Levitika 11
11
Nā Meakai e Mamā ma nā Meakai e hē Mamā.
(Teu 14.3-21)
1Oi na vāgana ai te Aliki kia Mohe ma Alona, 2“Fōki nā fakahinoga iēnei ki nā tino Ihalaelu: ‘O nā manuvaefa uma e ola i luga o te fenua, ko iēnei nā manuvaefa e mafai ke kakai koutou ki ei. 3E mafai koutou ke kakai ki ho he manuvaefa e magamaga nā tapuvae ma toe lamu ana mutia na kai muamua.
4“ ‘E iei iētahi e toe lamu oioti a lātou mutia na kai muamua, pe magamaga oioti nā tapuvae; ko koutou e hē kakai ki nā manuvaefa iēnā. Ko te kāmela, e ui e toe lamu ana mutia na kai muamua, kae e hē magamaga ona tapuvae; oi e hē mamā#11.4 I nā tu tau tāpuakiga mo koutou. 5Ko te hapana, e ui e toe lamu ana mutia na kai muamua, kae e hē magamaga ona tapuvae; oi e hē mamā mo koutou. 6Ko te lapiti, e ui e toe lamu ana mutia na kai muamua, kae e hē magamaga ona tapuvae; oi e hē mamā mo koutou. 7Ma ko te puā, e ui e magamaga ona tapuvae, kae e hē ia toe lamua ana mea na kai muamua; oi e hē mamā mo koutou. 8E hē tatau ke kakai koutou ki nā kanofi o nā manu iēnei, pe paki atu koutou ki ei kāfai kua mamate; e hē mamā kilātou mo koutou.
9“ ‘O nā meaola uma e ola i loto o nā vai o te tai ma o nā vaitafe, ma e iei o lātou tala ma unafi, e mafai ke kakai koutou ki ei. 10Kae ko nā meaola uma i te tai pe i nā vaitafe e hēai ni tala ma ni unafi—pe o te itūkāiga e fano fakafāgota, pe o iētahi itūkāiga meaola i te vai—e hē mamā mo koutou. 11Ko nā meaola uma iēnā e hē mamā mo koutou, ma e hē tatau ke kakai koutou ki ei, pe ke paki koutou ki ei kāfai kua mamate. 12Ho he mea e ola i te vai pe i te tai, kae e hēai ni ona tala ma ni unafi, e hē mamā mo koutou.
13“ ‘Ko iēnei nā manulele e hē mamā mo koutou, ma e hē tatau ke kakai koutou ki ei: ko te āeto, te pelehe, te ohikaha, 14te akaha, te takaha o ho he itūkāiga; 15te ōleva o ho he itūkāiga; 16te ohitelihi, te lulu taliga pukupuku, te gogo, te nehi o ho he itūkāiga; 17te lulu taigole, te kolomolana, te lulu kena, 18te lulu fale, te lulu toafa, te lahama 19te hitoko, te matuku o ho he itūkāiga, te hopoe, ma te peka.#11.19 Ko iētahi o nā manulele e tākua i nā fuaikupu 13-19 e hē mautinoa tonu nā igoa i nā aho nei
20“ ‘Ko nā iniheti faikapahau uma e hāvavali i o lātou vae, e hē mamā. 21Kae o nā iniheti faikapahau iēia e hāvavali i o lātou vae, e mafai ke kakai koutou ki te itūkāiga e hokohoko nā vae ke tūtaoho ai i luga o te kelekele. 22O nā iniheti iēnei, e mafai koutou ke kakai ki te hē-akelihe ma ho hētahi o te itūkāiga tēnei, ki te hē hakapa ma ho hētahi o te itūkāiga tēnei, ki te ligoligo ma ho hētahi o te itūkāiga tēnei, ma ki te hē ma ho hētahi o te itūkāiga tēnei. 23Kae ko iētahi itūkāiga iniheti taigogole e fai kapahau ma e totolo foki, e hē mamā mo koutou.
24“ ‘Ko nā manuvaefa iēnei e hē mamā#11.24 I nā tu tau tāpuakiga ai koutou; ko ai lava e paki ki te tino mate o ho hētahi o nā manu iēnei, ka hē mamā ia ke pa ki te afiafipō, 25ma ko ai lava e hikia he vāega o te tino mate, e tatau ke ufi ona kie, ma ka hē mamā ke pa ki te afiafipō.
26“ ‘Ko nā manuvaefa uma e hē magamaga nā tapuvae pe hē toe lamua a lātou meakai kāfai kua uma te kai, e hē mamā mo koutou; ho he tino e paki atu ki ei, ka hē mamā ai foki ma ia. 27Ko nā manuvaefa uma e hāvavali i te malū o olātou alofivae, e hē mamā mo koutou. Ho he tino e paki atu ki tino mate o hētahi o nā manuvaefa iēnei ka hē mamā ke pa ki te afiafi, 28ma ko te tino e hiki e ia e tatau ke ufi ona kie ma ka hē mamā ke pa ki te afiafipō.
29“ ‘O nā meaola uma e totolo i luga o te kelekele, ko nā meaola iēnei e hē mamā mo koutou: ko nā kimoa tatanu, nā kimoa, ma nā pili fuaefa, 30ko nā moko, nā pili leta, nā pili koa, nā pili one, ma nā kamilione. 31O nā meaola uma e totolo i luga o te kelekele, ko nā meaola iēnā e hē mamā mo koutou. Ko ai lava e paki ki hētahi o nā meaola iēnei ka hē mama ke pa ki te afiafipō. 32Kāfai hētahi o nā meaola iēnei e mate ma pakū ki luga o he mea, ko te mea tēnā, pe ko heā lava te fakaaogā ki ei, ka hē mamā, pe he mea e fai i te lākau, he kie, he pakumanu, pe he kie taga. E tatau ke lolō ki loto o ni vai, ma ka hē mamā ke pa ki te afiafipō, oi fātoā mamā ai. 33Kāfai he meaola vēnei e pakū ki loto o he uloele, ko nā mea uma i loto o te uloele tēnā ka hē mamā, ma e tatau ke tatake e koutou te uloele. 34Ho he meakai e fakataga koutou ke kakai ki ei ma e mafuli ki luga ni vai mai te uloele tēnei, ka hē mamā, ma ho he huāvai e mafai ke inu mai loto o he uloele vēnā, ka hē mamā. 35Ho mea e pakū ki luga ho he vāega o te tino mate o te itūkāiga meaola tēnei ka hē mamā; kāfai ko he ogāumu pe ko he ulo tunu meakai, e tatau ke tatake. E hē mamā nā mea iēnei, ma ka tūmau to lātou hē mamā mo koutou. 36Kae ko he vaipuna pe ko he tane vai ka mamā, e ui lava ko ho he mea e paki ki te tino mate o he meaola i loto, ka hē mamā. 37Kāfai he vāega o te tino mate e pakū ki luga o ni fatu lākau e tuku e totō, ko nā fatu lākau iēnā ka tūmau te mamā. 38Kae kāfai nā fatu lākau e i loto o ni vai, ma e pakū he vāega o te tino mate ki luga, ka hē mamā la nā fatu lākau iēnā mo koutou.
39“ ‘Kāfai he manuvaefa e fakataga koutou ke kakai ki ei e mate, ho he tino e paki ki tona tino mate ka hē mamā ke pa ki te afiafipō. 40Ho he tino e kai ki he vāega o te manu kua mate, e tatau ke ufi ona kofu, ma ka hē mamā ia ke pa ki te afiafipō. Ho he tino e ia hikia ki luga he manu kua mate, e tatau ke ufi ona kofu ma ka hē mamā ia ke pa ki te afiafipō.
41“ ‘Ko nā meaola uma e totolo i luga o te kelekele e hē mamā, ma e hē tatau ke kakai koutou ki ei. 42Ho he meaola e hoholo i tona manava, ma pe havali i ona vae, pe fia foki te lahi o ona vae, nā meaola uma e totolo i luga o te kelekele, ko koutou e hē kakai ki ei, auā e hē mamā. 43Nahe koutou faia he mea e hē mamā ai koutou e ala ia te kilātou pe ona kua kakai koutou ki ni mea vēnei. 44#Lev 19.2; 1 Pet 1.16Auā ko au ko te Aliki te koutou Atua; ke fakapaiagia la outou tagata auā ko au e paia. Nahe koutou faia la he mea ke hē mamā ai koutou e ala i ho he meaola e totolo i luga o te kelekele 45Ko au ko te Aliki na kaumaia koutou mai Aikupito, kae ke kavea ai au ma outou Atua. Ko koutou e tatau ke paia, auā ko au e paia.
46“ ‘Ko iēnei la nā folahaga e fakatatau ki nā manuvaefa, nā manulele, nā meaola uma e ola i loto o nā vai, ma nā meaola uma e totolo i luga o te kelekele. 47E tatau ke mautinoa e koutou te kehekehega i te vā o nā mea e hē mamā ma nā mea e mamā,#11.47 I nā tu tau tāpuakiga ma nā meaola e mafai ke kakai ki ei, ma nā meaola e hē tatau ke kakai ki ei.’ ”
Currently Selected:
Levitika 11: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
