Kenehe 37
37
Nā Miti a Iohefa
1Kua oti ia Ihaako, oi na nofo ai lava ia Iakopo i te fenua ko Kanana, te mea nae nofo ai tona tamana, 2ma ko tēnei te tala o te kāiga o Iakopo.
Ko Iohefa, he taumalo kua hefulufitu tauhaga te matua, nae fehoahoani ki ona uho, nā ataliki o tona tamana ki ana āvagapō ko Piliha ma Helepa, ki te kikilaga o nā lafumāmoe ma nā lafuoti. Nae ia kaumaia ki tona tamana ni tala fakakino ki ona uho ma a lātou mea nae fai.
3Nae hili te alofa o Iakopo#37.3 Iakopo I te tuhituhiga Epelu Ihalaelu kia Iohefa i lo ki iētahi ona ataliki uma, auā na fānau mai tona ataliki tēnei ka ko ia kua matua lele. Na fai e ia he kofutatao loloa ma lima loloa#37.3 kofutatao loloa ma lima loloa pe kofutatao loloa e fai ona teuteu mō Iohefa. 4I te kiteaga e ona uho ko te lātou tamana e alofa fakapito kia Iohefa, oi na feita lahi lele ai ki to lātou uho, ma kua hē fia faitala fakalelei lele ho lātou tino ki ei.
5I tētahi pō na fai ai te miti a Iohefa, ma i te fakamatalaga e ia o tana miti ki nā uho o ia, na fakaātili ai lava te feita lahi o kilātou. 6Kua lea vē atu ia Iohefa, “Fakalogo mai ake ki taku miti na fai. 7Ko kitātou uma nae i te fātoaga e tanoa nā fuhi haito, kae tū hako ake ki luga taku fuhi haito. Oi ōmamai ai nā fuhi haito a koutou, kua hiko fakatakamilo i taku fuhi haito ma ifo atu ki ei.”
8Kua lea atu nā uho o ia ki ei, “Ko te manatu o koe, ko koe ka fai ma tupu ke pule ia te kimātou?” Ma na fakaātili ai lava te feita lahi o kilātou kia Iohefa, ona ko nā miti a ia ma ana fakakupuga kua fai.
9Oi na toe fai ai tētahi miti a Iohefa, ma kua lea vē atu ki nā uho o ia, “Na toe fai tētahi aku miti, ma na kō kitea atu ai te lā, te māhina, ma nā fetū e hefulu tahi, e ifo mai kia te au.”
10Kae i te taku atuga e ia ki tona tamana ma ona uho, na muna ai ki ei tona tamana ma lea vē atu ki ei, “He itūkāiga miti vēhea kō ta koe na fai? Ko te manatu o koe ko au ma tō mātua ma nā uho o koe, e ōatu oi ifo atu kia te koe?” 11Kua lotokino lele nā uho o Iohefa, kae ko tona tamana kua māfaufau pea lava ki te mea tēnei.#Gāl 7.9
Kua Fakatau atu ia Iohefa ma Kave ki Aikupito
12I tētahi aho, na olo ai nā uho o Iohefa ki Hekeme oi kikila te lafumanu a to lātou tamana, 13ma na lea vē atu ai ia Iakopo kia Iohefa, “Ko au e fofou ko koe ke fano ki Hekeme, ki te mea e kikila ai e nā uho o koe te lafumanu.”
Na tali mai ia Iohefa, “Ko au kua hāuni ke fano.”
14Kua lea atu tona tamana, “Fano la oi āhi pe haogalēmū nā uho o koe, ma pe lelei te lafumanu; oi kua toe hau ai oi fakailoa mai kia te au.” Oi na uga ai loa ia Iohefa e tona tamana ke fano, mai te Vanu o Hepelona.
Kua pa atu ia Iohefa ki Hekeme 15oi na tāevaeva holo ai lava i te vao, ma na tau atu ki ei he tamāloa oi na fehili vē mai ai te tamāloa ki ei, “Heā ta koe e hakili?”
16Na tali atu ia Iohefa, “Ko au e hakili te mea e iei ai oku uho. E i he mea i kinei e kikila te lātou lafumanu. E iloa nei e koe te mea e iei?”
17Ma na lea mai ki ei te tamāloa, “Kua olokehe ma kinei. Na fakalogo atu au e lea ko kilātou e olo ki Totana.” Oi na fano ai loa ia Iohefa oi mulimuli ki te mea kua olo ki ei ona uho, ma na ia maua atu kilātou ki Totana.
18Na matea mamao lele mai ia Iohefa e nā uho o ia, ma ka ko hēki pa atu ia ki te mea e iei kilātou, ka kua taupulepule kilātou ke tāmate ia Iohefa. 19Kua taufai lea vē tētahi ki tētahi, “Kikila atu, tēnā te tino faimiti kua hau. 20Ōmamai loa tātou olo oi tāmate ma togi tona tino ki loto o hētahi o nā lua i kinei; oi lea ai kitātou na tāmate e he manu fekai, ma ka kikila ai la kitātou pe ko heā te pa ki ei ana miti na fai.”
21Na lagona atu e Leupena nā taupulepulega a iētahi ona uho e fai, oi na taumafai ai ke fakahao e ia ia Iohefa. Kua lea vē atu kia te kilātou, “Nahe tāmatea e kitātou. 22Togi ki loto o te lua tēnei i te vao, kae nahe fakaogohiagia.” Na lea vēnā ma tona māfaufau ko Iohefa e ia fakahaoa ma toe uga ai ki tona tamana. 23Kae i te pa maiga o Iohefa ki nā uho o ia, na ui kehe e kilātou te kofu tatao loloa ma lima loloa nae kofu ai;#37.23 Kikila ki te 37.3 24ma na kave ai e kilātou oi togi ki loto o te lua. Ko te lua e maha, e hēai ni vai i loto.
25Kua uma te kilātou togia o Iohefa ki loto o te lua, oi na nonofo ai ki lalo kua fai te lātou katiga. Ka koi kakai kilātou kae kilātou kitea atu he malaga a ni tino ha-Ihamaelī e āgai mai; na ōmamai mai Kileata ma e olo ki Aikupito. Ko a lātou kāmela nae uta i nā pulu mulo, nā pulu pāhama, ma iētahi itūkāiga mea fakamanogi meakai. 26Oi na lea vē atu ai ia Iuta ki nā uho o ia, “Heā nei ta kitātou e maua kāfai e kitātou tāmatea te uho o kitātou, ma taumafai ai kitātou ke mumuni ke nahe iloa lele e he tino? 27Ōmamai tātou olo oi fakatau ia Iohefa ki nā tino ha-Ihamaelī, kae nahe iei he tātou mea e fai ki ei, auā he uho e o kitātou, ni kakano ma ni toto.” Na mālilie nā uho o ia ki te mea tēnei, 28ma i te papā maiga o nā tino ha-Mitianā,#37.28 I nā fuaikupu 25-28 ma te 36 e tākua uma ai ia ha-Mitianā ma ha-Ihamaelī: E lua ia igoa e fakaaogā kae e fakatatau ki vāega o tagata e fokotahi. Ātonu pe ona ko nā puikāiga iēnei nae iei te hokotaga pili lele i te vā o nā tupuna o kilātou, ma nae ni tino fakatau koloa oi na toho ake ai e kilātou ia Iohefa ki luga mai te lua, ma fakatau atu ki nā tino ha-Ihamaelī i he lua hefulu tupe hiliva. Ma na kave ai ia Iohefa e nā tino iēnei ki Aikupito.#Gāl 7.9
29I te toe fanoga o Leupena ki te lua, na ia kitea ai ko Iohefa kua hē i loto, oi na tago ifo loa oi tahae ona kofu i te fakanoanoa. 30Na toe liliu ai loa ki nā uho o ia ma lea vē atu ki ei, “Ko Iohefa kua hē i loto o te lua! Heā nei ta aku ka fai?”
31Oi na tāmate ai e kilātou he oti ma lolō te kofuloloa o Iohefa ki te toto. 32Kua kave e kilātou te kofuloloa o Iohefa ki to lātou tamana ma lea vē atu ki ei, “Ko te kofu tēnei na maua e kimātou. Kikila ake pe o te ataliki o koe?”
33Na matea e ia ma na lea vē ai, “Io, ko te kofu tēnei o toku ataliki. Na tāmate nei ma kai e ni manu fekai. Hōvē nei ko toku ataliki ko Iohefa kua hae valevale tona tino!” 34Oi na tahae ai e Iakopo nā kofu o ia i tona loto fakanoanoa lahi, ma fai tona kofutaga.#37.34 kofutaga Nae māhani oi fai ke fakailoa ai te loto fakanoanoa lahi Na mataloa te taimi nae fakanoanoa ai lava ia Iakopo, ona ko tona ataliki kua mate. 35Na ōmamai uma ona ataliki ma ona afafine oi fakamāfanafana kia te ia, kae nae hē ia taliagia ma na lea ai vē, “E tuku ifo toku tino ki lalo i Heoli,#37.35 Heoli Te lalolagi o tagata oti kae hē uma oku loimata fakanoanoa mo toku ataliki.” Ma na tagi ai lava ma te loto fakavauvau mo tona ataliki ko Iohefa.
36I te taimi tēnā i Aikupito, ko Iohefa kua fakatau e nā tino ha-Ihamaelī#37.36 Kikila ki te fakamatalaga i te fuaikupu 28 kia Potifala, te takitaki o nā fitafita e leoleoa te fale o te tupu.
Currently Selected:
Kenehe 37: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
