Kenehe 48
48
Kua Fakamanuia ia Efalaima ma Manahe e Iakopo
1Kua teka atu nā mea iēnā, kae maua te tala e Iohefa ko tona tamana kua tauale. Oi na kave ai loa e ia ona ataliki e toka lua, ko Manahe ma Efalaima, kua olo oi āhi tona tamana. 2I te taku atuga kia Iakopo ko tona ataliki ko Iohefa kua hau oi āhi mai ia, na fakamākeke lele oi nofo ki luga i tona moega. 3Kua lea atu ia Iakopo kia Iohefa, “Ko te Atua Mālohihilihili#48.3 Epelu Eli Hatai na fakaali mai kia te au i Luhu, i te fenua o Kanana, ma na ia fakamanuia maia au.#Ken 28.13-14 4Na vāgana vē mai kia te au, ‘Ka kō fōki atua ni au fānau e tokalahi, kae ke kavea ai koe ma tamana o ni mālō e lahi; ka fōki e au te fenua tēnei ki nā lāpuna o koe ke fai mo kilātou, ke pa lava ki te hēgata.’ ”
5Na fakaauau pea te tautalaga a Iakopo ma lea vē atu ai, “Iohefa, ko nā ataliki e toka lua o koe na fānanau i Aikupito ka ko hēki hau au ki kinei, e o oku; ko Efalaima ma Manahe e a aku e vē lava ko Leupena ma Himeona. 6Kāfai e toe maua ni iētahi ō ataliki, ka hē faitaua kilātou ni ataliki e o oku; ko o lātou tofi ka maua e ala mai i nā kelekele o Efalaima ma Manahe. 7Kua fai e au te mea tēnei ona ko au e māfaufau lava ki te mea na tupu kia Lahela te mātua o koe. Te māfatia o toku loto i te otiga o Lahela i Kanana, e hē mamao ma Efalata, i toku liliu ifoga mai Mehopotamia.#48.7 Mehopotamia pe Patana Na tanu e au i kinā i tafa o te auala ki Efalata (ko Peteleema i nā aho nei).”#Ken 35.16-19
8I te kitea atuga e Iakopo o nā ataliki o Iohefa, oi na fehili vē atu ai, “Ko aina kō iēnei?”
9Na tali mai ia Iohefa, “Ko nā ataliki iēnei o oku kua fōki mai e te Atua kia te au i kinei i Aikupito.”
Oi na lea atu ai ia Iakopo, “Kaumai ke fakamanuia atu e au kilāua.” 10Ko nā mata o Iakopo kua tau hē lelei ona kua matua, ma kua tau hē ia kitea he mea. Oi na kaumai ai e Iohefa nā tama ki tafa o Iakopo; kua fuhi mai e ia kilāua ma hogi atu ki ei. 11Ma kua lea atu ia Iakopo kia Iohefa, “Ko ai tena vēake e toe kō kitea koe, kae ko tēnei kua fakakikila lava e te Atua oku mata ki tau fānau.” 12Kua hiki kehe e Iohefa te toka lua mai luga o nā vae o Iakopo, ma ifo ki lalo i mua o tona tamana.
13Ma na tuku ai e Iohefa ia Efalaima ki te itū tauagavale o Iakopo, kae tuku ia Manahe ki te itū taumatau. 14Kae kua papae atu ia Iakopo i tona lima taumatau ma tuku ki luga o te ulu o Efalaima, e ui lava ko ia te tino e tamaiti, ka kua tuku tona lima tauagavale ki luga o te ulu o Manahe, ko ia te ulumatua. 15Oi na fakamanuia ai e ia ia Iohefa:#48.15 Iohefa I te fakamanuiaga o Efalaima ma Manahe, ko te fakamanuiaga foki lava tēnā a Iakopo kia Iohefa
“Ke fakamanuia e te Atua, tē nae tautua ma te fakamāoni ki ei oku tamana,
ia Apelaamo ma Ihaako, nā tama iēnei!
Ke fakamanuia kilāua e te Atua, tē e takitakia au i toku olaga kātoa!
16Ke fakamanuia kilāua e te āgelu, tē e lāveakia au mai nā puapuagā!
Ke manatua pea lava toku igoa ma nā igoa o oku tamana,
ia Apelaamo ma Ihaako, e ala i nā tama iēnei!
Ke uluola ma tokalahi ni o lā lāpuna i te lalolagi!”
17Na hēki fiafia ia Iohefa i te ia kitea atuga, kua fakauta te lima taumatau o tona tamana ki te ulu o Efalaima; oi na tago atu ai ki te lima o tona tamana ke kave kehe mai te ulu o Efalaima ma ke fakauta ki te ulu o Manahe. 18Ma na lea vē atu ai ki tona tamana, “Hēai kō, toku tamana, nahe faia vēnā. Tēnei te ulumatua; tuku te lima taumatau o koe ki tona ulu.” 19Kae na muhu tona tamana oi hiki kehe tona lima, ma na lea ve atu ai, “Toku ataliki, e iloa e au taku mea e fai. Ko nā lāpuna o Manahe te ka kavea ma nuku ma ka tokalahi. Kae ka hili atu lava tona uho tamaiti ko Efalaima ia te ia—ko nā lāpuna o ia ka kavea ma mālō e tokalahi.”
20Oi na fakamanuia ai e Iakopo kilāua i te aho lava tēnā ma na lea ve ai, “Ka fakaaogā e nā tino Ihalaelu oulua igoa, kāfai e tautatala i nā kupu o a lātou fakamanuiaga. Ka lea vē kilātou, ‘Ke fakamanuia koutou e te Atua e vē ko Efalaima ma Manahe.’ ” I te faiga tēnei, na fakamuamua ai e Iakopo ia Efalaima i lo Manahe.#Epe 11.21
21Oi na lea atu ai ia Iakopo kia Iohefa, “Kikila, ko au kua tāli oti, kae ko te Atua ka fakatahi pea lava ma koe, ma ka ia toe fakafokia koe ki te fenua o nā tupuna o koe. 22E hē gata i tēnā, ko Hekeme, te kogāfenua kelekele lelei tēia na kō pukea mai nā tino ha-Amolī i taku pelu ma taku kaufana, e tuku atu e au kia te koe, kae hē ki nā uho o koe.”
Currently Selected:
Kenehe 48: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
