Kenehe 45
45
Kua Fakailoa ia Iohefa ki Ona Uho
1Kua hē mafai e Iohefa oi tāofiofi ona lagona i mua o ana kaukauna ma kua tau loimata tō. Oi na fakatonu ai e ia ana kaukauna uma lele ke olo ki fafo. E hēai hētahi tino nae iei kae fakailoa e Iohefa ki ona uho e uiga kia te ia.#Gāl 7.13 2Na tagi taukekē ia Iohefa ma na lagona e nā tino Aikupito, ma na iku ai kua pa te tala ki te tupu. 3Oi na lea atu ai ia Iohefa ki ona uho, “Ko au ko Iohefa. Koi ola mai nei toku tamana?” Kae kua hē mafai e ona uho oi tali atu ki ei ona kua mātataku lele. 4Oi na lea atu ai ia Iohefa kia te kilātou, “Hōhō mai.” Kua hōhō mai kilātou oi lea vē atu ai ki ei, “Ko au ko Iohefa te uho o koutou, tēia na fakatau e koutou ki Aikupito. 5Ma i te taimi nei, koutou nahe fakanoanoa pe popole ona na koutou fakataua au ki kinei. Ko te mea moni lava, ko te Atua te na ia uga maia au ke muamua mai ki kinei ia te koutou, ke fakahao ia ola o tagata. 6Ko te lua oioti tēnei o tauhaga o te oge i te fenua; ma ko toe lima ia tauhaga ka hē mafai ai ke totō pe helehele te haito. 7Ko te Atua te na ia uga maia au ke muamua mai ia te koutou, ke mautinoa ka iei pea lava ni lāpuna mo koutou, ma ke tokalahi ni tino e mafai ke fakahao i he auala ofōfogia vēnei. 8Ko te mea ia, e hē ko koutou tena uga maia au ki kinei, kae ko te Atua. Kua ia faia au ma kaukauna e fakamoemoe ma fakalagolago ki ei te tupu. Ko au te kikilāgia te fenua kātoa tēnei; e pule e au nā tino uma o Aikupito.
9“Toe olo vave loa nei ki toku tamana ma lea vē ki ei, ‘E leamai tō ataliki ko Iohefa, kua fai au e te Atua ma pule o Aikupito kātoa; hau nei loa, ia koe nahe toe fakatali.#Gāl 7.14 10E mafai koe ke nofo i te kogāfenua ko Kohene, te mea e pili mai ai koe kia te au—ko koe, ko tau fānau, ko ō makopuna, au lafumāmoe, lafuoti, lafupōvi, ma au mea uma lele. 11Kāfai koe e i Kohene, e mafai ke tauhi atu koe e au. E lima ia tauhaga o te oge koi totoe; ma ko au e hē fofou ko koe, nā kāiga o koe ma au lafumanu, ke fia kakaia.’ ”
12Kua toe lea atu ia Iohefa ki ona uho, “Koutou uma iēnā, ma koe foki Peniamina, kua koutou kitea lelei mai, ko au ko Iohefa. 13Taku ki toku tamana ke ia iloa te maualuga o toku tūlaga i kinei i Aikupito, ma taku ki ei nā mea uma kua kitea e koutou. Oi limalima ai ma kaumai te tamana ki kinei.”
14Oi na fuhi mai ai e ia tona uho ko Peniamina, ma kāmata kua tagi; kua vēnā foki oi tagi ia Peniamina ma fuhi atu kia te ia. 15Na vēnā foki oi fuhi mai e ia ma kihi atu ki ona uho tau toka tahi, ma tagi lava. Kua uma atu tēnā, oi na kāmata ai oi faitatala ona uho fakatahi ma ia.
16I te lagonaga o te tala i te fale o te tupu ko nā uho o Iohefa na ōmamai, na fiafia lele te tupu ma ana kaukauna. 17Oi na lea atu ai te tupu kia Iohefa, “Lea ki nā uho o koe ke uta nā āhini a kilātou i nā haito, ma toe liliu ai ki Kanana. 18Lea ki ei ke olo oi kaumai to lātou tamana ma o lātou kāiga, ma toe ōmamai ki kinei. Ka kō fōki akea te fenua e hili atu te lelei i Aikupito ke nonofo ai, ma ka lava lele ma totoe nā mea e ola ai kilātou. 19Lea foki ki ei ke olo ma kave nā tāvaletoho mai Aikupito ke kaumai ai a lātou āvaga ma tamaiti, ma ke kaumai foki ma to lātou tamana. 20Kilātou nahe popole kāfai ka iei ni a lātou mea tōtino e hē mafai ke kaumai; ko te fenua e hili atu te lelei i Aikupito kātoa, ka kavea mo kilātou.”
21Na fai e nā ataliki o Iakopo nā mea na fakatonu ake ai kilātou, ma na fōki e Iohefa kia te kilātou nā tāvaletoho e vē oi lea ai te tupu, ma nā meakai mo te malaga. 22Na tuku atu foki e ia kia te kilātou ni heti kie tatala takitahi, kae fōki e ia kia Peniamina ni tupe hiliva e 300 ma ni heti kie tatala e lima. 23Mo tona tamana, na fakamomoli e ia ki ei; e hefulu ia āhini e uta i nā koloa e hili te lelei i Aikupito, e hefulu ia āhini tānoa e uta i te haito, falaoa ma iētahi meakai mā tona tamana kāfai e malaga mai ki Aikupito. 24Oi na uga ai loa e ia nā uho o ia ke olo, ma ka ko hēki olo na lea vē atu ia kia te kilātou, “Koutou nahe tauaimiha i te auala.”
25Oi na kilātou tukua ai ia Aikupito, ma kua pa atu ki Kanana ki to lātou tamana ko Iakopo. 26Kua lea vē atu kilātou ki ei, “Ko Iohefa koi ola! Ko ia te pule i Aikupito kātoa!” Na tau mate te fatu o Iakopo ma na hēki talitonu.
27Kae i te takuga e kilātou ki ei o nā kupu uma a Iohefa na fai ake, ma i te kiteaga e ia o nā tāvaletoho na fōki e Iohefa ke kavatu ai ia ki Aikupito, oi na fātoā toe totoka ai tona loto. 28Ma na lea ai ve, “Kua lava lele ko tēnā ko toku ataliki ko Iohefa koi ola lava! Ko au ka fano ke feiloaki kimāua ka ko hēki oti au.”
Currently Selected:
Kenehe 45: TOKU
Highlight
Copy
Compare
Share
Want to have your highlights saved across all your devices? Sign up or sign in
Bible Society New Zealand Charitable Trust
