Kenehe 33
33
Kua Feiloaki ia Iakopo ma Ehau
1Ko hēki teka kehe atu ia Iakopo mai kinā, kae ia kitea atu ia Ehau e ōmamai ma ni tāulelea e toka 400. Oi na fakatonu ai e ia ke fakatutū nā tamaiti i ni vāega e tolu fakatahi ma o lātou mātua ko Leaha, ko Lahela ma nā āvagapō e toka lua. 2Ma kua tuku e ia nā āvagapō ma a lā tamaiti ki mua, oi hohoko atu ai ki ei ia Leaha ma ana tamaiti, kae mulimuli atu i tua ia Lahela ma Iohefa. 3Ma na fano ai ia Iakopo kua havali i mua o kilātou ma taifoifo ki lalo fakafitu, ka koi havali atu ke fetaui ma tona uho. 4Kae ko Ehau kua vili mai oi fakafeiloaki kia Iakopo; kua fuhi mai e ia ia Iakopo ma hogi ki ei. Oi na faitatagi ai lava kilāua i te fiafia. 5Ma i te kitea atuga e Ehau o nā fafine ma nā tamaiti, oi na fehili vē atu ai, “Ko ai nā tino iēnei na ōmamai ma koutou?”
“Ko nā tamaiti iēnei kua fōki mai e te Atua agaalofa kia te au tau kaukauna,” kua tali vēnā atu ia Iakopo. 6Oi na ōmamai ai nā āvagapō ma nā tamaiti a kilāua, kua ifo ki lalo i mua o Ehau; 7na vēnā foki oi ōmamai ia Leaha ma ana tamaiti, kae mulimuli ōmamai ia Iohefa ma Lahela ma ifo ki lalo.
8Kua fehili mai ia Ehau, “Ka ko te vāega la na fetaui kimātou? Heā te i tō māfaufau kua kavatu ai nā lafumanu kia te au?”
Na tali atu ia Iakopo, “Ke fai ma mea e talia fiafia ai au tau kaukauna, e koe.”
9Kae kua lea mai ia Ehau, “Toku uho! E lava lele au i aku mea e iei nei; tuku vēnā nā mea a koe mā koe.”
10Kua tali atu ia Iakopo, “Hēai kō, fakamolemole. Kāfai au kua talia fiafia e koe, ke talia foki la e koe te meālofa mai ia te au. Auā ko te meamoni lava, ko te kikila o oku ki ō fōliga e vē lava au kua kikila ki fōliga o te Atua, i te kua kē taliagia o au ma te fiafia. 11Fakamolemole kō oi talia te meālofa kua kaumai e au mo koe, auā kua agalelei mai te Atua kia te au ma kua ia fōki maia nā mea uma na fofou au ki ei.” Oi na tauānau ai lava ia Ehau e Iakopo, ma na iku ai lava oi talia e ia.
12Oi na lea mai ai ia Ehau, “Keina tātou hāuni oi olo, ma ka muamua au i mua o koutou.”
13Kae kua tali atu ia Iakopo, “Toku matai, e iloa e koe ko nā tamaiti e vāivai, ma ko au foki e popole ki nā māmoe ma nā pōvi ma a lātou punua. Kāfai e hona fakahāvavali e kimātou i he aho e fokotahi, ka mamate uma nā lafumanu. 14Fakahao ake kō koe toku matai oi muamua atu, kae ke taufai mālie atu au i ō tua, fua ki te vave e mafai ke hāvavali ai nā lafumanu ma tamaiti, oi kua toe fetaui ai kitāua i Etoma.”#33.14 Pe Heili
15Kua lea mai ia Ehau, “Ke tuku la e au ni tāulelea o taku vāega ke fehoahoani atu kia te koe.”
Kae kua tali atu ia Iakopo, “Kāfai e hē āfāina ia te koe, tuku vēia kō! E hē manakomia e au tau kaukauna he fehoahoani”. 16Oi na toe liliu ai lava ia Ehau ki Etoma i te aho tēnā. 17Kae ko Iakopo kua fano ki Hukota, ma ko kinā na fakatū ai tona fale ma ni fakamalumalu mo ana lafumanu. Ko te mea ia na fakaigoa ai te nofoaga tēnei ko Hukota.#33.17 Hukota Ko te uiga o te igoa tēnei i te gagana Epelu fakamalumalu
18Mulimuli ake, na taunuku atu ai ma te manuia te malaga a Iakopo mai Mehopotamia, ki te kakai ko Hekeme i te fenua ko Kanana, ma na fakatū ai tona falekie i he fenua e pili ki te kakai. 19Na fakatau mai e ia he vāega o te fenua tēnei, mai nā lāpuna o Hamolo te tamana o Hekeme, i te helau tupe hiliva.#Ioh 24.32; Ioa 4.5 20Ko kinā na fakatū ai e ia he fata faitāulaga ma fakaigoa ai ko Eli-Elohe-Ihalaelu.#33.20 Ko te uiga Atua, te Atua o Ihalaelu
Currently Selected:
Kenehe 33: TOKU
Highlight
Share
Compare
Copy
Want to have your highlights saved across all your devices? Sign up or sign in
Bible Society New Zealand Charitable Trust
