Kenehe 4

Ko Kaino ma Apelu

1Oi na uhu ai ia Atamu ki tana āvaga ko Eva, ma na faitama ia Eva ma fānau e ia he tama ma na lea vē ai, “Ko te fehoahoani o te Aliki kua kō maua ai he ataliki.” Oi na fakaigoa ai e ia kia Kaino.#4.1 Kaino Ko te igoa tēnei e ve ko te fakaleoga o te kupu Epelu mo te maua 2Mulimuli ake, na fānau ai tētahi ona ataliki, ko Apelu. I te taimi kua mātutua ai nā tama, na kavea ai ia Apelu ma leoleomāmoe, ka ko Kaino na kavea ma faifātoaga. 3Kua teka atu he vāitaimi nae gālulue ai kilāua, oi na ofo atu ai e Kaino ni fua o tana fātoaga ma tāulaga ki te Aliki. 4Ka ko Apelu kua kaumai e ia te punuāmāmoe muamua lava na fānau mai e he māmoe o tana lafu, oi tāmate ma ofo atu nā vāega e hili te lelei, ma ana tāulaga. Ma na fiafia te Aliki kia Apelu ma tana tāulaga,#Epe 11.4 5kae na hēki ia talia ia Kaino ma tana tāulaga. Na ita lahi lele ia Kaino ma mata fāūū i ona fekai. 6Oi vāgana atu ai te Aliki kia Kaino, “Heā te ita ai koe? Heā te mata fāūū ai koe? 7Kāfai e lelei tau mea e fai, ka hē talia nei koe e au? Kae kāfai tau mea e fai e hē lelei, ko te agahala e fakatalitali i te faitotoka; e fofou ke pule ia kia te koe, kae e tatau ia ke i lalo o tau pule.”

8 # Mat 23.35; Luk 11.51; 1 Ioa 3.12 I he taimi mulimuli ake, oi na lea atu ai ia Kaino kia Apelu tona uho tamaiti, “Hau tā olo ki te vao.”#4.8 Ko iētahi fakaliliuga tuai Hau tā olo ki te vao; E hē i loto o nā tuhituhiga Epelu nā kupu iēnei Ka koi i te vao kilāua, na liliu atu ai ia Kaino ki tona uho ko Apelu ma tāmate.

9Oi na vāgana mai ai te Aliki kia Kaino, “Tēfea tō uho ko Apelu?”

Na tali atu ia Kaino, “E hē kō iloa. He leoleo nei au o toku uho?”

10Ma na vāgana mai ai ki ei te Aliki, “Heā tā koe kua fai? Kikila, ko te toto o tō uho e tagi mai kia te au i te kelekele, e vē he leo e kalaga mai ke toe taui atu mo te mea hehē tēnei.#Epe 12.24 11I te taimi nei, ko koe kua fetuku, ma e hēai he mea e totō e koe i te kelekele e toe ola. Ko te kelekele tēnei kua inua te toto o tō uho i te tāmatega e koe. 12Kāfai e totō e koe te kelekele, ka hē kē toe maua mai ai he mea; ma ko koe ka tāevaeva holo i te lalolagi ma hēai he mea ke nofomau ai koe.”

13Kua lea atu ia Kaino ki te Aliki, “Ko te fakahalaga o oku kua mamafa lele ātili ma e hē kō nafatia. 14Kikila, ko au kua tulikehe e koe mai te fenua ma mai i te mea e iei koe; ka kavea au ma tagata e tāevaeva holo i te lalolagi ma hēai he mea ke nofomau ai, ma ko ho he tino e fetaui kimāua, ka ia tāmatea au.”

15Kae na tali vē atu ki ei te Aliki, “Hēai. Kāfai koe e tāmate e he tino, e fitu ia ola ka taui ai.” Oi na tuku ai e te Aliki he fakailoga ki luga o Kaino, kae ke nahe tāmatea ai ia e ho he tino e fetaui kilāua. 16Oi na fano kehe ai loa ia Kaino mai mua o te Aliki, kua fano oi nofo i he fenua e igoa kia Noto#4.16 Pe Tāevaeva (kikila ki nā fuaikupu 12 ma te 14) i te itū ki hahae o Etena.

Nā Lāpuna o Kaino

17Na uhu ia Kaino ki tana āvaga, oi faitama ai te fafine ma fānau he ataliki na fakaigoa kia Enoka. Oi na fakatū ai e Kaino he kakai ma na fakaigoa e ia kia Enoka, te igoa o tona ataliki. 18Na fānau te ataliki o Enoka ko Ilata, ko te tamana ia o Mehuiaelu. Na fānau te ataliki o Mehuiaelu ko Metuhaelu, ma ko te tamana ia o Lameka. 19E toka lua ia āvaga a Lameka; ko te igoa o tētahi ko Ata ma ko tētahi ko Hilaha. 20Na fānau ia Ata ko Iapala, ko te tupuna ia o nā tino nae nonofo i nā falekie ma tauhi lafumanu. 21Ko tona uho tamaiti ko Iupala, ko te tupuna ia o nā tino fatupehe, ta kītala ma ili fagufagu. 22Na fānau e Hilaha, tētahi āvaga a Lameka, he ataliki ko Tupala Kaino#4.22 Tupala Kaino E fokotahi te fakaliliuga tuai e leamai tupuna o nā tino faigāluega i te ukamea te igoa. Na kavea ia ma tufuga nae faia nā itūkāiga mea faigāluega kehekehe i te apamemea ma te ukamea. Ko te tuafafine o Tupala Kaino ko Naama.

23Na lea vē atu ia Lameka ki ana āvaga,

“Ata ma Hilaha, ke lagona mai e koulua toku leo;

koulua aku āvaga, fakalogo ki te mea e lea atu ai au:

Kua kō tāmatea he tamāloa na ohofakia au,

he taumalo na manuka ai au.

24Kāfai e fitu ia ola e taui ai te mate o Kaino,#Mat 18.22

ko te meamoni, e fitu hefulufitu ia ola ka taui ai,

kāfai au e tāmate e he tino.”

Ko Hetu ma Enoha

25Na toe uhu ia Atamu ki tana āvaga, ma na fānau ai e Eva he ataliki. Kua lea vē ia Eva, “Kua fōki mai kia te au e te Atua he ataliki ke hui ai ia Apelu, tē na tāmate e Kaino.” Oi na fakaigoa ai e ia tona ataliki kia Hetu.#4.25 Hetu Ko te igoa tēnei e tāli vē ko te fakaleoga o te kupu Epelu mo te kua fōki; e ono foki iei te uiga kua tōfia 26Na fānau te ataliki o Hetu, ma na fakaigoa e ia kia Enoha. Ko te taimi tēnā na kāmata ai oi fakaaogā e nā tino te igoa mamalu o te Aliki ia lātou tāpuakiga.

Currently Selected:

Kenehe 4: TOKU

Highlight

Copy