Kenehe 7

Ko te Lolo

1Oi na vāgana atu ai te Aliki kia Noa, “Olo ki loto o te vaka ma tō kaukāiga kātoa, auā kua kitea e au ko koe lava oioti te tino i te lalolagi kātoa e āmiotonu. 2Fano ma kave ni taki tautoka lua e fitu o nā itūkāiga manuvaefa mamā,#7.2 mamā i nā tu tau tāpuakiga he manu tagata ma he manu fafine; kae ko nā manuvaefa e hē mamā, kave oioti he manu tagata e fokotahi ma he manu fafine e fokotahi. 3Kave foki ni taki tau toka lua e fitu o nā itūkāiga manulele uma, he manulele tagata ma he manulele fafine, ke fakaolaola ai pea o lātou itūkāiga i te lalolagi kātoa. 4Auā i te fitu o aho e kāmata atu nei, ka liligi ifo e au nā ua mo ni ao ma ni pō e fa hefulu; ma ko nā mea uma e iei te ola na gaohi e au, ka fakaumatia.” 5Ma na fai e Noa nā mea uma na fakatonu ake e te Aliki ke fai.

6I te taimi na pa mai ai te lolo ki te lalolagi, ko Noa kua 600 tauhaga te matua. 7Ma na olo ai ia Noa ma tana āvaga, ona ataliki ma a lātou āvaga, ki luga o te vaka kae ke hao kilātou mai te lolo.#Mat 24.38-39; Luk 17.27 8Mai nā manuvaefa mamā, nā manuvaefa e hē mamā, nā manulele, ma nā meaola fetolofi uma i luga o te kelekele, 9na taki tau toka lua, he meaola tagata ma he meaola fafine, na kave e Noa ki luga o te vaka e vē ko te fakatonuga a te Atua. 10Ma kua teka atu nā aho e fitu, oi na kāmata ai oi tatao te laukelekele e te vai o te lolo.

11I te kātoaga o te 600 tauhaga o Noa, i te hefulufitu o aho o te lua o māhina, nā gāpāpā ai ia alāvai o vaipuna uma i lalo o te loloto o te laukelekele, ma mātalatala ia fāitotoka o te vai i te vānimonimo,#2 Pet 3.6 12ma na gogolo ai lava ia ūaga ki luga o te laukelekele i nā ao ma nā pō e 40. 13I te aho foki lava tēnā, na olo ai ia Noa ma tana āvaga ki luga o te vaka ma o lā ataliki e toka tolu, ko Hemu, Hamo ma Iafeta, ma a lātou āvaga. 14Na olo fakatahi kilātou ma nā itūkāiga manuvaefa kehekehe uma, nā manuvaefa tauhi ma nā manuvaefa tāvao, ma nā itūkāiga meaola fetolofi uma i te lalolagi, ma nā itūkāiga manulele uma. 15Na olo fakatahi ma Noa ki luga o te vaka, taki tau toka lua kilātou, he manu tagata ma he manu fafine, o nā itūkāiga meaola kehekehe uma, 16e vē ona fakatonu ai e te Atua ia Noa. Oi na tapuni ai e te Aliki te fāitotoka.

17Na tuputupu pea lava te lolovai i luga o te kelekele i nā aho e 40, ma gāholoholo ai lava te vai e loloto ma na opea ai te vaka. 18Kua fanake lava te vai kua loloto i luga o te kelekele, ma na opeopea ai lava te vaka. 19Kua loloto lahi lele te vai i luga o te kelekele, ma kua tatao kātoa ai nā mauga maualuluga uma i te lalolagi; 20kua fanake pea lava ki luga te huhua o te vai, ma na tatao ai e tuha ma te fitu mita te loloto mai nā tumutumu o nā mauga. 21Ko nā mea uma lele nae iei te ola i te lalolagi kua mamate—nā manulele, nā manuvaefa tauhi ma manuvaefa tāvao, nā meaola fetolofi vēnā ma tagataola uma. 22Ko nā mea uma nae iei te mānava i luga o te kelekele mātūtū, kua mamate. 23Na fakaumatia e te Aliki nā mea uma lele nae iei te ola i te lalolagi—ko tagataola, ko manuvaefa, ko meaola fetolofi ma manulele o te ea. Na fakaumatia uma kilātou. Nā ko Noa lava oioti te tino na totoe mai, ma kilātou nae i luga o te vaka ma ia. 24Ma na tatao pea lava te laufenua e te lolo mo ni aho e 150.

Currently Selected:

Kenehe 7: TOKU

Highlight

Copy