Kenehe 3

Ko te Agahala muamua ma Tona Fakahalaga

1Ko te gata te meaola nae hili atu te poto taufakahehē i lo hētahi meaola tāvao na gaohia e te Aliki te Atua. Na fehili vē atu ia ki te fafine, “Na lea atu moni te Atua ko koulua e hē kakai ki he fua o hō he lākau i te fātoaga?”#Fkl 12.9; 20.2

2Na tali mai te fafine, “E mafai kimāua ke kakai ki hō he fua o nā lākau i loto o te fātoaga; 3kae ko te Atua na vāgana vē mai, ‘Ko koulua e hē kakai ki he fua o te lākau i lototonu o te fātoaga, pe tago foki ki ei; kāfai e kakai pe tago koulua ki ei, ko koulua la ka feoti.’ ”

4Kae kua lea atu te gata ki te fafine, “Hēai, ko koulua ka hē feoti ai. 5Ko te Atua na lea vēnā atu auā e ia iloa kāfai koulua e kakai ki ei, ko koulua ka vē ko te Atua,#3.5 Atua pe nā atua ma koulua iloa ai te mea e lelei ma te mea e kino.”#3.5 iloa ai te mea e lelei ma te mea e kino pe iloa ai ia mea uma

6Ma i te kiteaga e te fafine ko te lākau e lelei mo te kai ma mānaia i te kikila ki ei, ma te gali foki pe kāfai e maua ai te poto, oi na tago ai loa oi tau mai ni fua o te lākau ma kai, ma kave foki iētahi ki tana āvaga ma na kai ai foki ma ia ki ei. 7Ko te taimi lava na kakai ai kilāua ki ei, na kilā iloa ai ko kilāua e hē lākeia; oi na hui ai e kilāua ni laulākau mati ke fai ma o lā lākei.

8I te taimi o te mālū o te afiafi, na lagona ai e kilāua te Aliki te Atua e havali i loto i te fātoaga, ma na mumuni ai kilāua ia te ia, i te mea nae iei ai nā lākau. 9Kae kua kalaga mai te Aliki te Atua ki te tamāloa ma lea vē mai ki ei “Tēfea koe?”

10Na tali atu te tamāloa, “Na lagona e au tō leo i loto o te fātoaga, ma ko au na mataku ma na mumuni ai au ia te koe, auā ko au kua hē lākeia.”

11Kua vāgana mai te Atua, “Ko ai te na lea atu kia te koe ko koe e hē lākeia? Na kai e koe te fua o te lākau na fakatonu atu e au ko koe e hē kai ki ei?”

12Na tali atu te tamāloa, “Ko te fafine na kē tukua i kinei ma au, na ia fōki maia te fua, oi na kai ai e au.”

13Oi na vāgana mai ai te Aliki te Atua ki te fafine, “Heā ta koe kua fai?” #2 Kol 11.3; 1 Tim 2.14

Na tali atu te fafine, “Ko te gata na ia fakahehēa au, oi na kai ai au ki ei.”

Kua Folafola e te Atua te Fakahalaga

14 # Fkl 12.9; 20.2 Oi na lea atu ai te Aliki te Atua ki te gata,

“Ona kua kē faia te mea tēnei, ko koe kua fakahala;

ko koe oioti o manu uma lele

te ka pakū ki luga te fetuku tēnei:

Ko koe ka hoholo i tō manava,

ma kai i te pefu i aho uma o tō ola.

15Ka kō faia ke kino te vā o koe ma te fafine

ma te vā o au fānau ma ana fānau;

ka tukipala tō ulu e ana fānau, kae ka takati e koe ana fānau.”#3.15 ana fānau pe o lātou mulivae#Fkl 12.17

16Oi na vāgana atu ai ia ki te fafine,

“Ka fakalahi e au ō tīgā kāfai koe e manavakīkī,

ma ō tīgā kāfai e fānau mai au tamaiti.

Ma e ui i nā mea iēnei, ka fofou pea koe ki tau tāne,

ma ka pule ia kia te koe.”

17Oi na vāgana atu ai ia ki te tamāloa,

“Ona ko koe kua uhitaki ki tau āvaga

ma kai ki te fua o te lākau

na kō fakatonu atua ke nahe kai koe ki ei,

kua fetuku ai te kelekele ona ko koe.

Ka galue fītā koe i tō olaga kātoa ke maua mai ai hau meakai;#Epe 6.8

18ka ola ake ai te vao kino ma nā lākau tālatala,

ma ka kai koe ki nā lākau olavale i te fātoaga.

19Ka āfu tō muāulu i te fakatokaga o te kelekele

ke maua ai hau mea ke kai,

ke pa lava ki te taimi e toe foki ai koe ki te kelekele

tēia na gaohi mai ai koe.

Auā ko koe na foafoa mai te pefu,

ma ki te pefu ka toe foki lava koe ki ei.”

20Na fakaigoa e Atamu#3.20 Atamu Ko te uiga o te igoa tēnei i te gagana Epelu tagataola tana āvaga kia Eva#3.20 Eva Ko te igoa tēnei e tāli vē ko te fakaleoga o te kupu Epelu mo te ola, tēia e fakaliliu i te vāega tēnei ko tagataola auā ko ia te mātua o tagataola uma. 21Ma na fai ai e te Aliki te Atua ni lākei pakumanu mo Atamu ma tana āvaga, ma fakalākei ai kilāua.

Kua Tuli kehe ia Atamu ma Eva mai te Fātoaga

22Oi na vāgana vē ai te Aliki te Atua, “Kikila, ko te tamāloa kua vē lava ko hētahi o kitātou; kua ia iloa te mea e lelei ma te mea e kino.#3.22 iloa te mea e lelei ma te mea e kino pe kua ia iloa nā mea uma E vēhea nei pe kāfai e tau e ia ni fua mai te lākau o te ola ma kai ki ei, ma ola ai ia ke pa ki te fakavavau?”#Fkl 22.14 23Oi na tuli kehe ai ia e te Aliki te Atua mai te Fātoaga ko Etena, ke fano oi fakatoka te kelekele na gaohi mai ai ia. 24Na tuli kehe e ia te tamāloa; ma i te itū ki hahae o te Fātoaga ko Etena, na tuku e ia i kinā te kēlupi ma he pelu afi mumū e taliuliu fakahaga ki nā itū uma, ke leoleoa te auala e tau ki te lākau e maua ai te ola.

Currently Selected:

Kenehe 3: TOKU

Highlight

Copy