Kenehe 49
49
Nā toe Kupu a Iakopo ki Ona Ataliki
1Oi na fekau ai loa e Iakopo nā ataliki o ia ma lea vē atu ai kia te kilātou, “Fakapotopoto mai ke lea atu au kia te koutou, e uiga ki nā mea ka tutupu i nā aho e hau:
2“Ōmamai oi fakalogo, koutou nā ataliki o Iakopo.
Fakalogo mai ki te koutou tamana ko Ihalaelu.
3“Leupena, ko koe ko taku ulumatua
te fua muamua o toku mālohi faka-taulealea;
e hili atu te maualuga o tō tūlaga ma tō mākeke.
4E vē koe ko te huāvai o he vaitafe kua pā.
Kae e hē ko koe te ka hili atu te tāua,
auā koe na momoe ma taku āvagapō,
ma na hē āva ai koe ki te moega o tō tamana.
5“Ko Himeona ma Levi he uho;
ko o lā pelu ni kaukupega o fakahāuāga.
6Ke nahe iei lele au ia lā fuafuaga fai munimuni,
pe kau fakatahi au ma a lā taupulepulega.
Auā na kilā tāmatea nā tino i te loto ita
ma fakapipilia nā pōvi poa e aunoa ma he pogai.
7Ke fakamālaia to lā loto ita, auā e aloā e fakamātakutaku,
ma to lā tōkahā, auā e aloā e fakahāuā.
Ka kō fakatakapea kilāua i te mea e iei ia lāpuna o Iakopo,
ma fakanonofo holo ma iētahi puikāiga o Ihalaelu.
8“Iuta, ka vīkia koe e nā uho o koe.
Ka kukuma e koe nā fili o koe i o lātou ua.
Ka ifo atu kia te koe ia ataliki o tō tamana.
9 #
Nūm 24.9; Fkl 5.5 Ko Iuta e vē he leona talavou,
kua kai tana mafua ma toe foki ki tona lua.
Kua fātū ifo ma takoto ki lalo.
E vē he leona fafine—ko ai te mafaia oi toe fafagu kia te ia?
10Ko te tokotoko o te pule ka hē teka kehe lele ma Iuta,
ma ka tūmau pea te pule i lima o ona lāpuna.
Ko nā mālō ka totogi lāfoga fakapitoa kia te ia,#49.10 E ono vē te tuhituhiga lāfoga… ia E hē manino te uiga i te tuhituhiga Epelu
ma ifo atu kia te ia i to lātou uhitaki.
11E tāpeke e ia tana punua āhini ki he vine,
ki te vine e pito hili atu te ola lelei.
E ufi e ia ona kie i te toto o nā fuāvine.
12Ka kukula ona mata i te inu ki te uaina,
ma ona nifo ka papae i te inu ki te huhu.#49.12 Ka kukula… te huhu pe Ko ona mata e hili atu te kukula i lo te uaina, ma ona nifo e hili atu te papae i lo te huhu
13“Ko Hepulona ka nofo i nā koga tū matāfaga.
Ko tona talafātai ka kavea ma taulaga malu mo nā vaka.
Ko tona tuākoi ka pa lele ki Haitonu.
14“Ko Ihakala e vē he āhini mākeke,
e takoto i te vā o ana āmogātaga.
15Kā ia kitea he koga e mālōlō ai e lelei,
ma ko te fenua foki e mānaia,
oi ka punou ifo ai ke fakauta ake te āmoga
ma fakamālohia ai ke galue e vē he pologa.
16“Ko Tanu ka kavea ma pule ki ona tagata.
Ka vē kilātou ko iētahi puikāiga o Ihalaelu.
17Ko Tanu ka vē hē gata i tafa o te auala,
he gata katiogo i luga o te ala,
e kati e ia te mulivae o te holofanua,
ma pakū ai āgai ki tua te tino e tiketike ai.
18“Te Aliki e, ko au e fakatalitali ki tau fakaolataga.
19“Ko Kato ka ohofaki e he kāuga fāomea,
kae ka toe tuliloa e ia kilātou ma ohofaki.
20“Ko nā meakai i te fenua o Ahela ka hili te lelei.
Ka maua ai nā meakai e tatau mo he tupu.
21“Ko Nafatali ko he aila tānoa e vili haoloto,
e ia fānau maia nā punuā aila e ola lelei.#49.21 pe e tautatala i nā kupu logo mālie
22“Ko Iohefa ko he vine e fua taufuifui,
he vine fua taufuifui i tafa o he vaipuna,
ko ona lālā e hao ki luga o te puipui.
23E ohofaki mālohi ia e ona fili.
E tuliloa e kilātou ia lātou kaufana ma āū.
24Kae ko tana kaufana e toka pea lava,
ma ona lima kua fai ke mākekeke
e te mana o Tē e Hilihili te Mālohi o Iakopo,
e te Leoleomāmoe, te Papa o Ihalaelu,
25e te Atua o tō tamana, tē ka fehoahoani atu kia te koe,
e te Atua Mālohihilihili,#49.25 Epelu Eli Hatai tē ka fakamanuia atu kia te koe,
ia fakamanuiaga mai te lagi i luga,
ia fakamanuiaga mai vaipuna i lalo,
ia fakamanuiaga ke uluola au fānau ma au lafumanu.
26Ke hili lele atu ia fakamanuiaga a tō tamana,
i lo fakamanuiaga mai mauga o te vavau,
ma ke pa lele ki mea maualuluga o maugaiti mai te kāloā.
Ke i luga nā mea uma iēnei o te ulu o Iohefa,
ma luga o te muāulu o tē kua filifilia mai ona uho.
27“Ko Peniamina ko he luko fekai fakamātakutaku.
I te tāeao e kai e ia ona fili,
ma i te afiafi e fakahoa e ia nā koloa puke.”
28Ko nā puikāiga iēnei e hefulu lua o Ihalaelu, ma ko iēnei nā kupu na tautala ai to lātou tamana, i te fakamanuiaga e ia o kilātou tau toka tahi, i te fakamanuiaga e fetaui mo te tino.
Te Mate ma te Tanuga o Iakopo
29Oi na fakatonu vēnei ai e Iakopo ona ataliki, “Kua tafapili mai te taimi e mate ai au; tanu au fakatahi ma oku tamana i te ana i te fenua o Epelona te ha-Hitē, 30o Makapela i te itū ki hahae o Mamele i Kanana. Ko te ana tēnā ma te fenua na fakatau e Apelaamo mai ia Epelona te ha-Hitē, ke fai ma fenuatanu.#Ken 23.3-20 31Ko kinā te na tanu ai e kilātou ia Apelaamo ma tana āvaga ko Hala; ko kinā te na tanu ai e kilātou ia Ihaako ma tana āvaga ko Lepeka; ko kinā foki te na tanu ai e au ia Leaha.#Ken 25.9-10; 35.29 32Ko te fenua tēnā ma te ana, na fakatau mai i nā tino ha-Hitē. Tanu au i kinā.”
33Kua uma te fakatonu e Iakopo o ona ataliki, oi na tuku ake ai ona vae ki luga o tona moega, kua tō tana mānava ma na uma ai loa tona ola.#Gāl 7.15
Currently Selected:
Kenehe 49: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
