tamāloa e hau ai te hua, ka hē mamā ia i nā tu tau tāpuakiga ke pa ki te afiafipō. Ko ai lava e hikia ki luga ho he mea o nā mea iēnei, e tatau ke ufi ona kofu ma tākele i ni vai, ma ka hē mamā ia i nā tu tau tāpuakiga ke pa ki te afiafipō.
11“ ‘Kāfai he tamāloa e hau ai te hua e paki atu ki hētahi tino ka ko hēki fafanoa muamua ona lima, e tatau te tino tēnā ke ufi ona kofu ma tākele i ni vai, ma ka hē mamā ia i nā tu tau tāpuakiga ke pa ki te afiafipō.
12“ ‘Ho he ulo ele e paki ki ei te tino e hau ai te hua, e tatau ke tatake; kāfai ho he tānoa lākau, e tatau ke fufulu i ni vai.
13“ ‘Kāfai te tamāloa kua fakamamāgia ma kua hē toe hau ai he hua, e tatau ia ke fakatali mo ni aho e fitu, oi ufi ai ona kofu ma tākele i ni vai, ma ka mamā ai ia i nā tu tau tāpuakiga. 14I te valu o aho, e kave e ia ni lupe vao e lua, pe ni lupe e lua o te itūkāiga taigogole ki te faitotoka o te Falekie Tapu, ma tuku atu ki te ohitāulaga. 15Ka ofo atu e te ohitāulaga tētahi lupe mo he tāulaga mo nā agahala ma tētahi mo he tāulaga mū. I te faiga tēnei ka fakatino ai e te ohitāulaga te hāuniga mo te fakamamāgia i nā tu tau tāpuakiga, o te tamāloa i mua o te Aliki.
16“ ‘Kāfai he tamāloa e hau ia te ia lava te hua tamāloa, e tatau ke tākele tona tino kātoa i ni vai, ma ka hē mamā ia i nā tu tau tāpuakiga ke pa ki te afiafipō. 17Ho he mea e fai i te kie pe i te pakumanu e pakū ki luga te hua tamāloa, e tatau ke ufi, ma ka hē mamā i nā tu tau tāpuakiga ke pa ki te afiafipō. 18Kāfai he tamāloa e momoe ma he fafine ma e hau ai ki fafo tona hua tamāloa, ko kilāua uma e tatau ke tākekele i ni vai, ma ka hē mamā kilāua i nā tu tau tāpuakiga ke pa ki te afiafipō.
19“ ‘Kāfai he fafine e maua i te tauale o fafine, ka tūmau tona hē mamā i nā tu tau tāpuakiga mo ni aho e fitu. Ho he tino e paki ki te fafine, ka hē mamā ia i nā tu tau tāpuakiga ke pa ki te afiafipō.
20“ ‘Ho he mea e nofo pe takoto ia ki luga ka koi maua ia i te tauale o fafine, ka hē mamā. 21Ho he tino e paki atu ki tona moega e tatau ke ufi ona kofu, ma tākele i ni vai, ma ka hē mamā ia i nā tu tau tāpuakiga ke pa ki te afiafipō. 22Ho he tino e paki ki ho he mea e nofo te fafine ki luga, e tatau ke ufi ona kofu ma tākele i ni vai, ma ka hē mamā ia i nā tu tau tāpuakiga ke pa ki te afiafipō; 23pe ko te moega pe ko ho hētahi lava mea e nofo te fafine ki luga, ka hē mamā i nā tu tau tāpuakiga ke pa ki te afiafipō.
24“ ‘Kāfai he tamāloa e momoe ma ia, ma pīhia ai ia i te hē mamā o te fafine, ka hē mamā ia i nā tu tau tāpuakiga mo ni aho e fitu; ma ko ho he moega e takoto ia luga ka hē mamā.
25“ ‘Kāfai he fafine e fano ai te palapala i ni aho e lahi, kae e hē ona e maua i te tauale o fafine, pe mataloa atu foki te taimi e fano ai tona palapala i lo te taimi kua māhani ai mo te tauale o fafine, ka tūmau pea tona hē mamā i nā tu tau tāpuakiga ke pa ki te taimi e uma ai te fano o tona palapala. 26Ho he moega e takoto pe nofo ia ki luga i nā aho uma e fano ai tona palapala, ka hē mamā. 27Ho he tino e paki atu ki nā mea iēnei, ka hē mamā ia i nā tu tau tāpuakiga, ma e tatau ke ufi ona kofu, ma tākele i ni vai, ma ka hē mamā ia ke pa ki te afiafipō.
28“ ‘Kāfai kua uma te fano o tona palapala, ka fakatali ia mo ni aho e fitu, oi ka mamā ai ia i nā tu tau tāpuakiga. 29I te valu o aho, ka kaumai e ia ni lupe vao e lua pe ni lupe e lua o te itūkāiga taigogole, ki te ohitāulaga i te fāitotoka o te Falekie Tapu. 30Ka ofo atu e te ohitāulaga tētahi lupe mo he tāulaga mo nā agahala, ma tētahi mo he tāulaga mū. I te faiga tēnei, ka fakatino ai e te ohitāulaga te hāuniga mo te fakamamāgia o te fafine i nā tu tau tāpuakiga, i mua o te Aliki.
31“ ‘Ko te mea ia e tatau ai ke vavae kehe e koulua nā tino Ihalaelu mai nā mea e hē mamā ai kilātou i nā tu tau tāpuakiga, kae ke nahe mamate ai kilātou ona kua holi e kilātou te paia o toku Falekie Tapu, tēia e i te mea e iei ai kilātou.’ ”
32Ko nā folahaga iēnei e fakatatau ki he tamāloa e hau ai he hua o te tino ia te ia lava, pe ko he hua tamāloa, ma e hē mamā ai ia, 33pe ki he fafine i te taimi e maua ai i te tauale o fafine. E fakatatau ki ho he tamāloa pe he fafine e hau mai tona tino ni mea e he mamā ai, ma mo he tamāloa e momoe ma he fafine e hē mamā i nā tu tau tāpuakiga.
Currently Selected:
Levitika 15: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
