Kenehe 8
8
Kua Uma te Lolo
1Kae e hēki puli i te Atua ia Noa ma nā manu uma lele nae iei ma ia i luga o te vaka. Na fakaagi e ia he matagi ki luga o te vai nae tataoa te kelekele kātoa, ma na kāmata ai oi fano te vai ki lalo. 2Ko nā alāvai o vaipuna uma i lalo o te loloto o te kelekele ma fāitotoka o te vai i te vānimonimo, kua tapuni uma. Kua mao nā ua, 3ma na māui mālie atu ai lava te vai mai luga o te kelekele. I te umaga o nā aho e 150, ko te vai kua i lalo lele; 4ma i te hefulufitu o aho o te māhina e fitu, na kake ai te vaka i luga o he mauga o te atumauga o Alalata. 5Na fakaauau pea lava te māui o te vai, ma i te aho muamua o te māhina e hefulu, na hula ake ai ki luga ia tumutumu o nā mauga.
6Kua teka nā aho e 40, oi na tatala ai e Noa te fāmalama o te vaka na ia faia, 7ma na uga ai e ia he ōleva ke āhi pe kua mamago te vai i luga o te laukelekele. E hēki toe foki mai te ōleva kae kua felelelele holo, ke pa lava ki te taimi na māui uma ai te huāvai mai te laukelekele. 8Oi na uga ai e Noa he lupe ke āhi pe kua fano kehe uma te vai mai luga o te kelekele; 9kae na hēki maua e te lupe he mea ke tū ki luga ona vae, ma na toe foki ai kia Noa i luga o te vaka, ona ko te vai koi tatao ai lava te kelekele. Oi na papae atu ai te lima o Noa oi kaumai te lupe ki loto. 10Na fakatali ia Noa mo ni iētahi aho e fitu, oi na toe uga atu ai e ia te lupe. 11Ma na toe foki mai te lupe kia Noa i te afiafi, ma he lau olive fōu i tona gutu. Oi na iloa ai e Noa, ko te vai kua fano kehe mai luga o te kelekele. 12Oi na toe fakatalitali ai ia Noa mo ni iētahi aho e fitu, ma toe uga atu ai foki te lupe; ma e hēki toe foki mai kia te ia.
13I te kātoaga o te 601 tauhaga o Noa, i te aho muamua o te māhina muamua, ko te vai kua fano kehe uma mai te kelekele. Kua tatala kehe e Noa he vāega o te tuāfale o te vaka, ma taukikila holo ki fafo, ma na ia kitea ai ko te kelekele kua kāmata oi mātūtū. 14Ma i te 27 o aho o te māhina e lua, ko te laukelekele kātoa kua mātūtū.
15Oi na vāgana atu ai te Atua kia Noa, 16“Olo ki fafo mai te vaka, ko koe ma tau āvaga, ma ō ataliki ma a lātou āvaga. 17Kave uma ki fafo nā manulele, nā manuvaefa ma nā meaola fetolofi uma, ma ke fanafanau ma uluola kilātou ma ke halalau ki te lalolagi kātoa.” 18Oi na olo ai ki fafo mai te vaka ia Noa ma tana āvaga, ma ona ataliki, ma a lātou āvaga. 19Ma na olo foki ki fafo nā manuvaefa uma, nā meaola fetolofi uma ma nā manulele uma, fai vāega i o lātou itūkāiga takitahi.
Kua Ofo atu e Noa he Tāulaga
20Oi na fau ai e Noa he fata faitāulaga ki te Aliki; kua kave e ia e takitahi mai te itūkāiga o nā manuvaefa ma nā manulele e mamā i nā tu tau tāpuakiga, ma ofo atu ma tāulaga mū i luga o te fata faitāulaga. 21Ko te manogi o te tāulaga na fiafia ai te Aliki; oi na vē ifo ai te Aliki i tona loto, “Ka hē toe fetuku lele e au te laukelekele ona ko nā mea a tagata e fai; e iloa e au mai te taimi koi tamaiti ai kilātou, ko o lātou manatu nae kino. Ka hē toe fakaumatia lele e au nā mea uma e iei te ola, e vē ko te mea na fātoā uma atu te kō faia.
22“Ka koi iei pea lava te lalolagi,
ko te taimi e totō ma helehele ai,
ko te makalili ma te vevela,
ko te tau māfanafana ma te tau mālūlū,
ko te ao ma te pō,
ka hē uma lele.”
Currently Selected:
Kenehe 8: TOKU
Highlight
Share
Copy
Want to have your highlights saved across all your devices? Sign up or sign in
Bible Society New Zealand Charitable Trust
Videos for Kenehe 8
Episode 36:Are We Near the End? The Bible’s Hidden Pattern
Under The Hood
EP 25. Why Do So Many Cultures Have Flood Myths? The Truth Behind the Stories
Under The Hood
Episode 29: Did a Meteor Really Trigger Noah’s Flood?
Under The Hood
Ep 32. Genesis 6-7: The Flood: A Heartbroken God Brings Justice and Mercy
The Bible Show