Kenehe 9
9
Ko te Feagaiga a te Atua ma Noa
1Ma na fakamanuia e te Atua ia Noa ma ona ataliki, ma na vāgana atu ai vē kia te kilātou, “Ke uluola koutou ma ke tokalahi autou fānau ke fakatumu ai te lalolagi.#Ken 1.28 2Ko nā manuvaefa uma i te lalolagi, nā manulele uma o te ea, ma nā meaola fetolofi uma i te kelekele ka mātataku ia te koutou, ma ko nā ika uma o te tai, ka tuku atu e au ki lalo o te pule a koutou. 3Ko nā mea uma e iei te ola ma e gāoioi, ka mafai ke kai e koutou; ma e vē ona fōki atu e au nā lākau lau olaola, e fōki atu e au ia mea uma ke fai ma autou meakai. 4E fokotahi lava oioti te mea e hē tatau ke kai e koutou, ko te kanofi manu koi iei te toto; e fakahā e au te mea tēnā, auā ko te ola e i te toto.#Lev 7.26-27; 17.10-14; Lev 19.26; Teu 12.16; 23; 15.23 5Ho te tino e fakauma e ia te ola o hētahi tino, ka pakū ki ona luga taku fakahalaga. Ka fakahala foki e au i te oti, ho he manu tāvao e fakauma e ia te ola o he tino. 6Ko ai lava e fakauma e ia te ola o hētahi tino, ka fakaumatia foki lava e hētahi tino tona ola. Auā ko te Atua lava te na ia gaohia te tagata ki tona fakatuha.#Ken 1.26; Eho 20.13 7Ma ko koutou ka uluola ma tokalahi autou fānau, ma haga tuputupu pea lava to lātou tokalahi i te lalolagi.”#Ken 1.28
8Oi na toe vāgana atu ai te Atua kia Noa ma ona ataliki, 9“Kikila, ko te taimi nei e fai ai taku feagaiga ma koutou ma nā lāpuna o koutou, 10vēnā ma nā meaola uma lele e ia te koutou—nā manulele, nā manu tauhi ma manu tāvao uma i te lalolagi—ma nā mea uma lele na olo kehe mai te vaka ma koutou. 11Ko tēnei taku feagaiga ma koutou: E takutino atu e au ka hē toe fakaumatia lele nā mea uma e iei te ola, i he lolo; ka hē toe iei lele foki he lolo, ke fakatāugā ai te lalolagi. 12Ko te fakailoga tēnei o te feagaiga e kō faia ma koutou vēnā ma nā mea uma lele e iei te ola. 13Kua tuku e au te nuanua ki loto o nā ao, ma ka kavea tēnā ma fakailoga o te feagaiga i te vā o oku ma te lalolagi. 14Ho he taimi lava e kō tataoa ai te lagi i nā ao kae tū mai he nuanua, 15ka manatua e au te feagaiga i te vā o oku ma koutou vēnā ma itūkāiga meaola uma lele; ka hē toe fakaumatiagia lele i he lolo ia mea uma e iei te ola. 16Kāfai e tū mai he nuanua i loto o nā ao, ka kikila au ki ei ma manatua ai e au te feagaiga e pa ki te hēgata, i te vā o oku ma nā mea uma lele e iei te ola, i te lalolagi.” 17Kua toe vāgana atu te Atua kia Noa, “Ko tēnā te fakailoga o te feagaiga kua fai i te vā o oku, ma nā mea uma e iei te ola i te lalolagi.”
Ko Noa ma Ona Ataliki
18Ko nā ataliki o Noa na olo kehe mai luga o te vaka, ko Hemu, ko Hamo, ma Iafeta (Ko Hamo ko te tamana ia o Kanana.) 19Ko kilātou iēnei toka tolu, ko nā ataliki o Noa, ma ko kilātou te na tupuga mai ai ia tagata uma i te lalolagi.
20Ko Noa he tino fai fātoaga ma ko ia te tino muamua na totōa he tōvine. 21Na inu e ia ni uaina, ma na konā ai. Oi kave kehe ai e ia ona lākei ma takoto ve ai e hē lākeia i loto o tona falekie. 22I te kiteaga e Hamo te tamana o Kanana, ko tona tamana e hē lākeia, oi fano ai ki fafo ma taku ki ona uho e toka lua. 23Oi na kave ai e Hemu ma Iafeta he kofu tatao e tāofi ki luga i o lā takuau, ma hāvavali holomuli ki loto o te falekie ma fakatāpulu ai to lā tamana; nae liliu kehe o lā mata, ma e hēki kilā kitea te hē lākeia o to lā tamana. 24Kua teka te konā o Noa, oi ia iloa ai te mea a tona ataliki tamaiti na fai kia te ia, 25oi na lea vē ai,
“Kanana, ko koe kua fetuku e au;
ko koe ka fai ma pologa a nā uho o koe.”
26Na lea vē foki,
“Ke vīkia te Aliki, te Atua o Hemu!
Ke kavea ia Kanana ma ana pologa.
27Ke fakatokalahi e te Atua ia lāpuna o Iafeta,#9.27 Iafeta Ko te igoa tēnei e tāli tutuha ma te fakaleoga o te kupu Epelu ko tona uiga fakatokalahi
ma ke nonofo fakatahi kilātou ma nā lāpuna o Hemu;
ma ke kavea ia Kanana ma ana pologa.”
28Kua teka atu te lolo, kae na ola pea lava ia Noa mo hētahi 350 tauhaga. 29Ma i te taimi na oti ai, kua 950 ona tauhaga.
Currently Selected:
Kenehe 9: TOKU
Highlight
Share
Copy
Want to have your highlights saved across all your devices? Sign up or sign in
Bible Society New Zealand Charitable Trust
Videos for Kenehe 9
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Ep 34. Genesis 10: How Noah’s Sons Shaped the World & God's Redemption Story
The Bible Show
Episode 19: Feeding of Four thousand with the Syrophonecian woman
The Bible Show