Kenehe 38
38
Ko te Tala kia Iuta ma Tamala
1Ka koi maua pea lava ia Iakopo i nā fakanoanoaga, ka kua fanaifo ia Iuta mai ona uho, ma kua fano oi fakatū tona fale kie i tafa o te fale kie o he tino ha-Atulamī e igoa kia Hira. 2Ko kinā na fetaui ai ia Iuta ma he tautiti Kanana ko tona tamana ko Hua. Na āvaga ia Iuta ki te tautiti tēnei 3ma na fānau mai ai e ia he ataliki na fakaigoa e Iuta kia Elu. 4Na toe faitama te fafine ma fānau mai hētahi tama, ma na fakaigoa e ia kia Onani. 5Oi na toe fānau ai foki e te fafine he tama, ma na fakaigoa e ia kia Helaha. Ko te taimi tēnā nae i Kehipi ai ia Iuta.
6Kua mātutua nā ataliki o Iuta, oi na filifili ai e ia he fafine e igoa kia Tamala, ke fai ma āvaga a tona ataliki ulumatua ko Elu. 7Kae ko Elu, te ulumatua a Iuta, nae kino tana āmio i te kikila a te Aliki, ma na tāmate ai ia e te Aliki. 8I he taimi mulimuli ake, oi na lea ai ia Iuta kia Onani, “Fano oi momoe ma te āvaga a tō uho, ma fakatino tō tiute ko koe he uho e o tana āvaga, kae ke maua ni lāpuna mo te uho o koe.” 9Kae kua iloa e Onani ko nā tamaiti e hē mafai ke takua e a ia, ma ko ho he taimi lava e momoe ai ma te āvaga a tona uho kua oti, e fakafano kehe muamua lava e ia tona hua tamāloa kae ke nahe faitama te fafine, ma ke hēai ai he fānau a tona uho. 10Ma ko tana mea tēnei nae fai na hēki fiafia ki ei te Aliki, oi na tāmate ai foki ia e te Aliki. 11Oi na lea ai ia Iuta kia Tamala te āvaga a tona ataliki, “Toe fano ki te fale o tō tamana oi nofo ai, ma nahe faia hau āvaga ke pa ki te taimi e matua ai ia Helaha.” Na lea vēnā ona e mataku nā ia Helaha e tāmate e vē ko ona uho. Oi na toe foki ai ia Tamala ki tona kāiga.
12Kua teka atu he taimi, oi na oti ai te āvaga a Iuta, te afafine o Hua. I te umaga o te kaitagi ma fakanoanoaga, oi na olo ai ia Iuta ma tana uō ko Hira te ha-Atulamī, ki Timena, te mea nae hele ai te fulufulu o tana lafumāmoe. 13Na fakailoa e he tino kia Tamala ko te tamana o tana āvaga, e fano ki Timena oi hele nā fulufulu o tana lafumāmoe. 14Oi na hui ai e ia ona kofu nae fai e iloa ai ko ia he fafine kua oti tana āvaga, kae kua fai iētahi ona kofu ma tatao nā mata o ia i he veli, ma fano ai kua nofo i te faitotoka ki Enaima, he kakai i te auala ki Timena. Auā na ia iloa lelei lava ko te ataliki tamaiti o Iuta, ia Helaha, kua matua kae ko hēki tuku akea lava ke āvaga kilāua.
15I te kitea atuga e Iuta o Tamala, na vēake lava ia ko he fafine talitāne, auā nae tatao nā mata. 16Oi na fano ai ki te mea nae iei ai ia Tamala i tafa o te auala ma lea vē atu ki ei, “Hau ke fanatu au kia te koe” (E hē ia iloa ko te āvaga ia a tona ataliki kua oti.)
Na tali vē mai ia Tamala, “Heā ta aku e kē foki maia kāfai koe e hau kia te au?” 17Kua lea atu ia Iuta, “E kō momoli atua he punuāoti mā koe mai taku lafumanu.”
Ma na tali mai ia Tamala, “Kua lelei, kae e tatau ke tuku mai e koe kia te au he mea ke fai ma fakamāoniga, ke pa ki te taimi e momoli mai ai e koe te punuāoti.”
18Na fehili atu ia Iuta, “Heā te tatau ke kō fōki atua ke fai ma fakamāoniga?”
Na tali mai ia Tamala, “Ko te mama fakamau fakailoga tēnā e kahoa i tō ua, ma te tokotoko i tō lima.” Oi na fōki ai e Iuta ki ei. Na momoe kilāua ma na faitama ai ia Tamala. 19Oi na toe fano ai ia Tamala ki tona fale ma tatala kehe te veli, kae toe fai ona kofu e iloa ai ko ia he fafine kua oti tana āvaga.
20Mulimuli ake, oi na uga ai e Iuta tana uō ko Hira te ha-Atulamī, ke kave te punuāoti kae ke toe kaumai nā mea na fōki e ia ki te fafine ke fai ma fakamāoniga, kae kua hē maua e Hira te fafine. 21Oi na fehili vē atu ai ia ki ni tāulelea i Enaima, “Tēfea te fafine talitāne nae i kinei i kautafa o te auala?”
Na tali mai kilātou, “E hēki iei lele he fafine talitāne na kua i kinei.”
22Oi na toe liliu ai ia Hira kia Iuta ma lea vē atu ki ei, “E hēki kō maua te fafine. Na leamai nā tāulelea o te kakai, e hēki iei lele he fafine talitāne na kua i kinā talu mai.”
23Kua tali atu ia Iuta, “Tuku vē nā mea ke kave mā ia, auā nā tino i na fakatauemu mai kia te kitāua. Ko te mea hili na kave e au te punuāoti tēnei ki te fafine, kae e hēki kē maua.”
24E tuha pe kua tolu ia māhina kua teka, kae kua lea vē atu hētahi tino kia Iuta, “Ko nā uiga o Tamala, te āvaga a tō ataliki kua oti, e vē lava ni uiga o he fafine talitāne, ma ko tē kua faitama nei.”
Ma na fakatonu vē loa e Iuta, “Kave ia Tamala oi huhunu ola.”
25Oi na olo ai nā tino oi kave ia Tamala, ma ka koi takitaki atu ia e kilātou ki te faitotoka o te kakai, ka kua uga e ia he tino ki te tamana o tana āvaga ma he faifekau e vē, “Ko au e faitama i te tino e ā ia nā mea iēnei. Kikila lelei ake ki ei pe ā ai nā mea iēnā—te mama fakamau fakailoga ma te kahoa e tautau ai, ma te tokotoko tēnei.”
26Kua matea e Iuta nā mea iēnei, oi na lea vē ai, “Kua hili atu te tauhi fakamāoni o te fafine ki te tūlāfono i lo au. Kua hē kō fakatinoa toku tiute kia te ia—na tatau ke tuku atu e au toku ataliki ko Helaha ke āvaga ma ia.” Ma e hēki toe momoe lele ia Iuta ma te fafine.
27I te taimi ka fānau ai ia Tamala, na iloa ai ko he māhaga ta ia i tona manava. 28Ma i te fakatīgāga, na fēke ake ai ki fafo te lima o tētahi pepe; kua tāofi e te fakatōhaga te lima ma nonoa i he meafilo kukula, ma lea vē, “Ko tēnei te na muamua fānau mai.” 29Kae na toe toho ki loto tona lima, ma na fānau mai ai muamua tona uho. Oi na lea vē ai te fakatōhaga, “Oi kua fakatō lava koe e koe ki fafo?” Ma na fakaigoa ai ia kia Pelehe.#38.29 Pelehe Ko te uiga o te igoa tēnei i te gagana Epelu fakatō ki fafo 30Ma na fānau mai tona uho e nonoa te meafilo kukula i te lima, ma na fakaigoa ai kia Hēlaha.#38.30 Hēlaha Ko te igoa tēnei e tāi vē ko te fakaleoga o te kupu Epelu mo te pupula kukula o te mālama o te tafa o ata
Currently Selected:
Kenehe 38: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
