Levitika 9
9
Kua Ofo atu e Alona nā Tāulaga.
1I te aho na hohoko ki te aho na fakauma ai nā hāuniga o te fakaukuga, na fakapotopoto mai ai e Mohe ia Alona ma ona ataliki, ma vēnā ma nā toeaina o Ihalaelu. 2Ma na lea vē atu ai ia Mohe kia Alona, “Kave he punuāpōvi poa ma tāulaga mo nā agahala, ma he māmoe poa ma tāulaga mū; ni manu e hēai ni māila i o lā tino, ma ofo atu ki te Aliki. 3Oi lea ai ki nā tino Ihalaelu ke kaumai he oti poa mo he tāulaga mo nā agahala, he punuāpōvi poa ma he punuāmāmoe kua taki tauhaga te mātutua ma e hēai ni māila i nā tino, ke fai ma tāulaga mū, 4ma he pōvi poa ma he māmoe poa, mo he tāulaga mo te māfuta fakatahi. E tatau ke ofo atu e kilātou ki te Aliki, fakatahi ma he tāulaga haito e palu i te lolo olive. Auā ko te aho nei te ka fakakitea ai te Aliki kia te kilātou.”
5Na kaumai e kilātou ki mua o te Falekie Tapu nā mea uma na fakatonu ake e Mohe, ma kua fakapotopoto mai te nuku kātoa ke tāpuaki atu ki te Aliki. 6Kua lea vē atu ia Mohe, “Ko koutou kua fakatonu mai e te Aliki ke fai te mea tēnei, kae ke kikila ai koutou ki tona mamalu.” 7#Epe 7.27Oi na lea atu ai ia Mohe kia Alona, “Fano ki te fata faitāulaga oi ohi nā tāulaga mo nā agahala ma nā tāulaga mū, ke fakamāgalo ai au agahala, ma agahala a tagata. Ohi atu te tāulaga tēnei ke kave kehe ai ia agahala a tagata, e vē lava ko te fakatonuga a te Aliki.”
8Kua fano ia Alona ki te fata faitāulaga, ma tāmate te punuāpōvi poa o te tāulaga mo ana lava agahala. 9Kua fōki atu e ona ataliki te toto kia te ia, oi lolō ai tona muamuālima ki te toto ma fakapaki atu ai tona muamuālima ki nā nifohua i nā tulimanu o te fata faitāulaga; ko te toto na totoe na liligi e ia ki te tūlaga o te fata faitāulaga. 10Kae kua huhunu e ia i luga o te fata faitāulaga te gako, nā fatugako, ma te vāega lelei o te ate, e vē lava ko te fakatonuga a te Aliki kia Mohe. 11Kae ko te kanofi o te manu ma te kili, na huhunu e ia i fafo o te api.
12Oi na tāmate ai e ia te manu mo tana ia lava tāulaga mū. Kua kaumai te toto e ona ataliki kia te ia, oi na liaki ai e ia te toto ki nā itū uma e fa o te fata faitāulaga. 13Na kaumai fōki e kilātou kia te ia nā vāega takitaki uma o te tāulaga mū, vēnā ma te ulu, ma na huhunu ai e ia i luga o te fata faitāulaga. 14Na fufulu e ia nā tōtōga ma nā vae, oi huhunu fakatahi ai i luga o te fata faitāulaga ma iētahi vāega o te tāulaga mū.
15Na uma tēnā, oi na kaumai ai e Alona nā tāulaga mo tagata. Kua kave e ia te oti o te tāulaga mo nā agahala a tagata, kua tāmate ma ofo atu ai ma tāulaga mo nā agahala e vē ona ia faia muamua. 16Ma kaumai foki e ia te manu mo te tāulaga mū ma ofo atu e ia, e tuha ai ma nā folahaga. 17Kua kaumai e ia te tāulaga haito ma kave he lulukugā falaoa mata oi huhunu i luga o te fata faitāulaga. (Ko te tāulaga tēnei e fakaopōpo ki te tāulaga mū e fai i te tāeao o aho takitahi).
18 #
Lev 3.1-11
Kua tāmate e Alona te pōvi poa ma te māmoe poa mo he tāulaga mo te māfuta fakatahi, mo tagata. Oi na kaumai ai e ona ataliki te toto kia te ia, ma na liaki ai e ia ki nā itū uma o te fata faitāulaga. 19Oi na kave ai e ia te gako o te pōvi poa ma te māmoe poa—te gako o te pito māfiafia o te toke, ma te gako o nā tōtōga—nā fatugako ma nā lau o te ate. 20Kua tuku e ia nā vāega iēnei e lahi ai te gako ki luga o nā fatafata o nā manu, ma huhunu ai i luga o te fata faitāulaga. 21Oi na hiki ake ai ki luga e ia nā fatafata ma nā ālaga taumatau ke fai ma meālofa fakapitoa ki te Aliki, e tuha ai ma te fakatonuga a Mohe.
22 #
Nūm 6.22-26
Kua uma te ofo atu o nā tāulaga e Alona, oi na hiki ake ai ona lima ki luga āgai ki te fakapotopotoga, ma fakamanuia atu kia te kilātou; ma na fanaifo ai loa ki lalo mai te fata faitāulaga. 23Oi na olo ai ia Mohe ma Alona ki loto o te Falekie Tapu. I te toe ōmamaiga o kilāua ki fafo, na fakamanuia atu kilāua ki tagata, ma na kilātou kitea ai te huhulu pupula o te fakatahi mai o te Aliki. 24Na hahao vave he afi i te fakatahi mai o te Aliki, ma mū uma ai te tāulaga mū ma te gako i luga o te fata faitāulaga. I te kiteaga e nā tino o te mea tēnei, na taufai kālalaga kilātou i te fiafia ma ifo lele ki lalo ki te kelekele.
Currently Selected:
Levitika 9: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
