Kenehe 47
47
1Oi na fano ai ia Iohefa ma lea vē atu ki te tupu ko Falao, “Ko toku tamana ma oku uho kua ōmamai mai Kanana ma a lātou lafumāmoe, nā lafupōvi ma a lātou meatōtino uma; kua nonofo nei i te kogāfenua ko Kohene.” 2Na kaumai e Iohefa he toka lima o ona uho ma kave ki mua o te tupu. 3Kua fehili vē atu te tupu kia te kilātou, “Ni gāluega ā ta koutou?”
Na tali mai kilātou, “Te aliki, ko kimātou au kaukauna ni leoleomāmoe, e vē foki lava ko nā tupuna o kimātou. 4Ko kimātou kua ōmamai ke nonofo i te fenua tēnei, auā ko te oge kua fakalalahi lele i Kanana, ma kua hēai he mutia mo a mātou lafumanu. Fakamolemole kō, fakataga mai kimātou au kaukauna ke nonofo i te kogāfenua ko Kohene.” 5Oi kua lea atu te tupu kia Iohefa, “Nei kua papā mai te tamana ma nā uho o koe, 6ko Aikupito e o kilātou. Tuku ke olo oi nonofo i te kogāfenua ko Kohene, te mea e pito hili atu te lelei o tona kelekele. Ma kāfai e iei ni tino agavaka o kilātou, tuku ki ei aku lafumanu ke kikila e kilātou.”
7Oi na kaumai ai e Iohefa tona tamana ke feiloaki ki te tupu, ma na fakamanuia ai e Iakopo te tupu. 8Kua fehili atu te tupu kia Iakopo, “Kua fia nei ō tauhaga?”
9Na tali mai ia Iakopo ki te tupu, “Kua helau tolu hefulu nei ia tauhaga e tāevaeva pea lava au i luga o te fenua, mai tēia fenua ki tēia fenua. Ni tauhaga iēnei e hē lahi kae e aloā nae faigatā, e hē vē ko te lahi o nā tauhaga nae tāevaeva ai nā tupuna o oku.” 10Ma na fakamanuia ai loa e Iakopo te tupu ma fakamāvae ki ei, oi fano kehe ai. 11Kua teka atu nā mea iēnei, oi na fai ai e Iohefa te mea na fakatonu ake e te tupu. Kua fakahino e ia he fenua mo tona tamana ma ona uho, i te fenua e pito hili te lelei e tafapili ki te kakai ko Lamehe. 12Ma nae tauhi lava e Iohefa i nā meakai tona tamana, nā uho o ia, ma nā tino uma o te kaukāiga o tona tamana, ke pa lava ki nā tamā tamaiti.
Ko te Oge
13Ko te oge nei kua fakalalahi lele ma kua hēai ni meakai e maua i hō he koga, ma ko tagata uma o Aikupito ma Kanana, kua fai vāivai i te fia kakaia. 14Ma ko nā tupe uma lele a tagata Aikupito ma Kanana kua fakaaogā ke fakatau mai ai ni a lātou haito, ma nae fakaputu e Iohefa nā tupe uma lele iēnei ma kave ki te fale o te tupu. 15Kua mole nā tupe a tagata i Aikupito ma Kanana, oi na ōmamai ai nā tino Aikupito kua lea vē atu kia Iohefa, “Kaumai ni a mātou meakai! Fehoahoani mai, kaumai ni a mātou meakai auā kimātou ka mamate. Ko a mātou tupe kua uma.”
16Na tali atu ia Iohefa, “Kāfai kua uma autou tupe, kaumai la autou lafumanu ke totogi ai autou meakai.” 17Oi na kaumai ai a lātou lafumanu kia Iohefa, nā holofanua, māmoe, oti, pōvi ma nā āhini, ke totogi ai a lātou meakai. Ma na maua ai lava a lātou meakai i te tauhaga kātoa tēnā, kae totogi i a lātou lafumanu uma. 18I te tauhaga na hohoko ai, na ōmamai ai kilātou kia Iohefa ma lea vē mai ki ei, “Te tamana, ka hē mumunia e kimātou te meamoni mai ia te koe, ko a mātou tupe kua uma, ma iēnā a mātou lafumanu kua maua uma e koe. E hēai he mea e fokotahi koi totoe ia te kimātou, vāganā ai o mātou fuaitino, ma o mātou fenua. 19Nahe kē tukua kimātou ke mamate i mua o koe, kae fehoahoani mai kia te mātou! Fakatau kō kimātou ma o mātou fenua e koe, ke totogi ai ni a mātou meakai. Oi ka fai ai kimātou ma pologa a te tupu ma kave mo ia nā fenua o kimātou. Kaumai ni a mātou haito ke ola ai kimātou ma ni fatu lākau ke totō kae ke hē tīakia ai nā fātoaga a kimātou.”
20Oi na fakatau ai e Iohefa nā fenua uma lele i Aikupito mo te tupu. Ko tagata Aikupito uma lele kua fakatau atu o lātou fenua ona kua puapuagā lele kilātou i te kino lahi o te oge; ma ko nā fenua uma lele kua maua e te tupu. 21Ma kua fai foki e ia ia tagata ma pologa, e kāmata atu i tētahi itū o Aikupito ke pa ki tētahi itū. 22E nā ko te fenua lava o nā ohitāulaga te hēki ia fakataua. Ona nae maua te alauni a nā ohitāulaga mai te tupu, ma nae ola ai lava i te alauni tēnā, na hēki manakomia ai ke fakatau atu o lātou fenua. 23Oi na lea atu ai ia Iohefa ki nā tino, “Kikila, kua kō fakataua koutou ma nā fenua o koutou mo te tupu. Iēnei la nā fatu lākau ke totō i nā fātoaga o koutou. 24I te taimi o te helehelega, ko te tahi-vae-lima o te helehelega, e kave mo te tupu. Ko te vāega e totoe e mo koutou ke fai ma fatu ke toe totō i nā fātoaga, ma ke kakai ai koutou ma nā kaukāiga o koutou.”
25Ma na tali mai kilātou, “Te tamana, kua kē lāveakia nā ola o kimātou, oi ko kimātou kua mālilie ke kavea kimātou ma pologa a te tupu.” 26Oi na fai ai e Iohefa he tūlāfono mo te mālō, ko te tahi-vae-lima o te helehelega e kave mo te tupu. Ko te tūlāfono tēnei na aofia ai ia Aikupito kātoa, ma koi tūmau pea lava ke pa mai nei. E nā ko nā fenua oioti lava o nā ohitāulaga, te hēki kavea mo te tupu.
Nā toe Manakoga o Iakopo
27Oi na nonofo ai lava nā tino Ihalaelu i Aikupito i te kogāfenua ko Kohene, ma na tamaokāiga lahi kilātou i kinā, ma tokalahi lele a lātou fānau. 28E hefulu fitu ia tauhaga na nofo ai ia Iakopo i Aikupito, ma kua helau fa hefulu fitu ai ona tauhaga. 29Kua tāli pa ki te taimi e oti ai, oi na fekau ai e ia tona ataliki ko Iohefa ma lea vē atu ki ei, “Kāfai koe e alofa mai kia te au, tuku mai tō lima ki te vā o oku ālaga#47.29 tuku mai… oku ālaga Kikila ki te 24.2 ma tautō mai ko au e hē tanua e koe i Aikupito.#Ken 49.29-32; 50.6 30Ko au e fofou ke tanu au i te mea e iei oku tamana. Kāfai au e oti, kave toku tino ki fafo o Aikupito ma tanu i te mea e tanu ai oku tupuna.”
Na tali atu ia Iohefa, “Ko te mea lava e lea mai ai koe, ko te mea ia e fai e au.”
31Oi na lea atu ai ia Iakopo, “Fai hau tautōga e kē faia te mea tēnei;” ma na fai ai te tautōga a Iohefa. I te taimi tēnā, ko Iakopo e i luga o tona moega, oi na fakahaga ai ki te ulu o tona moega ma punou ifo tona ulu ki lalo, ma fai tana fakafetai.
Currently Selected:
Kenehe 47: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
