Levitika 10
10
Ko te agahala a Natapu ma Apihu.
1Ko nā ataliki o Alona, ia Natapu ma Apihu, na tofu ma te ulo fakamū meamanogi kua i loto ai ni malala ola ma ni meamanogi, oi ofo atu ai e kilāua ki te Aliki. Kae ko te afi tēnei e hē paia, ona e hēki fakatonua kilāua e te Aliki ke ofo ake ai te tāulaga. 2Ma na hau ai ki fafo he afi mai te fakatahi mai o te Aliki ma na mū ai kilāua ma feoti, i mua o te Aliki. 3Oi na lea atu ai ia Mohe kia Alona, “Ko tēnei te uiga o te mea na vāgana mai ai te Aliki, i te lea vē maiga:
‘Ka fakaali e au toku paia
e ala ia te kilātou e ōmamai ki oku tafa.
Ka fakaali e au toku mamalu
i mua o tagata uma.’ ”
Kae ko Alona na hēki magagū lele.
4Na kalaga atu ai ia Mohe kia Mihaelu ma Elehapana nā ataliki o Uhielu, te uho o te tamana o Alona, ma lea vē atu, “Ōmamai ki mua nei oi kave kehe nā tinooti o nā kāiga o koulua, mai mua o te nofoaga paia ma kave ki fafo o te api.” 5Oi na ōmamai ai te toka lua oi hiki nā tinooti i o lā kofu ki fafo o te api, e vē lava ko te fakatonuga a Mohe.
6Ma na lea atu ai ia Mohe kia Alona ma ona ataliki ko Eleahala ma Itamala, “Nahe fakakefua nā ulu o koutou, pe hae outou kofu, ke iloa ai ko koutou e fakanoanoa. Kāfai e koutou faia te mea tēnā, ko koutou ka feoti ma ko te tōkahā o te Aliki ka pakū ki luga o te fakapotopotoga kātoa. Kae ko nā kāiga o koutou ma tagata uma o Ihalaelu, e mafai ke fai fakanoanoa mo nā tino kua fakatāugā e te Aliki i te afi. 7Ko koutou e hē olokehe mai te fāitotoka o te Falekie Tapu nā ia koutou e feoti, auā ko koutou kua uma te fakauku i te lolo fakauku a te Aliki.” Ma na fai lava e kilātou e vē ko te fakatonuga a Mohe.
Nā Tūlāfono mo nā Ohitāulaga.
8Ma na vāgana ai te Aliki kia Alona, 9“Ko koe ma nā ataliki o koe e hē inu ki te uaina pe ki ho hētahi meainu e fakavī, i ho he taimi e ulu ai koutou ki loto o te Falekie Tapu. Kāfai e koutou faia te mea tēnei ko koutou ka feoti. Ko he vāiniuga tūmau tēnei mo augā tupulaga uma ke pa ki te hēgata. 10E tatau ke fakavahega e koe nā mea e paia ma e mo te Atua, ma nā mea e hē paia ma e fakaaogā ki ho he mea; nā mea e mamā i nā tu tau tāpuakiga, ma nā mea e hē mamā. 11Ma ka akoako e koe nā tino uma o Ihalaelu i nā vāiniuga uma na kō fōkiatua kia te koutou, e ala ia Mohe.”
12 #
Lev 6.14-18
Na lea atu ia Mohe kia Alona ma ona ataliki e toka lua koi totoe, ia Eleahala ma Itamala, “Kave te tāulaga haito tēia na totoe mai i nā tāulaga fakapitoa ki te Aliki na fai i te afi, oi tunu ai ni falaoa hē fakafefetea, ma kai i tafa o te fata faitāulaga, auā ko he tāulaga tēnā e hili te paia. 13Kakai ki ei i he koga e paia; ko te vāega tēnā o koe ma ō ataliki mai te tāulaga e ofo atu ki te Aliki i te afi. Ko tēnā te fakatonuga a te Aliki kia te au. 14#7.30-34Kae ko koe ma nā kāiga o koe e mafai ke kakai ki te fatafata tēia na hiki ki luga ma meālofa fakapitoa, ma ki te ālaga tēia na ofo mai e nā tino Ihalaelu. Kakai ki ei i he mea e mamā i nā tu tau tāpuakiga; ko te vāega tēnā o koe ma tau fānau mai te tāulaga mo te māfuta fakatahi a tagata Ihalaelu. 15Ka kaumai e kilātou te ālaga ma te fatafata na hiki ki luga, i te taimi e ofo atu ai te gako ma meālofa meakai ki te Aliki. Ko nā vāega iēnei e mo koe ma nā lāpuna o koe ke pa ki te hēgata, e vē ona fakatonu mai e te Aliki.”
16Na fehili ia Mohe e uiga ki te oti mo te tāulaga mo nā agahala, ma na ia iloa ai kua uma te huhunu. Na ita lahi lele ia Mohe kia Eleahala ma Itamala, nā ataliki o Alona koi totoe, ma na lea vē ai, 17#Lev 6.24-26“Heā te hēki kai ai e koulua te tāulaga mo nā agahala, i he koga paia? Ko te tāulaga tēnei e paia lele, ma kua fōkiatu e te Aliki kia te koutou, ke kave kehe ai te nofohala o te fakapotopotoga a tagata Ihalaelu. 18Ona ko te toto o te manu e hēki kaumaia ki loto o te Nofoaga Paia, na tatau ai ke kai e koutou i he koga paia, e vē ona fakatonu atu e au.”
19Na tali atu ia Alona kia Mohe, “Kikila, ko te aho nei na ofo atu ai e tagata te lātou tāulaga mo nā agahala ma te lātou tāulaga mū ki te Aliki; kae ko nā mea e vē ko nā mea iēnei, kua tupu kia te au. Ānei ake na kai e au te tāulaga mo nā agahala i te aho nei, na talia nei e te Aliki te mea tēnā?” 20I te lagona atuga e Mohe o te mea tēnei, na malie tona loto.
Currently Selected:
Levitika 10: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
