Kenehe 46
46
Ko te Malaga a Iakopo ki Aikupito
1Oi na malaga ai ia Iakopo ki Aikupito ma kave ana mea uma lele. Kua tau atu ki Pelehepa, oi na ofo atu ai i kinā, nā tāulaga ki te Atua o tona tamana ko Ihaako. 2Ma kua vāgana mai kia te ia te Atua i hana miti na fai i te pō, “Iakopo, Iakopo!”
“Io, ko au tēnei,” na tali vē atu ia.
3Ma na vāgana mai ai te Atua, “Ko au ko te Atua, te Atua o tō tamana. Ia koe nahe mataku oi fano ki Aikupito; ka kō faia nā lāpuna o koe ma nuku tokalahi i kinā. 4Ko au ka olo fakatahi ma koe ki Aikupito, ma ka toe kō kaumaia nā lāpuna o koe ki te fenua tēnei. Ko nā lima lava o Iohefa te ka tapunia nā mata o koe kāfai koe ka oti.”
5Oi na hāuni ai loa ia Iakopo ke malaga kehe mai Pelehepa. Kua hiki ake e nā ataliki to lātou tamana, a lātou fānau, ma a lātou āvaga, ki luga o nā tāvaletoho, iēia na momoli mai e te tupu o Aikupito ke ōake ai kilātou. 6Kua kave a lātou lafumanu, ma a lātou meatōtino uma na maua i Kanana, ma kua olo ki Aikupito. Na kave uma e Iakopo nā lāpuna o ia:#Gāl 7.15 7ona ataliki, ona makopuna tama, ona afafine ma ona makopuna teine.
8Ko nā igoa o tona kaukāiga na olo fakatahi kilātou ki Aikupito, ko tana ulumatua ko Leupena 9ma nā ataliki o Leupena: Ko Hanoka, Palu, Hehalona, ma Kami. 10Ko Himeona ma ona ataliki: Ko Iemuelu, Iamina, Ohata, Iakini, Hohala, ma Haulo te tama a he fafine Kanana. 11Ko Levi ma ona ataliki: Ko Kelehona, Kohati, ma Melali. 12Ko Iuta ma ona ataliki: ko Elu, Omani, Helaha, Pelehe, ma Hēlaha (kae ko Elu ma Onani na feoti i Kanana); ma ko nā ataliki o Pelehe ko Hehalona ma Hamula. 13Ko Ihakala ma ona ataliki: Ko Tola, Pua,#46.13 Ko iētahi tuhituhiga anamua e leamai Puva Iahupa, ma Himilona. 14Ko Hepulona ma ona ataliki: Ko Helete, Elona, ma Iahaleele! 15Ko nā ataliki iēnā o Iakopo na fānanau i Mehopotamia ki tana āvaga ko Leaha, kae e hē i loto ai tona afafine ko Tina. I te tuku fakatahiga, e toka tolu hefulu tolu fakatahi ona ataliki ma ona afafine.
16Ko Kato ma ona ataliki: Ko Hifioni, Hagi, Huni, Ehepono, Eli, Aloti, ma Aleli. 17Ko Ahela ma ona ataliki: Ko Iminaha, Ihiva, Ihivi, Peliaha, ma to lātou tuafafine ko Hela. Ko nā ataliki o Peliaha: ko Hepele ma Malakielu. 18Ko te toka hefulu ono tēnā, ko nā fānau a Iakopo mai ia Helepa, te pologa fafine na fōki e Lapana ki tona afafine ko Leaha.
19E toka lua ia ataliki o Iakopo i tana āvaga ko Lahela: ko Iohefa ma Peniamina. 20E toka lua ia ataliki o Iohefa na fānanau i Aikupito; ko Manahe ma Efalaima mai ia Ahenati te afafine o Potipela, he ohitāulaga i te kakai ko Ono.#Ken 41.50-52 21Ko nā ataliki o Peniamina, ko Pela, Pekele, Ahipele, Kela, Naamanu, Ehi, Lohi, Mupimi, Hupimi ma Ata. 22Ko te toka hefulu fa tēnei ko nā fānau a Iakopo mai ia Lahela.
23Ko Tanu ma tona ataliki ko Huhimi. 24Ko Nafatali ma ona ataliki: Ko Iaheele, Guni, Iēhele, ma Hileme. 25Ko te toka fitu tēnei ko nā fānau a Iakopo mai ia Piliha, te pologa fafine na fōki e Lapana ki tona afafine ko Lahela.
26Ko te aofaki o nā tino na tupuga hako mai ia Iakopo na olo ki Aikupito e toka ono hefulu ono, e hē i loto ai nā āvaga a ona ataliki. 27E toka lua ia ataliki o Iohefa na fānanau i Aikupito, oi na maua ai te aofaki kātoa o te kāiga o Iakopo na olo ki Aikupito e toka fitu hefulu.#46.27 E aofia ai ia Iakopo ma Iohefa ma nā ataliki e toka lua o Iohefa #Gāl 7.14
Ko Iakopo ma Tona Kaukāiga i Aikupito
28Na uga e Iakopo ia Iuta ke muamua ia te kilātou ma ke lea kia Iohefa ke fanake oi fakafetaui ake kilātou i Kohene. I te papā atuga o kilātou ki Kohene, 29oi na fano ai ki ei ia Iohefa i tana kaliota, ke feiloaki ma tona tamana. Kua fuhi i ona lima tona tamana, ma tagi ai lava mo he taimi mataloa. 30Kua lea atu ia Iakopo kia Iohefa, “Nei ko au kua kikila atu kia te koe, ma ko koe koi ola, e hēai he mea e iei ai, pe kāfai ia au e oti loa nei.”
31Oi na lea ai ia Iohefa ki nā uho o ia ma iētahi o te kaukāiga o tona tamana, “Ko au e tatau ke fano oi taku ki te tupu, ko oku uho ma te kaukāiga uma o toku tamana nae nonofo i Kanana, kua ōmamai kia te au. 32Ka lea au ki ei ko koutou ni tino leoleo māmoe ma tauhi lafumanu, ma na kaumai foki e koutou autou lafumāmoe, autou lafupōvi ma nā meatōtino uma lele a koutou. 33Kāfai koutou e fekau mai e te tupu ma fehili atu pe ni gāluega ā ta koutou, 34ke mautinoa e lea koutou ki ei, ko koutou ni tino na tauhi manu mai lava ka koi tamaiti, e vē foki lava ko nā tupuna o koutou. Kāfai e tali vēnā koutou ki te tupu, oi ka ia tukua atu ai koutou ke olo oi nonofo mau i te kogāfenua ko Kohene.” Na lea vēnā ia Iohefa auā ko nā leoleomāmoe ni tino nae inohia e tagata Aikupito.
Currently Selected:
Kenehe 46: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
